Azərbaycanda sahibkarlığın inkişafı üçün müxtəlif addımlar atılır. Kənd təsərrütatı və ya iqtisadiyyatın digər sahələrində yatırım etmək istəyənlər üçün dövlət tərəfindən hər cür şərait yaradılır. Sahibkarlıqla məşğul olmaq istəyənlərə güzəştli kredit verilir.
Əslində, sahibkar dedikdə daha çox kişilər nəzərdə tutulur. Ancaq etiraf etmək lazımdır ki, bu sahədə qadınların əldə etdiyi uğurlar heç də kişilərdən geri qalmır.
Aparılan araşdırmalara görə, Azərbaycanda sahibkar qadınların sayı artır. Açıqlanan statistik rəqəmlərə əsasən, hazırda ölkədə 143 mindən çox sahibkar qadın var.
Qadın sahibkarların sayının artması sevindiricidir. İqtisadiyyatın inkişafında kişilərlə yanaşı, zərif cinsin nümayəndələrinin də rolunun olması xoşdur.
“Vəfa” Sosial İctimai Birliyinin rəhbəri Fatimə Hacıbəyli bizimlə söhbətində qeyd etdi ki, fiziki baxımdan qadınlar zəif ola bilər, ancaq onlar mənəvi baxımdan güclüdürlər: “Qadınların mənəvi baxımdan güclü olması onların istənilən sahədə uğur əldə etməsinə şərait yaradır. Sevindirici haldır ki, artıq Azərbaycanda da sahibkar qadınlar formalaşır. Əksər xanımlarımız biznesdə daha çox uğur qazanmağa meyllidirlər. Qadınların da fiziki baxımdan fəal olduğunu nəzərə alsaq, onların boyük uğurlar qazana biləcəyini ehtimal edirəm. Qadın sahibkarlığının inkişafı yoxsulluğun azalmasına, qadınların iqtisadi və sosial nüfuzunun artmasına və bir çox hallarda cəmiyyətdə gender bərabərsizliyinin aradan qaldırılmasına yardım edəcək”.
Həmsöhbətimizin sözlərinə görə, qadın sahibkarların sayının artması səbəblərindən biri onların öz işinə məsuliyyətlə yanaşmasıdır: “Hansısa qadın hər hansı bir işi görmək üçün bankdan müəyyən məbləğdə kredit götürür. Aparılan araşdırmalara görə, xırda və ya orta sahibkarlıqla məşğul olan qadınlar banka olan kredit borcunu vaxtı-vaxtında qaytarırlar”.
F.Hacıbəyli onu da bildirdi ki, son zamanlar Azərbaycan qadınları arasında sahibkarlıq meylləri güclənib. Qadın sahibkarlar əsasən tekstil və kənd təsərrüfatı sahəsində aktivdirlər.
Günel CƏLİLOVA
