Vasif Akifli: “Valideynlərə əsasən “yerimiz yoxdur” cavabı verilir”
“Azərbaycanda dövlət səviyyəsində müvafiq qərara əsasən, 5-6 yaşlı uşaqlar məktəbəqədər hazırlıqla əhatə olunurlar. 0-6 yaş arasında uşaqların böyük bir hissəsi məktəbəqədər təhsildən kənarda qalır”. Bu, Təhsil İnstitutunun “3 və 4 yaşlı uşaqların məktəbəqədər təhsilə cəlb olunması layihəsi” üzrə yekun hesabatında əksini tapıb.
Hesabatda bildirilir ki, aparılan tədbirlər nəticəsində təhsil alanların sayı artsa da, hələlik bu amil arzuolunan səviyyədə deyil, digər ölkələrin göstəricilərindən geri qalır. Müasir dövrdə məktəbəqədər təhsillə bağlı mövcud problemlər də açıqlanıb. Qeyd olunub ki, 1-5 yaşlı uşaqların kənd yerlərində 7 faizinin, şəhər yerlərində isə 21 faizinin məktəbəqədər təhsil müəssisələrinə çıxışı var.
Hesabatda o da qeyd olunur ki, məktəbə hazırlıq qrupları heç də bütün uşaqların məktəbə hazırlıqla əhatəliliyini artırmır, onlar yenə də məktəbdən kənarda qalırlar. 0-6 yaş arasında uşaqların böyük hissəsinin nə səbəbdən məktəbəqədər təhsildən kənarda qalmasını öyrənmək məqsədilə ekspertə müraciət etdik.
Azərbaycan Uşaq Birliyinin koordinatoru Vasif Akifli “Bakl-Xəbər”ə açıqlamasında qeyd etdi ki, uşaqların məktəbəqədər təhsildən yayınmasının əsas səbəbi ailələrlə bağlıdır: “Valideynlər uşaqlarını məktəbəqədər təhsil müəssisələrinə yerləşdirməkdən çəkinirlər. Daha çox bu hala evin tək uşaqları ilə bağlı rast gəlinir. Onlar elə düşünürlər ki, uşaq anasından bir neçə saat ayrı qalarsa, onun başına hər hansı bir hadisə gələ bilər. Dəfələrlə biz valideynlərin uşaqların təhsildən yayınmasında rolunun olduğunun şahidi olmuşuq”.
Həmsöhbətimiz onu da bildirdi ki, bəzi ailələr uşaqlarını məktəbəqədər hazırlığa qoymaqda çətinlik çəkirlər. Valideynlər yaşadıqları ərazilərdə yerləşən bağçalara uşaq qoymaqda sıxıntı yaşayırlar: “Valideynlərə əsasən “yerimiz yoxdur” cavabı verilir. Hətta valideynlər bizə şikayət edərək bildirirlər ki, bağçalarda şəhid ailələrinin və ya milli qəhrəmanların adından istifadə edərək onlara yer vermirlər. Məktəbəqədər hazırlıq qruplarında yerin olmamasını səbəb gətirərək uşaqları qəbul etmirlər”.
Günel CƏLİLOVA
