Geniş oxucu kütləsinin rəğbətini qazanmış populyar “Bakı-Xəbər” qəzetində (oktyabr, N 183) rastlaşdığım yazı öz məzmunu, təqdimatı, məna dərinliyi ilə o qədər səmimi və yaddaqalan idi ki, onu adi, “sıradan” hesab etmək olmazdı : “ATU rektoru Gəray Gəraybəyli Prezident təqaüdünə layiq görülən tələbələrlə görüşdü”.
İnformasiya ilə tanışlığı oxuyub başa çatdırmamış bu qeydlərin fraqmenti hafizəmə həkk olunmuşdu. 3-4 gün sonra eyni mövzunun təkrarını universitrtin çoxtirajlısı “Təbib”qəzetində görəndə ürəyimdəkilər əməli işə çevrildi və “qeydləri” sistemə salıb, “Bakı-Xəbər”ə çatdırdıq. Fikirləşdik ki, informasiyanı burada oxumuşuq, yekunu da burada qurtaraq.
***
Rektorla görüşün ilk anlarında salona toplaşanlar sevinc və fərəh dolu, qeyri-adi bir mühitə düşdüklərini hiss etmişdilər. Oxucuya zarafat gəlməsin, bir neçə həftə əvvəl “ abituriyent” adı daşıyan gənc oğlan və qız bu gün tələbədir – ölkədə öz yeri, sanbalı ilə seçilən, zəngin ənənələrə malik ATU-nun tələbəsi! Üstəlik də Prezident təqaüdçüsü fəxri adının daşıyıcıları.
Tədbir başlayır. Ənənəyə uyğun olaraq Tibb Universitetinin rektoru, professor G.Gəraybəyli öz adından təmsil etdiyi çoxminli müəllim, alim, professor-tələbə kollektivləri, işçi heyəti adından Prezident təqaüdünə layiq görülən 26 gənci təbrik edir, onlara təhsildə, həyatda yeni-yeni uğurtlar diləyir. Sözünə davam edərək, iftixar hissi ilə əlavə edir: “Bu böyük müvəfəqqiyətdir, nailiyətdir. İnanıram ki, bu yüksək biliyinizi gələcəkdə universitetdə göstərəcəksiniz”.
Rektorun ümidverici bu sözləri – qapım hər zaman tələbələrin üzünə açıqdır... “Həmişə sizi dinləməyə, təklif və şikayətlərinizlə tanış olmağa hazıram” – deməsi görüşün bir növ leytmotivi, akkordu kimi səslənmişdir.
G.Gəraybəyli buradaca rəhbərlikdə etik normalara, demokratik əsaslara necə böyük hörmətlə yanaşdığını büruzə verir və bildirir ki, “məndən öncə sizin dekanlarınız var. İstənilən problemlə bağlı onlara müraciət edin”.
Prezident təqaüdçülərini, eləcə də I kurs tələbələrini, bütövlükdə təhsilə cəlb olunmuşların hamısını rektor başa salmaq istəyir ki, problemlərin həllinə ilkin vəsilədən başlamaq lazımdır. Onlar səlahiyyətləri daxilində məsələnin çözülməsini təmin etməlidirlər. Əks təqdirdə yenə də o söz... “qapım (elə də dekanların qapısı) üzünüzə açıqdır, gəlin birlikdə götür-qoy edib, məsələni yöluna qoyaq...
Fəxri təqaüdçü tələbələrlə görüşdə yüksək tribunadan səslənən digər çıxışlar da mətləbə yaxın idi, uşaqları razı saldı. ATU-nun tədris işləri üzrə prorektoru, professor Sabir Əliyev gəncləri səmimiyyət dolu ürək sözləri ilə salamlayıb, çoxillik iş təcrübəsinə əsasən onları bir növ ehtiyatlandırmışdır: ”... sizinlə qürur duyuruq. Lakin Prezident təqaüdçüsü adını qazanmaq nə qədər çətindirsə, onu qorumaq daha çətindir. Sizə... bu adı qoruyub saxlamağı, elə bu göstəricilərlə də universiteti bitirməyi arzulayıram”.
Qəbulda 700 bal toplayan I kurs tələbəsi, Prezident təqaüdçüsü Eldar İlqar oğlu Əfəndiyev qürur hissi ilə bildirmişdir: “Bu universitet bizim üçün yeni bir həyatdır”.
Düz buyurursan, əziz balam! Bu “yeni həyata” inamla, qətiyyətlə bel bağladıqda, vaxtın hər saatından, dəqiqəsindən səmərəli istifadə etdikdə “yeni həyat” dönüb olur, şan-şöhrət mənbəyi, lap zəfər çələngi, sözün həqiqi mənasında elin, obanın fəxri, şəxsiyyətin başucalığı! Bu zirvəyə yükslən insanlar eldə-obada çox-çoxdur. Belə zirvəyə siz də çatasınız, əzizlərim!
Bu qeydləri yerbəyer edib, mətbu orqana hazılayarkən “525-ci qəzet”in səhifələrində rast gəldiyim oxşar informasiyanın bir epizodunu böyük təlaş hissi ilə qarşılayası oldum. I kurs tələbələrinin göürüşünə gələn ali məktəb rektorlarından biri uzaq keçmişdə, özü də hələ tələbə olarkən rastlaşdığı hadisəni xatırlayıb, uşaqlara tövsiyələr verir. Deyir ki, bir problemi yoluna qoymaq üçün rektorun qəbuluna getməli idim. Təəsüf ki, neçə ay ünvana ayaq döydüm, amma nə fayda ki, qəbul baş tutmadı və bəslədiyim ümid nəticəsiz qaldı...
