İlqar Orucov: “Dövlət başçısının dəstəyi ilə dövlət hesabına xaricdə təhsil alan həmin gənclər ölkənin gələcəyinə xidmət edən sahələrə cəlb edilməlidirlər”
Azərbaycan elminin inkişafında gənclərin rolunun artırılması günün zəruri məsələlərindən birinə çevrilib. Məlum olduğu kimi, dövlət tərəfindən bu istiqamətdə həyata keçirilən layihələr çərçivəsində uğurlu işlər həyata keçirilməkdədir. Azərbaycanın gənc alimlərinin I qurultayının keçirilməsi bu işlərin davamı kimi qiymətləndirilə bilər.
Məlum olduğu kimi, dekabrın 15-də Azərbaycan Milli Elmlər Akademiyasının (AMEA), Təhsil Nazirliyinin, Gənclər və İdman Nazirliyinin birgə təşkilatçılığı ilə Azərbaycanın gənc alimlərinin birinci qurultayı keçirilib. Qeyd edək ki, gənc alimlərin birinci qurultayına Azərbaycan Respublikasının Prezidenti İlham Əliyev məktub ünvanlayıb.
Məlumata görə, AMEA-nın prezidenti, akademik Akif Əlizadə tədbirin Prezident İlham Əliyevin 2017-ci il 15 sentyabr tarixli Sərəncamı ilə təsdiq edilmiş “Azərbaycan gəncliyi 2017-2021-ci illərdə” Dövlət Proqramına əsasən təşkil olunduğunu bildirib. O, qurultayın intellektual gəncliklə bağlı proqramda nəzərdə tutulan vəzifələrin icrasına töhfə verəcəyinə əminliyini ifadə edib.
Akademik Akif Əlizadə müasir dövrün sosial-siyasi reallıqlarının, dünyanın yeni çağırışlarının intellektual gənclik qarşısında bir sıra mühüm vəzifələr qoyduğunu vurğulamaqla yanaşı, bildirib ki, ölkədə və xaricdə yaşayan gənc azərbaycanlı alimlərin elmi fəaliyyəti müasir tələblər səviyyəsində əlaqələndirilməli, gənclər daha geniş miqyasda elmi fəaliyyətə cəlb olunmalıdırlar. Akademiyada gənclərin intellektual potensialının inkişafı, biliklər cəmiyyətinin qurulmasında onların rolunun artırılması, sosial vəziyyətinin yaxşılaşdırılması istiqamətində bir sıra işlər görülüb. Son illər AMEA-nın 100-ə yaxın gənc aliminin dünyanın nüfuzlu elmi mərkəzlərinə ezam olunduğunu bildirən akademik prosesin hazırda da davam etdirildiyini deyib: “Gənclərimiz Dubna şəhərindəki Birləşmiş Nüvə Tədqiqatları İnstitutu, Cenevrədəki Avropa Nüvə Tədqiqatları Təşkilatı və digər beynəlxalq elmi mərkəzlərdə aparılan qlobal elmi layihələrdə yaxından iştirak edirlər. Molekulyar biologiya və biotexnologiyalar sahəsində gənc alimlərin apardığı tədqiqatlar nəticəsində Azərbaycanda ilk dəfə xüsusi bitkilərdə fitoplazma patogeni aşkar olunub, dünya elmi üçün dörd yeni genotip müəyyənləşdirilib. Onların yaxından iştirakı ilə yeni sinif unikal funksional materiallar – topoloji izolyatorlar sintez olunub, Avropa ölkələri və Yaponiyanın elmi müəssisələri ilə birlikdə tədqiq edilib”.
Azərbaycanın gənc alimlərinin birinci qurultayının böyük əhəmiyyət daşıdığını deyən fəlsəfə doktoru, AMEA-nın Gənclərin İntellektual İnkişaf Mərkəzinin rəhbəri, Azərbaycan Gənc Alim, Aspirant və Magistrlər Cəmiyyətinin sədri İlqar Orucov “Bakı-Xəbər”ə bildirdi ki, bu qurultay dövlət başçısı İlham Əliyevin elm sahəsinə böyük diqqət və qayğısının təzahürü, dövlətin elmin gəncləşdirilməsinə töhfəsidir: “2006-cı ildə gənc alimlərin ümumi toplantısı keçirilmişdi. Biz o vaxt qurultay ideyası ilə çıxış etdik. Gənc alimlərin qurultayının keçirilməsi onların həm ictimai aktivliyinin artmasına, həm də gənc alimləri narahat edən məsələlərin həllinə səbəb olacaq. Bu qurultay da gənc alimlərin istəklərinin, problem və qayğılarının müzakirə edilərək həllə doğru yönəldilməsində böyük rol oynayacaq. Gənc alimləri narahat edən problemlərin yaxın vaxtlarda aradan qaldırılacağına inanıram.
