Azərbaycan Tibb Universitetində Dünya Azərbaycanlılarının Həmrəylik Günü və Yeni ilin gəlişinə həsr olunmuş təntənəli tədbir keçirilib.
Bayram toplantısında ATU-nun rektoru, professor Gəray Gəraybəyli təbrik nitqi ilə çıxış edərək, Dünya Azərbaycanlılarının Həmrəyliyi Gününün yaranmasının tarixi haqqında danışıb: “Milli dirçəlişə, milli əlaqələrin möhkəmləndirilməsinə tələbatın artması səbəbindən 1993-cü ildə Azərbaycan Respublikası Prezidentinin fərmanı ilə 31 dekabr - Dünya Azərbaycanlılarının Həmrəylik günü elan edildi. Beləliklə, Azərbaycan xalqı üçün hər il 31 dekabr tarixi qoşa bayram sevinci ilə yadda qalır. Bu bayramlar ərəfəsində mən sizləri, ailə üzvlərinizi təbrik edirəm, hər birinizə xoş günlər, mehribançılıq, işlərinizdə böyük-böyük müvəffəqiyyətlər diləyirəm. Gələcək ildə xalqımıza, ölkəmizə daha da böyük tərəqqi, inkişaf diləyirəm. Arzu edirəm ki, gələcək həmrəylik günümüzü hazırda işğal altında olan torpaqlarımızda keçirək”.
Sonra tədbirdə ATU rektoru G.Gəraybəylinin təşəbbüsü ilə təsis olunmuş mükafatların təqdimat mərasimi keçirilib. Bu nominasiyalardan biri üzrə universitetdə uzun illər ərzində səmərəli və qüsursuz fəaliyyət göstərmiş keçmiş kafedra müdirləri təltif olunub. ATU rektorunun 21 dekabr 2017-ci il tarixli əmri ilə universitetin ictimai həyatında uzunmüddətli aparıcı rolları, elmi-pedaqoji fəaliyyətləri və gənc elmi kadrların hazırlanmasındakı rolları nəzərə alınaraq, prof. Amaliya Əyyubova, prof. Nəsib Quliyev, prof. Bahadur Baxşiyev, prof. Çingiz Quliyev, prof. Əzizağa Talışinski, prof. Zülfüqar Fərəcov və dos. Bahadur Hüseynova fəxri fərman və bir aylıq əmək haqqı məbləğində pul mükafatı təqdim olunub.
Bayram ərəfəsində digər müəllimlər də hədiyyəsiz qalmayıb. Çünki ən şərəfli peşə sahibi olan müəllimlər bu peşənin adını daim qoruyub saxlayiblar. Universitetdə isə müəllimlərin pedaqoji fəaliyyətinə ən doğru və düzgün qiyməti onların tələbələri verə bilər. Buna görə də 2017-cı ilin payız semesterində III, IV, V, VI kursun qrup nümayəndələri – cəmi 128 tələbə arasında “Ən yaxşı müəllim”nominasiyası üzrə sorğu keçirilib. Sorğunun nəticələrinə görə, ən yüksək səsi farmakologiya kafedrasının müəllimi dos. Kamandar Yaqubov toplayıb. Dos. Kamandar Yaqubovun pedaqoji fəaliyyəti, tələbələrə qarşı fədakarlığı, ədalətliliyi, qayğıkeşliyi və ən əsası tələbələr tərəfindən fəaliyyətinin yüksək qiymətləndirilməsi nəzərə alınaraq, ona fəxri fərman və bir aylıq əmək haqqı məbləğində pul mükafatı təqdim olunub.
Univrsietin əsas sütunlarından olan tələbələr də müxtəlif nominasiyalar üzrə təltif olunublar. “İlin ən yaxşı elmlə məşğul olan tələbəsi”, “İlin ən yaxşı dərsə davamiyyəti olan və dərslərini yaxşı oxuyan tələbəsi”,“İlin ən aktiv tələbəsi” müsabiqələri üzrə qaliblərin adları müəyyənləşib. Fakültə dekanlarının, Tələbə Həmkarlar İttifaqı Komitəsinin və Tələbə Elmi Cəmiyyətinin təqdimatları əsasında elmi fəaliyyətlə məşğul olan, universitetin ictimai həyatında fəal iştirak edən və nizam-intizamı yüksək olan tələbələrin adları dəqiqləşdirilib. Beləliklə, II müalicə-profilaktika fakültəsinin VI kurs tələbəsi Ülvi Ələşrəfov, ictimai-səhiyyə fakültəsinin VI kurs tələbəsi Nərgiz Əliyeva, Stomatologiya fakültəsinin III kurs tələbəsi Elcan Məmmədli, II müalicə-profilaktika fakültəsinin III kurs tələbəsi Şəmsi Axundov mükafata layiq görülüb.
Tədbirdə, həmçinin, “İstedad sorağında” mövzusunda rəsm sərgisinin qaliblərinin adları açıqlanıb. Bunlar II müalicə-profilaktika fakültəsinin V kurs tələbəsi Elsevər Ağazadə, II müalicə-profilaktika fakültəsinin VI kurs tələbəsi Hikmət İslamlı və I müalicə-profilaktika fakültəsinin III kurs tələbəsi Nigar İbrahimlidir. Noyabrın 27-də keçirilən rəsm sərgisində 14 tələbənin rəsm əsərləri və bir tələbənin əl işləri nümayiş etdirilib.
Tədbirin bədii hissəsi “Şəfa” xalq çalğı alətləri ansamblı, “Çinar” rəqs ansamblının çıxışı, Azərbaycan Tibb Universitetinin Hərbi Tibb Fakültəsinin III kurs tələbəsinin ifası ilə davam edib. ATU tələbələrinin təqdim etdiyi “D” bir pərdəli tamaşa da tədbir iştirakçıları tərəfindən maraqla qarşılanıb. Bayram toplantısı bədii hissə ilə sona çatıb.
Namiq QULİYEV
