Davud Rəhimli: “Əvvəlki ilə müqayisədə hüquqi baxımdan daha mükəmməldir”
Azərbaycanda sosial müdafiə sisteminin təkmilləşdirilməsi daim ön planda olub. Bunu Milli Məclisin Əmək və sosial siyasət komitəsinin sədri Hadı Rəcəbli “Dayanıqlı İnkişaf Məqsədlərinə nail olunmasında parlamentin rolu” mövzusunda keçirilən konfransda deyib.
H.Rəcəbli bildirib ki, Azərbaycanda işsizliyə görə müavinətin verilməsi 3 dəfə artıb. O qeyd edib ki, Milli Məclisdə əlillərin sosial hüquqlarının qorunması ilə bağlı qanun layihəsi hazırlanır: “Qanunun qəbulu əlillərin sosial müdafiəsini daha da yaxşılaşdıracaq”.
Məlumat üçün qeyd edək ki, Azərbaycanda əlillərlə bağlı qanun var. Bu qanun Azərbaycanda əlillərlə bağlı dövlət siyasətini müəyyən edir. Bu onların cəmiyyət həyatının iqtisadi, siyasi və sosial sahələrində başqa vətəndaşlarla bərabər iştirak etməsinə təminat verir. Azərbaycanda əlillər BMT Baş Məclisinin qəbul etdiyi əlillərin hüquq bəyannaməsində, Azərbaycan Konstitusiyasında və başqa qanunvericilik aktlarında təsbit olunmuş bütün sosial-iqtisadi, siyasi, şəxsi hüquq və azadlıqlara malikdirlər. Əlillər barəsində ayrıseçkilik qadağandır və qanunla təqib edilir. Əlillərin sosial müdafiəsinin təmin olunması sahəsində dövlət idarəetməsini Əmək və Əhalinin Sosial Müdafiəsi Nazirliyi, Səhiyyə Nazirliyi və başqa mərkəzi, yerli hakimiyyət orqanları həyata keçirirlər. Dövlət əlillərin sosial müdafiəsi sahəsində təşkilatların xarici ölkələrlə əməkdaşlığının inkişafına kömək göstərir. Müəssisələr, idarələr və təşkilatlar əlillərin problemlərinə dair dövlət siyasətinin həyata keçirilməsində iştirak edirlər.
Maraqlıdır, əlillərin sosial hüquqlarının qorunması ilə bağlı qanun layihəsində nələrin öz əksini tapacağı gözlənir?
Məsələyə münasibət bildirən Əlil Təşkilatları İttifaqının sədri Davud Rəhimli yeni qanun layihəsi ilə bağlı bir sıra məsələlərə aydınlıq gətirdi: “Azərbaycan əlilliyi olan şəxslərin hüquqları haqqında BMT konvensiyasını ratifikasiya etdikdən sonra hökumət, qeyri-hökumət və beynəlxalq təşkilatların nümayəndələri tərəfindən işçi qrupu yaradılıb. Ondan sonra belə bir qanun layihəsi hazırlanıb. Həmin qanun layihəsi BMT-nin əlilliyi olan şəxslər üzrə komitəsindən beynəlxalq ekspertizadan keçib. Aidiyyəti üzrə icra hakimiyyəti orqanlarından keçib və Nazirlər Kabinetinə təqdim olunub. Milli Məclis müzakirə etdikdən sonra qəbul olunacaq. Burada söhbət ondan gedir ki, əlilliyi olan şəxslərlə bağlı qanun 1992-ci ildə qəbul olunub. Həmin müddətdən vaxt çox keçib, qanuna çoxlu sayda əlavə və dəyişiklik edilib. Belə qərara gəlindi ki, yeni qanun layihəsi işlənsin. Burada təkcə əlilliyi olan şəxslərin sosial hüquqlarından söhbət getmir. Ümumiyyətlə, əlilliyi olan şəxslərin hüquqlarından söhbət gedir. Yeni qanun layihəsi həm müasir şəraitə, həm də BMT konvensiyasına uyğunlaşdırılıb. Əvvəlki qanun öz zamanında qəbul olunub və bir sıra tələblərə cavab vermirdi. Ancaq yeni qanun layihəsi hüquqi baxımdan daha mükəmməldir. Əvvəlki qanun sosial müdafiəyə yönəlmiş sənəd kimi qəbul olunurdu. Yəni tam hüquqi təminat üçün deyildi. Ancaq yeni qanunvericilikdə hüquqi təminatın verilməsi öz əksini tapıb. Lakin bunun icrası üçün Nazirlər Kabinetinin, digər müvafiq qurumların normativ-hüquqi sənədləri olmalıdır. Hesab edirəm ki, bütün bunlardan sonra bunun icra mexanizmi yaradılacaq. Ondan sonra sözügedən qanunun tətbiq olunmasına start veriləcək. Hesab edirəm ki, əlilliyi olan şəxslərlə bağlı qanunvericiliyin təkmilləşdirilməsi müsbət haldır”.
Vidadi ORDAHALLI
