Seyid Camal Əzimbəyli: “Bu bir daha Azərbaycan dövlətinin ölkədəki hər bir vətəndaşa sahib çıxmasının əyani göstəricisidir”
Kasıbların dəfn xərclərinin Dini Qurumlarla İş üzrə Dövlət Komitəsi, daha dəqiq, komitənin tabeliyində fəaliyyət göstərəcək xüsusi fond tərəfindən ödənilməsi gözlənir. Xəbər verildiyi kimi, bu barədə komitənin sədri Mübariz Qurbanlı özü məlumat verib.
Komitə sədri bildirib ki, Azərbaycan Respublikasının Prezidenti İlham Əliyevin fərmanı ilə Dini Qurumlarla İş üzrə Dövlət Komitəsinin tabeliyində yaradılan Mənəvi Dəyərlərin Təbliği Fondunun fəaliyyəti sosial sferanın müxtəlif sahələrini də əhatə edəcək. Bu sferalara dini radikalizmdən, alkoqolizmdən, narkomaniyadan əziyyət çəkən şəxslərin cəmiyyətə yenidən inteqrasiyası, təhsil alanların sosial müdafiəsinin gücləndirilməsi, istedadlı şəxslərin təhsilini davam etdirməsinə, sosial müdafiəyə ehtiyacı olanların təhsil almasına kömək göstərmək, habelə aztəminatlı ailələrə dəfn xərclərinin ödənilməsi, Qarabağ müharibəsi və 20 Yanvar şəhidlərinin ailələrinə, müharibə əlillərinə, xəstəlik, əlillik və ya ahıllıqla əlaqədar özünəqulluq qabiliyyəti olmayan şəxslərə, valideynlərini itirməsinə və ya valideyn himayəsindən məhrum olmasına görə sosial xidmət müəssisələrində yaşamış şəxslərin həmin müəssisələri tərk etdikdən sonra yaşayış xərclərinin ödənilməsi üçün maddi yardım göstərmək də daxildir.
Xüsusən yeniyetmə və gənclərin milli-mənəvi dəyərlər ruhunda tərbiyə olunmasının aktuallıq qazandığı günümüzdə Mənəvi Dəyərlərin Təbliği Fondunun bu sahədə genişmiqyaslı fəaliyyəti böyük əhəmiyyət kəsb edir. Çünki danılmaz faktdır ki, milli-mənəvi dəyərlərimizə varislik prizmasından yanaşma həm dövlətçilik, həm də mənəvi irsimiz baxımından zəruridir.
Ümumilikdə, bu nəcib təşəbbüsə necə yanaşırlar?
Məsələyə münasibət bildirən şərqşünas Seyid Camal Əzimbəylinin sözlərinə görə, belə bir təşəbbüs olduqca təqdirəlayiq haldır: “Bu, Prezident İlham Əliyevin Azərbaycanda milli-mənəvi dəyərlərin həqiqi təəssübkeşi olmasının əyani göstəricisidir. O baxımdan bunu təqdir edir və alqışlayıram. Hesab edirəm ki, DQİDK-nın tabeliyində yaradılan Mənəvi Dəyərlərin Təbliği Fondu aztəminatlı ailələrin dəfn xərclərini öz üzərinə götürməklə çox böyük iş görmüş olacaq. Bu bir daha Azərbaycan dövlətinin ölkədəki hər bir vətəndaşa sahib çıxmasının əyani göstəricisidir. Belə bir fondun yaradılması çox müsbət haldır və şübhəsiz ki, milli-mənəvi dəyərlərin təbliğində fondun fəaliyyəti böyük əhəmiyyət daşıyacaq. Tarixən Azərbaycanda mənəvi məsuliyyət, sosial məsuliyyət ənənələri olub. Sözügedən ənənələr bu gün də yaşamaqdadır. Əvvəllər hansısa kənddə imkansız, kasıb bir adam vəfat edəndə kənd camaatı, imkanlı şəxslər yığılıb onun dəfnini təşkil edərdilər. Eyni zamanda, ailəyə yardım göstərərdilər. Eləcə də varlı, imkanlı şəxslər başqa vaxtlarda da imkansız ailələrə yardım edərdilər. Ona görə də mən bu fondun yaradılmasını alqışlayıram. Kimliyindən, siyasi əqidəsindən asılı olmayaraq, hər bir imkansız ölkə vətəndaşı bundan yararlana bilər. Aztəminatlı ailənin dəfn xərcləri dövlətin yardımı ilə ödəniləcəksə, bunu dəstəkləmək lazımdır. Nəzərə almaq lazımdır ki, ölkədə bu cür aztəminatlı ailələr var. Belə ki, onların maddi vəziyyəti bu xərcləri qarşılamaq gücündə deyil. Bununla yanaşı, sözügedən məsələ ilə bağlı mükəmməl mexanizm yaradılmalıdır. Fikrimcə, vacib məsələlərdən biri də budur. Elə etmək lazımdır ki, gələcəkdə hansısa sui-istifadə halları baş verməsin”.
Vidadi ORDAHALLI
