Aynur Musayeva: “Kişilər elə hesab edir ki, hər ay aliment verməkə üzərinə düşən işi həll edir, ancaq onlar düşünmür ki, qüsurlu uşağı olan ailələrin problemi heç vaxt bitmir”
Bir uşağın ailəyə gətirdiyi xoşbəxtlik müzakirə edilməzdir. Lakin körpə inkişaf edib danışmağa, yeriməyə başlayınca, ilk vərdişlərini qazandıqca övlad sahibi olmağın gətirdiyi çətinliklər də ortaya çıxmağa başlayır. Qüsurlu uşaqların valideynləri isə bu gözəllikləri eyni tərzdə və eyni tempdə yaşaya bilmir. Çünki keçirilən qəzalar, xəstəliklər və ya bəzi irsi səbəblərdən dolayı müəyyən qrup uşaqlar üçün inkişaf uzun müddəti əhatə edir.
Son dövrlər gənc ailələrdə ilk uşaq əsəbi, bəzi hallarda fiziki və əqli qüsurla doğulur. Aparılan araşdırlamalara görə, qüsurlu uşağı olan ailələrdə söz-söhbət, narazılıq tez-tez yaşanır. Çünki bu uşaqların qayğısı ilə ən çox analar məşğul olur. Təəssüf hissi ilə qeyd edək ki, bəzi atalar qüsuslu uşağa nə maddi, nə də mənəvi dəstək olur, bu məsuliyyətdən boyun qaçırırlar. Bununla da bütün yükü zərif qadının çiyinlərinə atırlar.
Təhlillər göstərir ki, müasir dövrdə ailələrin dağılmasının əsas səbəbi heç də maddi durum deyil. Erkən və qeyri-rəsmi nikahlar, uşaqların qüsurla doğulması və ya uşağın olmaması ailələrdə boşanma hallarına səbəb olur. Bu barədə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova 10 dekabr - Ümumdünya İnsan Hüquqları Gününə həsr edilmiş konfansda çıxışı zamanı danışıb. O qeyd edib ki, belə ailələrdə köməksiz qalan qadınların hüquqlarının müdafiəsi məsələni aktullaşdırır: “Hazırda dünyada ekstremizm, qarşıdurmalar ailə institutuna mənfi təsir göstərir, onu zəiflədir. Amma bununla belə, Azərbaycanda ailə institutu qorunub saxlanır. Bu gün ailə instutuna təsir edən hallar var. Bəzi hallarda ailədə ünsiyyət problemləri, sosial-psixloji mühitin gərginliyi, erkən və qeyri-rəsmi nikah, məişət zorakılığı, uşaqların təhsildən yayınması ailənin zəifləməsinə, dağılmasına gətirib çıxarır. Amma bəzən də biz valideyn və uşaqların məsuliyyət hissinin zəif olması hallarına rast gəlirik”.
Boşanmaların sayı günü-gündən artır. Boşanmalara təkcə maddiyat və ya cütlüklərin bir-birinə uyğunsuzluğu deyil, qüsurlu uşaqların da səbəb olduğunu ekspertlər təəssüf hiss ilə təsdiq edir.
“Jaləm” Uşaq İnkişaf Mərkəzinin direktoru, psixoloq Aynur Musayeva “Bakı-Xəbər”ə açıqlamasında qeyd etdi ki, bəzi ailələr maddiyatı bəhanə edərək boşanır. Ancaq əslində sonsuzluq, zorakılıq kimi faktorlar yüzlərlə ailənin dağılmasında mühum rol oynayır: "Bəzən birmənalı olaraq boşanmalarda maddi vəziyyəti səbəb göstərirlər. Maddi vəziyyət də səbəblərdən biri ola bilər, amma tək səbəb ola bilməz. Bəllidir ki, bu gün boşanmalar ötən dövlərlə müqayisədə artıb. Ancaq bu o demək deyil ki, boşananların hamısı yoxsuldur. Boşanmalara səbəb erkən nikah, zorakılıq, sonsuzluqdur.
Hansı ailədə qüsurlu uşaq varsa, əksər hallarda o evdə problemlər yaranır. Ananın o körpə üzərində əməyini, rolunu danmaq düzgün deyil. Etiraf edək ki, mində, milyonda bir ata qüsurlu övladına anasının çəkdiyi qədər əziyyət çəkə bilər. Əlil uşağını atıb gedən ana da çox nadir olur, amma atalar boşanmaqla bu məsuliyyətdən yaxa qurtarmağı asan hesab edirlər. Və beləliklə o atalar boşanaraq, ailənin bütün dərdini qadının üzərinə atırlar. Bu zaman kişi elə hesab edir ki, hər ay aliment verməklə üzərinə düşən işi həll edir. Ancaq bu belə deyil. Nəzərə almaq lazımdır ki, qüsurlu uşağı olan ailələrin problemi heç vaxt bitmir”.
Günel CƏLİLOVA
