Məhərrəm Zülfüqarlı: “Yaşadığı ərazidə gəncin sahəsinə uyğun, normal əməkhaqqı ilə iş varsa, niyə Bakıya gəlsin?”
“Vakant vəzifələr regionlarda yerləşən dövlət orqanlarında olanda insanlar orada işləmək üçün həvəsli olmurlar. Bu sahədə müəyyən çatışmazlıq müşahidə olunur. Halbuki, regionlarda yerləşən dövlət orqanlarında rəhbər vəzifələrə aid vakant yerlər mövcuddur və rayonlarda da yüksək ixtisaslı kadrlara ehtiyac var.
Nədənsə, ölkədə insanların məhz Bakıda, amma aşağı vəzifədə işləməsi belə ailə-məişət mühitində uğur hesab olunur. Ancaq hamımız bilirik ki, paytaxtda işləyib yaşamaq daha çətindir. Çox vaxt gənclər valideynlərin himayəsi altında yaşamaq istəyirlər. Belə olmamalıdır. Gənclər öz sərbəstliyindən istifadə etməlidirlər. Öz üzərində çalışan hər bir insan regionda əmək fəaliyyətinə başlasa da, yaxşı vəzifəyə sahib ola bilər”. Bu sözləri Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.
Bölgələrdə yaşayan gənclərin yaşadıqları mənzilə yaxın yerdə deyil, paytaxt Bakıya gəlib işləmək istəyi normal qarşılanmır. Bəllidir ki, rayon sakini olan gəncin ailəsindən, dost-tanışından ayrılıb tanımadığı bir muhitdə yaşayıb çalışması onun üçün xoş olmayacaq. Tək bölgələrdə yaşayanlar deyil, eynilə paytaxtda yaşayanlar da istəyirlər ki, onların işi evlərinə yaxın yerdə olsun.
Onu da unutmaq lazım deyil ki, regionların sosial-iqtisadi inkişafı üçün bölgələrdə iş yerləri yaradılır. Həmçinin, əhalinin rahat yaşayışı üçün regionlarda sosial infrastruktur da inkişaf edir.
Təhsil eksperti Məhərrəm Zülfüqarlı “Bakı-Xəbər”ə açıqlamasında qeyd etdi ki, gənclər məmnuniyyətlə öz rayonunda ona təqdim olunan işdə çalışmağa maraq göstərir: “Regionlarda yaşanan işsizliyin qarşısını almaq üçün nəinki dövlət, o cümlədən özəl sektor tərəfindən iş yerləri açılıb. Region əhalisi məmnuniyyətlə onlar üçün yaradılan iş yerlərində çalışırlar. Yaşadığı ərazidə gəncin sahəsinə uyğun, normal əməkhaqqı ilə iş varsa, niyə Bakıya gəlsin? Məsələn, Gədəbəydə yaşayan gəncin orada dövlət işində deyil, gəlib Bakıda hansısa sahədə çalışmaq istəməsi düzgün deyil”.
Həmsöhbətimiz onu da bildirdi ki, imtahan komissiyasından keçən gəncin yaşadığı ev hardadırsa, ona orada iş vermək lazımdır: “O da bəllidir ki, ailədən uzaq və kirayə mənzildə yaşamaq iqtisadi baxımdan həmin şəxsin büdcəsinə uyğun olmaz. Bu səbəbdən də gənclər öz ailələrinə yaxın ərazidə, dövlət və ya özəl sektorda olan işlərdə çalışmağa üstünlük verirlər”.
Günel CƏLİLOVA
