Qarşıdan gözəl bayramlar gəlir. Çoxları onu evində, isti ocağının başında qarşılamağa hazırlaşır. Azərbaycan Polisi isə asayişin keşiyindədir. Insanların rahat. əmin-aman həyatını qoruyur. Bayram günləri, gecələri də belə olacaq. Polisimiz gücləndirilmiş iş rejimində çalışacaq.
Bu danılmaz faktdır ki, texniki imkanlar nə qədər inkaf etsə də, yenə də hər bir uğura peşəkar kadrlar imza atır. Mühafizə polisində də belədir. Onun da işi çox olacaq. Bayram günlərində daha hansı tədbirlərin görüləcəyini öyrənmək üçün BMİ Nəsimi Rayon Mühafizə İdarəsinin qonağı olduq. İdarənin rəis müavini, polis polkovnik-leytenantı Sahib Vəliyevlə həm bu ilin nəticələrinə nəzər yetirdik, həm də gələcək perspektivləri müzakirə etdik.
Məlum oldu ki, İdarə tərəfindən 1311-dən çox obyekt və 608 mənzil qorunur. Bu ilin müvafiq dövrü ərzində 247 obyekt obyekt və 89 vətəndaş mənzili mühafizəyə qəbul olunub ki, onların da əksəriyyəti müasir tipli siqnalizasiya vasitələri ilə təchiz edilərək KMMM-ə qoşulub. Mühafizəyə götürülmüş obyektlərdən 81-i polis, 93-ü mülki mühafizə, 174-ü stasionar, 1269-u isə siqnalizasiya vasitəsilə qorunur.
Cinayətkarlığa qarşı mübarizə işinin gücləndirilməsi məqsədilə ərazi polis orqanları ilə qarşılıqlı əlaqə yaradılmış, mühafizə olunan obyektlərdən 4 oğurluq hadisəsinin qarşısı alınmışdır. Eləcə də 12 digər cinayət hadisəsinin qarşısı alınaraq 12 nəfər, narkotik maddə ilə əlaqədar bir fakt üzrə 1, həmçinin axtarışda olan 1, ictimai qaydanı pozan 151 nəfər saxlanılaraq aidiyyatı üzrə təhvil verilmişdir. İdarənin əməkdaşları tərəfindən 3 yanğın hadisəsinin qarşısı alınmışdır.
Bütün bunlar onu deməyə əsas verir ki, qorunan obyektlərin mühafizəsi, əsasən, təmin edilməklə yanaşı Mühafizə Xidmətinin əməkdaşları tərəfindən post və marşrutlarda cinayətkarlığa və ictimai qaydanın pozulması hallarına qarşı daha ciddi mübarizənin aparılması ötən ilin müvafiq dövrü ilə müqayisədə bu sahədə fəaliyyətin genişləndirilməsinin, peşəkarlığın səviyyəsinin artmasının bariz nümunəsidir.
DİN rəhbərliyi tərəfindən vətəndaşların müraciətlərinə xüsusi həssaslıqla yanaşılması mühüm bir vəzifə kimi diqqət mərkəzində saxlanılır. Məhz bunun nəticəsidir ki, cari ilin müvafiq dövrü ərzində İdarəyə 1175 vətəndaş müraciəti daxil olmuş və onların hər biri vaxtında cavablandırılmışdır.
Nəsimi Rayon Polis İdarəsi əməkdaşları ilə birlikdə vətəndaşlar arasında aparılan təbliğat və maarifləndirmə işləri nəticəsində rayon ərazisində qorunmayan obyekt və mənzillərin mühafizəyə qəbulu istiqamətində qarşılıqlı səmərəli işlər həyata keçirilib. RPİ tərəfindən 131 obyekt və mənzil mühafizəyə cəlb edilib.
Rəis müavini onu da diqqətimizə çatdırdı ki, öz mənzillərini qorunmaya verməklə yanaşı, bu gün obyektlərin və mənzillərin mühafizəyə cəlb edilməsində polis veteranlarının da böyük əməyi var.
Müşahidə etdiklərimizdən belə qənaətə gəldik ki, bu gün İdarədə yüksək tələbkarlıq hökm sürür. Əməkdaşların peşə və fiziki hazırlığı daim diqqət mərkəzində saxlanılır.
Nəsimi Rayon Mühafizə İdarəsinin rəisi, polis polkovniki Elçin Bəşirov xidmətə yeni qəbul olunan gənc əməkdaşların polisin etik-davranış kodeksinin müddəalarına riayət etmələrini, onların vətəndaşlarla ünsiyyətqurma bacarığını xüsusilə diqqət mərkəzində saxlayır və hami tərbiyəçilərə verilən tapşırıqların bu istiqamətdə yerinə yetirilməsinə şəxsən nəzarət edir. Aparılan təlim-tərbiyə işləri, xidməti fəaliyyətin düzgün qurulması uğurların əldə olunmasına zəmin yaradır.
Burada Azərbaycan idmanının şərəfini qoruyan, bayrağımızı ucaldan əməkdaşların-əlbəyaxa döyüş üzrə respublika və DİN çempionu-bölük komandiri, polis mayoru Ceyhun Bayramovun, Uşu-sanda üzrə dünya və Avropa çempionu Əli Mirələkbərlinin olması xidmətə yeni qəbul olunan gənclərdə böyük ruh yüksəkliyinə səbəb olur. Məhz onların sayəsində gənc əməkdaşların fiziki hazırlığı demək olar ki, yüksək səviyyədədir. Bunları da S.Vəliyev dedi.
İdarənin əməkdaşları müasir dövrün tələbləri ilə də ayaqlaşırlar. Belə ki, onların əksəriyyəti ölkəmizə gələn turistlərlə elə öz ana dillərində ünsiyyət qururlar. Bu da əlbəttə ki, razılıq hissi ilə qarşılanır.
Bu gün mühafizə polisinin öz fəaliyyətini daha yüksək səviyyədə təşkil etməsi, vətəndaşlarla birbaşa ünsiyyət qurması, normal, müasir tələblər səviyəsində xidməti üçün hər cür şərait yaradılıb. Qurumun dünya standartları səviyyəsinə çatması üçün DİN rəhbərliyi bütün tədbirləri görür, şəxsi heyətin sosial problemləri, qayğları daim diqqət mərkəzində saxlanılır. Yeni inzibati binaların tikintisi, təmir və bərpa işləri, ən müasir texniki vasitələr, güclü manevr imkanları olan yeni avtomaşınların alınması xidmətin təkmilləşdirilməsinə və daha effektiv təşkilinə yönəlib ki, bütün bu sadaladıqlarımız Nəsimi RMİ-nin xidmətində özünü bilavasitə göstərir. Bu isə o deməkdir ki, rayonda yerləşən mühüm strateji dövlət obyektləri, ən əsası vətəndaş mənzilləri, vətəndaşların əmlakları etibarlı nəzarət və mühafizə altındadır.
Hafiz Təmirov polis mayoru
