Yeni il ərəfəsində “Şərq-Qərb” nəşriyyatında Daxili İşlər Nazirliyi Daxili Qoşunlarının 25 illik xidməti-döyüş fəaliyyətini özündə əks etdirən, yüksək poliqrafik standartlara uyğun hazırlanaraq tərtib olunan “Azərbaycan Respublikası Daxili İşlər Nazirliyinin Daxili Qoşunları - 25” kitabı işıq üzü görüb.
DİN Daxili Qoşunlarının Mətbuat xidmətindən “Bakı-Xəbər”ə verilən məlumata görə, Daxili Qoşunların keçdiyi şərəfli yol barədə nəşr olunan bu üçüncü kitabın məzmununda arxiv materiallarına, rəsmi sənədlərə, çoxşaxəli tədqiqat işlərinin nəticələrinə daha geniş istinad edilib.
Kitabda Azərbaycan Respublikası Daxili İşlər Nazirliyi Daxili Qoşunlarının ötən 25 ildə formalaşması, inkişaf mərhələləri, Vətən, xalq, dövlət və dövlətçiliyimiz naminə xidməti-döyüş fəaliyyəti, ictimai qaydaların qorunub saxlanmasında, ictimai təhlükəsizliyin təmin edilməsində, silahlı cinayətkarların zərərsizləşdirilməsində, fövqəladə hadisələrin nəticələrinin aradan qaldırılmasında, mühüm dövlət obyektlərinin mühafizəsində göstərdiyi fədakar xidmət barədə əhatəli məlumatlar və maraqlı fotolar yer alıb. Daxili Qoşunların şəxsi heyətinin torpaqlarımızın işğaldan azad olunması uğrunda erməni qəsbkarlarına qarşı döyüşlərdə göstərdiyi qəhrəmanlıq nümunələrindən də nəşrdə dolğun bəhs olunur.
Təqdim edilən yeni nəşrdə Daxili Qoşunlarda həyata keçirilən quruculuq-abadlıq işləri, hərbi qulluqçularımızın döyüş təlimləri, idman uğurları, Daxili Qoşunların həyatında əlamətdar hadisələr, beynəlxalq hərbi əməkdaşlıq tədbirləri, hərbi hissələrimizin həyatı, ayrı-ayrı xidmət sahələrinin fəaliyyəti, veteranlarımızın şəxsi heyətin hərbi-vətənpərvərlik tərbiyəsində əməyi və ictimaiyyətlə əlaqələr öz əksini tapıb.
Azərbaycan Respublikasının daxili işlər naziri, general-polkovnik Ramil Usubovun və daxili işlər nazirinin müavini - Daxili Qoşunların Komandanı, general-leytenant Şahin Məmmədovun məsləhətçiləri olduğu kitabın tərtibçi-müəllifi Mətbuat xidmətinin rəisi, polkovnik-leytenant Rəşad Sarıyev, redaktoru isə Daxili Qoşunların Veteranlar Şurasının katibi, ehtiyatda olan kapitan Yalçın Abbasovdur.
DİN Daxili Qoşunlarının Mətbuat xidməti Daxili Qoşunlar haqqında informasiya mənbəyi olan kitabın ərsəyə gəlməsində köməyini əsirgəməyən hərbi qulluqçulara və veteranlara minnətdarlığını bildirir və inanır ki, Daxili Qoşunların 25 illik salnaməsini əhatə edən yeni nəşr oxucuların ürəyincə olacaq.
