Səadət Bənanyarlı: “Toxuculuq istehsalat sahələrinin cəzaçəkmə müəssisələrində yaradılması və qadınların bu işə cəlb olunması onların gələcək həyatına təsir göstərir”
Vaxtilə cinayət törədib həbs olunan qadınların vaxtlarını səmərəli şəkildə keçirmək üçün cəzaçəkmə müəssisələrində istehsalat sahələri yaradılır. Penitensiar Xidmətin 4 saylı qadın cəzaçəkmə müəssisəsində toxuculuq, tikiş və xalçaçılıq üzrə istehsalat sahələrini inkişaf etdirmək məqsədilə yeni xana dəzgahları quraşdırılıb və işləyən məhkumların sayı artırılıb.
Penitensiar Xidmətin saytının yaydığı məlumata əsasən, xalçaçılıq 4 saylı cəzaçəkmə müəssisəsində artıq ənənəvi peşə sahəsinə çevrilib. Mövcud imkanlar hesabına xalça toxunuşunda istifadə olunan müasir məmulatların əldə edilməsi, xüsusi tələblərə cavab verən xanaların istehsalı bu sahəni daha da genişləndirməyə, müxtəlif çeşidli xalçaların toxunmasına imkan verir.
Cəzaçəkmə müəssisəsində toxuculuq sahəsinin təkmilləşdirilməsi, xalçaçılıqla məşğul olan qadınların fəaliyyətinin düzgün istiqamətləndirilməsi məqsədilə xidmət rəhbərliyinin təşəbbüsü ilə müəssisəyə Azərbaycanın xalq rəssamı Lətif Kərimovun tələbəsi, Azərbaycan Respublikasının Rəssamlar İttifaqının üzvü, xalçaçı-rəssam Eldar Hacıyev dəvət olunub.
Hazırda məhkum qadınlar tərəfindən Azərbaycanın dünya şöhrətli şairi və mütəfəkkiri Nizami Gəncəvinin
əsərlərindəki motivlərin və obrazların əks olunduğu xalçalar toxunmağa başlanıb. Milli naxış elementləri və qədim adət-ənənələrimizi əks etdirən təsvirlərlə zəngin həmin xalçalar görünüşü, keyfiyyəti, həm də orijinallığı ilə əvvəlkilərdən fərqlənir. Xalçaçılığı daha da inkişaf etdirmək və böyük uğurlar qazanmaq üçün zəruri tədbirlər davam etdirilir.
Qadın məhbusların toxuculuq sahəsi ilə məşğul olması və onların xalçaçılığa meyl etməsi peşə öyrənmələrinə səbəb olacaq. Bunun əhəmiyyəti barədə danışan hüquq müdafiəçisi Səadət Bənanyarlı “Bakı-Xəbər”ə açıqlamasında qeyd etdi ki, tək qadın cəzaçəkmə müəssisələrində deyil, digər həbsxanalarda da istehsalat sahələri yaradılır. Məhkumların səmərəli işlə məşğul olması onların reabilitasiyası baxımından əhəmiyyətlidir: “Qadın cəzaçəkmə müəssisələrində iş yerlərinin yaradılması olduqca müsbət haldır. Qadın məhbusların işləməsi özlərinin müəyyən dərəcədə tələbatlarının ödənilməsi, ailələrinə maddi yardım göstərilməsində xüsusi rolu var. Bəllidir ki, xalçaçılıq sənəti Azərbaycanın qədim ənənəvi sahəsidir. Tarixən Azərbaycan xanımları toxuculuğun müxtəlif formalarına maraq göstəriblər. Xanımlarımız böyük həvəslə bu işlə məşğul olublar. Bu gün toxuculuq istehsalat sahələrinin cəzaçəkmə müəssisələrində yaradılması və qadınların bu işə cəlb olunması onların gələcək həyatına təsir göstərir. Onların hər hansı bir peşəni mükəmməl şəkildə öyrənmələri məhbusluq dövrü bitəndən sonra reabilatasiyalarına müsbət təsir göstərəcək. Azadlığa qovuşan məhbusların istənilən bir peşə ilə məşğul olmaları onların cəmiyyətə dönmələrində böyük əhəmiyyət kəsb edir”.
Günel CƏLİLOVA