Təzada bax, uçuruma diqqət yetir. Görün ki, elə də olur, belə də. Bir tərəfdə qayğıkeşlik, digər tərəfdə bürokratik əngəllərin hakim kəsilməsi! Hər biriniz fəxr edə bilərsiniz ki, sizin taleyiniz Azərbaycan Tibb Universitetinin “qızıl dövrünə”, demokratik əsasların hakim kəsildiyi zamana təsadüf edib.
****
Söhbət ATU-nun “qızıl dövründən” düşəndə xəyal adamı uzaq keçmişlərə aparır. Şöhrətli ali məktəbin bu günü ilə keçmişi əyani şəkildə göz önünə gəlir. İndi burada tam ayrı mənzərədir.
Universitetin nəhəng terapevtik və tədris cərrahiyyə klinikalarının tikilib istifadəyə verilməsi ən yaxın illərin nailiyyətidir. Bu obyektlər, eləcə də, əvvəllər inşa olunmuş, Tədris Stomatologiya , Onkologiya Klinikaları hər cür avadanlıq, innovativ cihazlarla təchiz olunmuşdur. Əzəmətli tədris korpusları, geniş və işıqlı auditoriyalar, laboratoriya və məşğələ otaqları, kitabxana, yeməkxana, təmirdən çıxmış yataqxanalar, bufetlər ... tələbələrin ixtiyarındadır. Əsaslı kitabxana neçə vaxtdan bəri iki növbəli 6 günlük iş rejimində fəaliyyət göztərir. Əvvəlki vaxtlardan fərqliu olaraq kitabxana saat 22-00-dək (şənbədə 21.00-dək) açıqdır. 3 qiraət zalı ağzınadək tələbələrlə dolu olur və növbətçi kitabxanaçılar oxucuları lazımi dərslik və ədəbiyyatla təmin edir, işlərin gedişini izləyirlər...
Bir dəfə tələbələrlə aramızda “atüstü” söhbət düşdü. Onlara keçən əsrin ortalarına aid bəzi məqamlardan danışdım. Dedim ki, siz həqiqətən gözəl dövrdə təhsil alırsınız.
Qoqol, 98 (indi Mərdanov qardaşları) ünvanında yerləşən yataqxanalardan dərsə yola düşənlərin marşrutu Semaşko, Əfəndiyev, M.Nağıyev xəstəxanalarından keçib “Qara şəhərə”, oradan Bayıla, “Malo morskoya”, daha neçə ünvandan keçib yataqxanaya çatırdı. Axşama yaxın tələbə yorğun-arğın növbəti günün dərslərinə hazırlaşmağa başlayır, böyük çətinliklərlə üzləşirdi... İndi nə var ki, böyük korpuslar, klinikalar, dərs otaqları, auditoriyalar, laboratoriyalar... bir ərazidə cəmləşib, adi tələbə şəhərciyini xatırladır.
Tələbələr yataqxanadan dərsə çatmaq üçün 5-6 dəqiqə vaxt itirirlər. Halbuki keçmişdə ağır şəraitdə oxuyanlar “təkərlər üstündə” diplom alırdılar. Unutmayın ki, ölkəmizdə tibbi cəbbəxanamızın ağır yükünü çiyinlərində daşıyan tanınmış elm korifeylərinin, alimlərinin böyük bir hissəsi məhz belə bir çətin şəraitdə təhsilə cəlb olunmuşdur. Sanballı dərsliklərin müəlliflərindən, sizə dərs deyən ağsaqqal müəllimlərdən bir çoxu həmin “təkərlər üstündə” diplom almış ziyalılar olmuşlar.
Deyilənləri dinlədikcə tələbələrin bəzilərinin sifətində təəccüb və şübhə hissini aydınca oxumaq olurdu, lakin bu bir həqiqətdir. Çox da uzaq olmayan keçmişimizin canlı mənzərəsi!
Yenə də sözüm sizədir, dostlar! Tibb aləmində son mühüm layihələrin həyata keçirilməsində ulu öndərimiz Heydər Əliyevin xidmətləri danılmazdır. Prezident İlham Əliyevin şəxsi təşəbbüsləri, ölkəmizin iqtisadi qüdrətinin möhkəmlənməsi sayəsində quruculuq işləri inamla davam etdirilir. İndi həqiqətən unuversitetimiz başdan-başa dəyişmiş, yenidən qurulmuş, gözəl bir tədris-təlim, təcrübə mərkəzinə çevrilmişdir. Burada təhsil almaq sözün həqiqi mənasında hər bir gəncin ürəkdən gələn arzusudur. İndi sizə belə bir xoşbəxtlik nəsib olmuşdur. Onu ən yaxşı nailiyyətlərlə, yüksək qiymətlərlə oxuyub sona çatdırmaq gərəkdir...
Bilənlər bilir, I kursun adlı və adi təqaüdçülərinə də bunu yenidən xatırladırıq. Hər bir təhsil növü yarış, mübarizə öz məcrasını “start xəttindən” götürür, finalda sona çatdırır. Qüvvəsini, imkanlarını əvvəlcədən düzgün ölçüb-biçənlər, dönməz iradə ilə işə girişənlər mənzil başına qələbə ilə çatırlar, ad-san qazanırlar. Eldə-obada başıuca gəzirlər belələri. Hər birinizə uğurlu final, başucalığı arzulayıram, əziz dostalar, ATU-nun Prezident təqaüdçüləri, eləcə də adi tələbələri! Vaxt tamama yetişir. Yeni hünər meydanı dövrü başlayır. Növbəti semestrdə qabiliyyət və hünərinizi göstərin! Söz sizindir!
Əsgər Əsgərov ATU Əsaslı kitabxananın böyük kitabxanaçısı, Azərbaycan Jurnalistlər Birliyinin üzvü
