Ceyhun Məmmədov: “Bütün günahları dövlət qurumlarının üzərinə atmaq doğru deyil”
Artıq bir neçə gündür Quba rayonu istiqamətində itkin düşmüş “Gilavar” hava və ekstrim idman klubunun üzvləri Cəbrayılzadə Fəridə Zəbiyulla qızı, Hüseynov Babur Vaqif oğlu və Bünyatzadə Namin Nizami oğlunun axtarışları ilə bağlı xəbərləri eşidirik. Məlum olur ki, itkin düşən alpinistlərin axtarışı dövlət qurumlarının nəzarətindədir. Hətta bununla bağlı həmin ərazidə xüsusi qərargah da yaradılıb.
Verilən ən son məlumata görə, Quba rayonu ərazisində itkin düşmüş alpinistlərin axtarışları ötən gün də davam edib. Əməliyyatda FHN-in peşəkar xilasedicilərdən ibarət dəstələri (müvafiq geyim, rabitə vasitələri və digər xilasetmə ləvazimatları ilə təchiz olunmuş), Ekologiya və Təbii Sərvətlər Nazirliyinin əməkdaşları və könüllü dəstələr iştirak ediblər. Axtarışlara xüsusi təlim keçmiş itlər cəlb olunublar.
Axtarış-xilasetmə işləri yüksək dağ massivində, çətin meteoroloji şəraitdə aparılır. Son günlər intensiv yağan qar səbəbindən axtarışların getdiyi ərazilərdə yeni qar uçqunlarının yaranma ehtimalı artıb. Hazırda burada qar örtüyünün qalınlığı 1-1,5 metr təşkil edir. Qar uçqunlarının olduğu yerlərdə isə qar qatının qalınlığı 8-12 metrə qədərdir. Qeyd olunanları nəzərə alaraq, hadisə rayonuna ağır texnikanın və digər texnikaların cəlb edilməsi daha təhlükəli vəziyyət yarada bilər. Yaranmış şəraitdə axtarış-xilasetmə və digər təxirəsalınmaz işlərin aparılması daha da çətinləşib.
Fövqəladə Hallar Nazirliyi təəssüf hissi ilə bildirir ki, axtarış-xilasetmə əməliyyatının gedişatını, xüsusilə də mürəkkəb şəraitdə axtarış-xilasetmə tədbirlərini həyata keçirən müvafiq dövlət qurumlarının əməkdaşlarının və könüllülərin fədakar fəaliyyətini işıqlandırmaq əvəzinə, bəzi kütləvi informasiya vasitələri və sosial media istifadəçiləri həqiqəti əks etdirməyən məlumatlar yaymaqda davam edirlər.
Fövqəladə Hallar Nazirliyi kütləvi informasiya vasitələrinə, ictimaiyyət nümayəndələrinə, sosial şəbəkələrin istifadəçilərinə bir daha müraciət edir və yaranmış həssas vəziyyətə anlayışla yanaşmağa çağırır. Qeyd edək ki, axtarış işləri barədə məlumatlar Fövqəladə Hallar Nazirliyinin rəsmi internet informasiya portalında (fhn.gov.az) mütəmadi dərc olunur.
Göründüyü kimi, dövlət qurumlarının özləri də sosial şəbəkələrdə yayılan əsassız məlumatlardan ciddi narahatlıq hissi keçirirlər. Bizim də müşahidələrimiz göstərir ki, alpinistlərin tapılmamasında bir çox sosial şəbəkə istifadəçiləri yalnız dövlət qurumlarını günahlandırırlar. Bu yanaşmanı nə dərəcədə doğru saymaq olar?
İdman mütəxəssisi Ceyhun Məmmədovun sözlərinə görə, bu mövzu ilə bağlı informasiya dağınıqlığı hiss edilir: “Hesab edirəm ki, alpinistlərin itməsi və sonrakı axtarış dönəmində tapılmaması ilə bağlı bütün günahları dövlət qurumlarının üzərinə atmaq doğru deyil. Çünki biz izləyib görürük ki, FHN və Ekologiya və Təbii Sərvətlər Nazirliyi bu məsələ ilə ciddi məşğul olurlar. Hətta həmin əraziyə yaxın yerdə xüsusi qərargah da yaradılıb. Yəqin ki, idmançıların tapılmasında daha çox maraqlı olan da məhz elə dövlət qurumlarıdır. Alpinistlik çox risqli idman növü sayılır. Onunla məşğul olanlar belə risqləri əvvəlcədən gözlərinin önünə alıb bu işə gedirlər. Dünyada bu, alpinistlərin itkin düşdüyü və ya həyatlarını itirdikləri ilk hadisə deyil. Hətta dünyanın ən inkişaf etmiş ölkələrində belə analoji hallar yaşanır. Elə ölkələr var ki, orada heç xilasetmə işlərinin aparılması ilə bağlı qurum yoxdur. Ancaq buna baxmayaraq, alpinistlərin sayı hər il artır. Prosesləri izləyirəm. Mən deməzdim ki, sosial şəbəkələrdə bu məsələ ilə bağlı yalnız dövlət qurumlarının tənqid edilməsi problem yaradır. Alpinistlərin həyatı ilə bağlı dezinformasiyaların dövriyyəyə buraxıldığının da şahidi oluruq. Hətta onlardan birinin tapılması ilə bağlı xəbər KİV-lər tərəfindən də yayıldı. Sonra məlumat təsdiqlənmədi. Bu vəziyyətdə həmin alpinistlərin ailələrini, doğmalarını düşünmək lazımdır. Bilirsiniz ki, itkin düşən alpinistlərdən biri xanımdır. Bu günlərdə belə bir müzakirənin şahidi oldum. Bəziləri irad bildirirlər ki, xanım niyə belə işlə məşğul olur? Hesab edirəm ki, bütün bu yanaşmalar yanlışdır. Hər kəsin seçdiyi yola hörmət etmək lazımdır. Onların axtarışlarını çətinləşdirən amillərdən biri də hava şəraitinin qarlı və şaxtalı olmasıdır. Yenə də ümidimizi üzməyək. İnanırıq ki, alpinistlərimiz sağ-salamat ailələrinə qayıdacaqlar”.
Məhəmmədəli QƏRİBLİ
