Azər Həsrət: “Dövlətin onlayn medianın inkişafını və bütövlükdə internet infrastrukturunun təhlükəsizliyini təmin etmək üçün atdığı addımlar sayəsində “az” domeninə maraq artıb”
Azərbaycanın milli "az" domen zonasında 28 986 internet-resurs qeydiyyatdan keçib. Bu barədə "WHOIS" resursu məlumat yayıb. Məlumata əsasən, 2017-ci ilin yekunlarına əsasən, "az" domen zonasında internet saytlarının qeydiyyatı ilin əvvəli ilə müqayisədə 18 faiz artıb. Qeydiyyata alınmış ümumi internet-resurslardan 27 104-ü birinci səviyyəli domen zonasında qeydiyyatdan keçiblər. Bu rəqəm ilin əvvəli ilə müqayisədə 18,6 faiz artıb.
İkinci səviyyəli domen zonası - "com.az" domenində 1098 sayt (6,3 faiz artım) qeydiyyata alınıb. Populyarlığına görə üçüncü yerdə "edu.az" domeni qərarlaşıb. 2017-ci ildə bu domendə 321 sayt qeydiyyatdan keçib və 31 faiz artım qeydə alınıb.
Qeyd edək ki, "az" milli domen zonası 1993-cü il avqustun 25-də fəaliyyətə başlayıb. Bu domendə qeydiyyatın dəyəri 20 manatdır, illik texniki dəstək də bu qiymətə başa gəlir.
“Az” domen zonasında internet saytlarının artması səbəbi nə ilə bağlıdır? Mövzu ilə bağlı mütəxəssisə müraciət etdik.
Media eksperti Azər Həsrət “Bakı-Xəbər”ə açıqlamasında qeyd etdi ki, əvvəllər “az” domeni ilə bağlı ciddi problemlər var idi: “Hətta onun qiymətinin çox baha, texnoloji dəstəyinin zəif və güvənlik probleminin olması ilə bağlı çətinliklər yaşanırdı. Həmin problemləri biz zaman-zaman gündəmə gətiririb ictimailəşdirirdik. Hətta 15 il öncə bəyanatla çıxış etmişdim ki, heç vaxt “az” domeni almayacam. Danılmaz faktdır ki, o illər bu sahədə ciddi problemlər var idi. Ancaq son illər problemlərin həll olunması istiqamətində aidiyyəti qurumlar səy göstərirlər. Domen alınması üçün ödənilən rüsum dünya standartlarına uyğunlaşdırılıb. Digər tərəfdən, texnoloji təftis sahəsində də irəliləyişlər var. “Az” domenlərinin təhlükəsizliyinin təmin olunması istiqamətində işlər görülür. Ən əsası dövlətin onlayn medianın inkişafını və bütövlükdə internet infrastrukturunun təhlükəsizliyini təmin etmək üçün atdığı addımlar sayəsində “az” domeninə maraq artıb. Bəllidir ki, fünyandünAzərbaycan dünyanın aparıcı dövlətləri ilə müqayisədə əvvəlki illərdə çox geridə qalırdı. Həm mütəxəssis çatışmazlığı, həm də texniki təchizat sahəsində yaşanan problemlərin həll olunması “az” domeninə marağı artırıb. Beləliklə, qeyd olunan domenlə dünyaya çıxmaq əvvəlki kimi etimadsız deyil. Bu baxımdan problemlər həll olunub. Həll olunduqca, internetin milli seqmentində olan insanlar artıq öz domen zonamıza üz tutmağa başlayıblar”.
Günel CƏLİLOVA