Hesab edirəm ki, gənc alimlərin qurultayında səsləndirilən ideyalar, fikirlər həyata keçirilərsə, bu müsbət olacaq. Əlbəttə, gənc alimlərə öz sözlərini deməsi üçün auditoriya lazımdır. Qurultay belə bir auditoriya ola bilir. Qurultayın keçirilməsinin əhəmiyyəti çox böyükdür. Xüsusilə də bu qurultaya cənab Prezidentin təbrik məktubu göndərməsi bir daha onu göstərir ki, bu məsələ eyni zamanda dövlət başçısının diqqətində olan bir məsələdir. Onu da deyim ki, bu cür qurultayların keçirilməsi, ümumiyyətlə, alimləri, ziyalıları əhatə edən böyük tədbirlərin düzənlənməsi cəmiyyətə mesajların ötürülməsi baxımından çox əhəmiyyətlidir. Hesab edirəm ki, qurultayda qaldırılan məsələlər dövlət sənədlərində, strategiyada və s. öz əksini tapacaq və problemlər aradan qaldırılacaq”.
İlk dəfə gənc alimlərin ümumi təşkilatlanmasının 2003-cü ildə baş tutduğunu vurğulayan İ.Orucovun sözlərinə görə, o dövrlə bu dövrü müqayisə edərkən görürük ki, gənc alimləri narahat edən xeyli sayda problem aradan qaldırılıb, xeyli hissəsi həll olunmaqdadır. “Elə proseslər var ki, onlar davamlı olaraq həyata keçirilməkdədir. Təbii, bütün bunlar onun sayəsində olub ki, həm ölkəmizin iqtisadi qüdrəti artıb, həm də ölkədə insan kapitalının inkişaf etdirilməsi ilə bağlı ölkə başçısının ortaya qoyduğu siyasi iradə mövcuddur. Eyni zamanda da gənc alimlərin öz sözünü deməsi, fikirlərini müvafiq qurumlara, mərkəzi icra hakimiyyəti orqanlarına çatdırması istiqamətində işlər görülüb. Qurultayın keçirilməsi həm ölkə başçısı tərəfindən elmə, təhsilə qayğıdır, həm də dövlət gənclər siyasətinin əsas istiqamət kimi götürülməsidir. Sevindirici haldır ki, məhz bu istiqamət I vitse-prezident Mehriban xanım Əliyevanın kurasiyasına verilib, Prezident Administrasiyasında Gənclər və idman şöbəsi yaradılıb. Bununla da gənclərin problemlərinin müvafiq qurumlara ötürüləcəyinin və onların real həllinin şahidi olacağıq. Fikrimcə, qurultayda səsləndirilən fikirlərin, eləcə də həllini tapmalı olan məsələlərin aradan qaldırılması istiqamətində real addımlar atıldığını görəcəyik. Bu qurultay ilk növbədə cənab Prezident tərəfindən son 10 ildir həyata keçirilən ölkəmizdə insan kapitalının inkişaf etdirilməsi ilə bağlı mühüm bir istiqamətin tərkib hissəsinə dəstək olacaq. Düşünürəm ki, bu, gənc alimlərin hazırlığı məsələləri, bütövlükdə gənclərin elmi biliklərə yiyələnməsi yönündə, istedadlı gənclərin gələcəkdə elmə gətirilməsi istiqamətində mühüm addımlardan biri olacaq. Bir neçə il əvvəl bir təklif etmişdim. Bu gün də o təklifi səsləndirmək istəyirəm. Elmdə zərərli qocalma tendensiyasının aradan qaldırılması üçün yenə də real işlərin həyata keçirilməsi lazımdır. Fikrimcə, bu qurultaydan sonra biz gerçək olaraq bunu görəcəyik. Bu gün elm, təhsil, texnologiya sahəsində idarəetməyə mütləq yeni nəsil gəlməlidir. Bu arada olan boşluğun doldurulması məqsədilə yaşlı nəsli əvəz edəcək kadrların yerləşdirilməsi üçün Prezident tərəfindən 2007-ci ildə imzalanan “Xaricdə Təhsil üzrə Dövlət Proqramı” çərçivəsində dünyanın nüfuzlu ali məktəblərində təhsil alan və bu gün yüksək biliklərə sahib olan gənclərin irəli çəkilməsi olduqca vacibdir. O gənclərin həm Akademiyada, həm də digər strukturlarda təmsil olunması üçün ciddi işlər görülməlidir. Dövlət başçısının dəstəyi ilə dövlət hesabına xaricdə təhsil alan həmin gənclər ölkənin gələcəyinə xidmət edən sahələrə cəlb edilməlidirlər”.
İradə SARIYEVA
