İlqar Orucov: “Dövlət qulluğunda çalışanlar daha çox paytaxtda yaşayan insanlardır”
“Biz istərdik ki, dövlət qulluğuna qəbul imtahanlarında iştirak edən namizədlərin sayı vakant yerlərin sayından iki dəfə çox olsun. Belə olduqda rəqabət mühiti yaranar. Amma biz bu rəqabət mühitini müşahidə etmirik”. Bunu Dövlət İmtahan Mərkəzinin (DİM) Direktorlar Şurasının sədri Məleykə Abbaszadə dövlət qulluğuna qəbul imtahanlarında uğur qazanan şəxslərə sertifikatın təqdim edilməsi mərasimində çıxış edərkən deyib.
Onun sözlərinə görə, dövlət orqanları tərəfindən DİM-ə 1461 yer təqdim olunub. M.Abbaszadə qeyd edib ki, artıq dövlət qulluğuna qəbul imtahanları hər ay keçiriləcək: “Bu, qanunvericilikdə də nəzərdə tutulub. Artıq Dövlət İmtahan Mərkəzi tərəfindən dövlət qulluğuna qəbul üçün iki imtahan keçirilib. Gələn ay B qrupu üzrə sertifikatlar imtahandan uğurla keçən namizədlərə təqdim olunacaq”. Dövlət qulluğuna marağın nə səbəbdən zəif olduğunu dəqiqləşdirmək məqsədilə ekpertə müraciət etdik.
Azərbaycan Gənc Alim, Aspirant və Magistrlər Cəmiyyətinin sədri, fəlsəfə doktoru İlqar Orucov “Bakı-Xəbər”ə açıqlamasında qeyd etdi ki, dövlət qulluğuna rəqabətin zəif olmasının bir neçə səbəbi var: “İlk olaraq bildirim ki, dövlət qulluğunda çalışanlar daha çox paytaxtda yaşayan insanlardır. O da bəllidir ki, informasiya ilə əsas olaraq paytaxt əhalisi təmin olunur. Dövlət qulluğunda əməkhaqqının yüksək olmaması bu sahədə çalışmaq istəyənlərin sayına təsir göstərir”.
Həmsöhbətimizin sözlərinə görə, dövlət qulluğunun daha aşağı pillələrində çalışan savadlı kadrlar 400-500 manat əməkhaqqı ilə sosial həyatlarını təmin edə bilmirlər: “Bu səbəbdən gənclər daha çox özəl sektora meyl edirlər. Gənclər əməkhaqqı yüksək olan yerlərdə çalışmaqda daha çox maraqlıdırlar. Bu kimi səbəblər dövlət qulluğuna sənəd verənlərin sayına təsir göstərir”.
İ.Orucov bildirdi ki, dövlət qulluğu ikipilləlidir: “Birinci mərhələni Dövlət İmtahan Mərkəzi həyata keçirir, digəri isə müsabiqə mərhələsidir. Dövlət İmtahan Mərkəzinə dövlət qulluğu ilə bağlı müraciət edən bir çox şəxslər keçirilən imtahandan razı qalıblar. Birinci mərhələdən uğurlu keçib ikincidə isə müsbət nəticə əldə edə bilməmək bu sahəyə inamsızlığa səbəb olur”.
Günel CƏLİLOVA
