Dekabrın 28-də son illərin ən gözəl ənənələrindən biri kimi Xətai Rayon Polis İdarəsində veteranlarla gənc əməkdaşların bir araya gəldiyi hesabat xarakterli növbəti tədbir baş tutub.
“Bu gün hər birimiz hesabat verəcəyik və uğurlarımızı, nöqsanlarımızı təhlil edəcəyik”. Bu sözləri tədbiri açan İdarənin rəisi, polis polkovniki Muradəli Babayev deyib.
O, il ərzində şəxsi heyət tərəfindən cinayətkarlıqla mübarizə sahəsində görülən işlərdən, açılan cinayətlərdən danışıb və əldə etdikləri uğurlarda polis veteranlarının da xüsusi rolunun olduğuna diqqət çəkib. Bu gün cəmiyyətimizdə polis veteranlarının təcrübəsinə, onların yardımına böyük ehtiyacın olduğunu xatırladan polis rəisi deyib ki, məktəblərdə, əmək kollektivlərində paytaxtda və yerlərdə narkomaniya, erkən nikah və dini radikalizm mövzusunda keçirilən tədbirlərdə veteranların hüquqi maarifləndirmə sahəsində təbliğatı əldə olunan nailiyyətlərin daha da davamlı olmasına zəmin yaradır.
Ölkəmizdə veteranlar hərəkatının güclənməsinə dövlətimiz tərəfindən böyük önəm verildiyini, üzləşdikləri problemlərin qısa zaman kəsiyində öz həllini tapdığını bildirən İdarə rəisi DİN rəhbərliyinin daxili işlər orqanları veteranlarına hər zaman yüksək diqqət və qayğı göstərildiyini, onların bilik və bacarığının, gənc əməkdaşların peşə vərdişlərinə yiyələnməsində, təcrübələrinin artmasında, peşəkar əməkdaş kimi formalaşmasında hər zaman köməyə çatdığına diqqət çəkib.
Qeyd olunub ki, ilin müvafiq dövrü ərzində Xətai rayonunda törədilmiş cinayətlərdən 40-ı məhz polis veteranlarının iştirakı ilə açılıb. Rayon ərazisində yerləşən məktəblərdə narkomaniya, erkən nikah və dini radikalizm mövzusunda keçirilən 50-dən çox tədbirdə RPİ-nin veteranları fəallıq göstərib.
Bakı Şəhər Baş Polis İdarəsi rəisinin şəxsi heyətlə iş üzrə böyük köməkçisi, polis polkovniki Əli Vəliyev polis veteranları ilə gənc əməkdaşların görüşlərinin keçirilməsinin Xətai RPİ-də artıq ənənə halını aldığını və gənclər arasında vətənpərvərlik hisslərinin təbliğində, polis-vətəndaş münasibətlərinin möhkəmlənməsində bu görüşlərin böyük əhəmiyyəti olduğunu deyib. Polis polkovniki Ə.Vəliyev paytaxda baş vermiş cinayətlərdən 704-nün veteranların iştirakı ilə açılmasını ağsaqqal həmkarlarımızın xidməti anda sədaqəti, ümumi işə töhfəsi kimi dəyərləndirib.
Bakı Şəhər Baş Polis İdərəsinin Veteranlar Şurasının sədri Emin Məmmədov polis orqanlarının rəhbərlərinin veteranlarla işə verdiyi önəmin faydasından söz açıb, gənc həmkarları ilə cinayətkarlıqla mübarizədə, asayişin qorunmasında birgə fəaliyyətdən, onlara göstərilən diqqət və qayğıdan məmnunluğunu bildirib.
RPİ-nin Veteranlar Şurasının sədri Nazim Xıdırov sahə müvəkkillərinin hesabatlarının elə onların xidməti ərazisində sakinlərin iştirakı ilə dinlənilməsini polis-vətəndaş münasibətlərində şəffaflığın, qarşılıqlı etimadın, birgə fəaliyyətin təzahürü kimi qiymətləndirib.
Gənc əməkdaşlar adından çıxış edən polis baş leytenantı Zabil Qurbanov və polis leytenantı Kamran Məhərrəmli polis ailəsində doğulduqlarını, kiçik yaşlarından bu peşənin çətinlikləri ilə yanaşı gərəkliyinin şahidi olduqlarını, bu gün xidmətdə polis veteranlarının zəngin təcrübəsindən yararlandıqlarını, vətənə, xalqa və dövlətçiliyə xidmətləri ilə qürur duyduqlarını bildirib.
Digər çıxış edənlər bu tədbirin veteranlarla gənc əməkdaşlar arasındakı münasibətlərin, birgə fəaliyyətin daha da möhkəmlənməsinə xidmət etdiyini vurğulayıb.
Tədbirə yekun vuran rəis, polis polkovniki Muradəli Babayev gənc əməkdaşlara qarşıya çıxan çətinliklərdən qorxmamağı, vətəndaşlarla münasibətdə səmimi olmağı, qanunun tələblərinə ciddi əməl etməyi, ən ümdəsi, Vətənə, xalqa və dövlətə sədaqətlə xidmət etməyi, cinayətlərin açılmasında, profilaktikasında, təhlükəsizliyin təminində veteranların təcrübəsindən, ictimai nüfuzundan, bilik və bacarıqlarından bundan sonra da yararlanmalarını tövsiyə edib.
Tədbir bədii hissə ilə davam edib.
Hafiz TƏMİROV DİN Mətbuat Xidmətinin əməkdaşı
