İmran Abdullayev: “Bəzən yeni il hədiyyə qutularının üzərindəki tarix onların içərisindəkilərə aid deyil” Eyyub Hüseynov: “Hazırda dükanlarda və fərdi şəkildə vaxtı keçmiş, istifadəyə yararsız olan malları hədiyyə paketlərinin içinə doldurub satırlar”
2017-ci ilin sonuna sayılı günlər qalıb. Qarşıdan yeni il gəlir. Yeni il bayramı münasibətilə valideynlər övladlarını sevindirmək üçün şəhərin müxtəlif ərazilərində satılan yeni il bağlamaları alırlar. Yeni il bağlamaları market, dükan, metro çıxışlarında, bir sözlə, şəhərin istənilən ərazisində satılır.
Yeni il hədiyyələrinin satış qiyməti 3 manatdan başlayır. Bu bağlamaların içərisinə əsasən uşaqlar üçün şokolad, peçenye, şar və müxtəlif cür şirnilər qoyulur. İddia olunur ki, səyyar şəkildə satışa çıxarılan bağlamaların içərisində əksər hallarda vaxtı ötmüş məhsullar olur.
Maraqlıdır, səyyar şəkildə satılan yeni il bağlamalarına necə nəzarət olunur?
Respublika Gigiyena və Epidemiologiya Mərkəzinin (RGEM) direktor əvəzi İmran Abdullayev bildirdi ki, bəzən yeni il hədiyyə qutularının üzərindəki tarix onların içərisindəkilərə aid deyil. Bu səbəbdən vətəndaşlar hədiyyə alarkən diqqətli olmalıdırlar. Onun sözlərinə görə, əvvəlki illərdə hədiyyə qutularında yararlılıq müddəti bitmiş məhsulların satışı olub: “Əvvəlki illərdə belə hallar olub ki, vaxtı keçmiş şirniyyatlar qutulara yerləşdirilib. İndi sahibkarlıq fəaliyyətinin yoxlanılması dayandırıldığından, qutularla bağlı yoxlamalar apara bilmirik. Əgər müraciət edilsə, şikayət araşdırıla bilər”
Azad İstehlakçılar Birliyinin sədri Eyyub Hüseynov bizimlə söhbətində bildirdi ki, hazırda dükanlarda və fərdi şəkildə vaxtı keçmiş, istifadəyə yararsız olan malları hədiyyə paketlərinin içinə doldurub satırlar: "Ona görə valideynlər həm əyləncə müəssisələrində, teatrlarda uşaqlara verilən hədiyyələrdən, həm də mağazalarda satılan hədiyyələrdən ehtiyatlı olmalıdırlar. Əks halda bu, uşağın zəhərlənməsi və ya xəstələnməsi ilə nəticələnə bilər.
Yeni ilə az qaldığı üçün, artıq bir çox mədəniyyət müəssisəsində hazırlıqlar görülür. Müxtəlif şənliklərin təşkil edildiyi müəssisələrdə qiyməti 10 manat olan biletə, üstəlik, hədiyyə paketi də verilir. Bu da əlbəttə ki, bir qədər şübhəli görünür. Həmin hədiyyə bağlamalarının içindəki şirniyyatların keyfiyyətinə isə zəmanət verən yoxdur”.
E.Hüseynovun sözlərinə görə, uşaqlarının sağlamlığı naminə valideynlər belə hədiyyələr alarkən diqqətli olmalıdırlar: "Hər bir valideyn yeni il hədiyyə paketi alarkən içindəki şirniyyatların keyfiyyəti ilə maraqlanmalı, qutuların üzərindəki son istifadə tarixinə nəzər salmalı və məhsulların hansı ölkədə istehsal olunması ilə də maraqlanmalıdırlar.
Valideyn uşağına yeni il hədiyyə bağlaması və yaxud şirniyyat alarkən mütləq diqqətli olmalıdır. Çünki onları sevindirməyə çalışdığınız halda, həyatları ilə oynaya bilərsiniz".
Həmsöhbətimiz onu da vurğuladı ki, əvvəllər bununla bağlı vəziyyət daha acınacaqlı idi: “Zəhərlənmə halları olurdu. İldən-ilə yeni il hədiyyələri ilə bağlı vəziyyət yaxşılaşır. Lakin yeni il hədiyyələri ilə bağlı problemlər adətən bayramdan sonra başlayır. Zəhərlənmə olarsa, bu özünü bir neçə gündən sonra da göstərir. Odur ki, valideynlər uşaqlara hazır yeni il hədiyyələrini verdikdə ehtiyatlı olsunlar”.
Günel CƏLİLOVA
