İntiqam Hümbətov: ”Başlanan işlər sayəsində regional idarələrin fəaliyyəti yaxın gələcəkdə daha da müsbət nəticələr verəcək” Bahadur Bilalov: ”Hesab edirəm ki, cənab nazirin tələbi bu sahədə boşluqların aradan qaldırılmasına yönəlib”
Regionların inkişafı, mədəniyyət və turizm potensialının üzə çıxarılması istiqamətində bir sıra layihələr həyata keçirilib. Bölgələrdə turizm infrastrukturunun daha yüksək səviyyəyə çatdırılması qarşıda duran əsas vəzifələrdən biri kimi diqqət çəkir. Regional Mədəniyyət və Turizm İdarələri yeni institut olmasına baxmayaraq, yarandığı qısa müddət ərzində bölgə mədəniyyətinin, turizminin inkişafı istiqamətində xeyli işlər görüb. Sözsüz ki, görülən işlər hələ yetərli deyil və bu qurumlar fəaliyyətində daha böyük dönüşlər etməlidir. Bu fikir
dekabrın 15-də Sabirabad şəhərindəki Heydər Əliyev Mərkəzində nazir Əbülfəs Qarayevin iştirakı ilə keçirilən regional mədəniyyət və turizm idarələrinin fəaliyyətinə həsr olunan geniş tərkibli müşavirədə səslənib.
Nazirliyin rəsmi saytında qeyd edilir ki, tədbirdə 2017-ci ilin yanvarından fəaliyyətə başlayan regional idarələrin əldə etdiyi nəticələr təhlil edilib və qarşıda duran vəzifələr müzakirə olunub.
Mədəniyyət və turizm naziri Əbülfəs Qarayev müşavirədə mədəniyyət və turizm sahəsində həyata keçirilən islahatlar haqqında danışıb. Nazir bildirib ki, ölkəmizdə müxtəlif beynəlxalq tədbirlər keçirilir, respublikamıza gələn turistlərin sayı getdikcə artır: “Yeni yaradılan regional mədəniyyət və turizm idarələri bu tədbirlərə öz töhfələrini verməli, ölkəmizin mədəni, tarixi dəyərlərinin, turizm imkanlarının xarici qonaqlara tanıdılması və təbliği işində yaxından iştirak etməlidir”.
Nazir regionlarda mədəniyyət və turizm xidmətlərinin müasir tələblər səviyyəsində qurulmasının əhəmiyyətini qeyd edərək bildirib ki, regionlarda mədəni xidmətlərin səviyyəsinin artırılması, konsertlərin təşkili, kino nümayişinin genişləndirilməsi vacibdir. Bu məqsədlə regionlarda çalışan işçilər üçün müvafiq təlimlər, ixtisasartırma kursları təşkil olunacaq, əməkdaşların müasir informasiya texnologiyalarından istifadəsi üzrə bilikləri genişləndiriləcək. Bu istiqamətdə ortaya çıxan çətinliklərin həll edilməsi, müvafiq sənədləşmə işlərinin düzgün həyata keçirilməsi, müraciətlərə baxılması və vaxtında öz həllini tapması diqqətdə saxlanmalıdır.
Həmçinin nazir idarə rəhbərlərindən işlərinə daha ciddi yanaşmağı tələb edib və onların səmərəli fəaliyyət göstərməsi üçün tapşırıqlar verib.
Mədəniyyət və Turizm Nazirliyinin İctimaiyyətlə əlaqələr və mətbuatla iş sektorunun müdiri İntiqam Hümbətov “Bakı-Xəbər”ə açıqlamasında bildirdi ki, dekabrın 27-də Mədəniyyət və Turizm idarələrinin daha geniş müşavirəsi keçiriləcək bu burada daha mühüm məsələlər müzakirə ediləcək:”Bu iclas mətbuata açıq olacaq. Sabirabadda keçirilən müşavirəyə gəlincə, deyə bilərəm ki, bu qurumların 1 illik fəaliyyəti üçün uğurlu nəticələrin əldə olunduğu təsdiqləndi. Bilirsiz ki, bu sahədə islahatlar həyata keçirilib və islahatlar nəticəsində 65 rayonda mədəniyyət və turizm şöbəsi ləğv olundu. 1 il əvvəl 15 regional Mədəniyyət və Turizm İdarəsi və Bakı Şəhər Mədəniyyət və Turizm Baş İdarəsi fəaliyyət göstərməyə başladı.
Dekabrın 15-də Sabirabad rayonunda nazirliyin səyyar qəbulundan sonra orada region idarələrinin fəaliyyətinə həsr olunan 1 illik fəaliyyətin yekunları ilə bağlı müşavirə keçirildi. Müşavirədə müvafiq qurumların rəhbərlərinin məlumatları dinlənildi, nazirliyin regionlarla iş bölməsinin rəhbəri bu barədə geniş məlumat verdi. 1 il ərzində Regional Mədəniyyət və Turizm idarələrinin fəaliyyəti ətraflı təhlil olundu. Cənab nazir də bununla bağlı öz fikirlərini bildirib. Təbii ki, çox ciddi islahatdan sonra 1 illik fəaliyyətə ilkin baxış idi ki, fəaliyyətin nəticələri müsbət dəyərləndirildi. Çünki demək olar ki, daha praqmatik, daha çevik idarəetmə vasitəsilə bu 1 il ərzində yerlərdə təşəbbüslər qiymətləndirib, mədəniyyət və turizmin inkişafı ilə bağlı çoxşaxəli tədbirlər həyata keçirilməyə başlayıb. Çox güman ki, başlanan işlər sayəsində regional idarələrin fəaliyyəti yaxın gələcəkdə daha da müsbət nəticələr verəcək”.
Turizm və Menecment Universitetinin kafedra müdiri, turizm üzrə tanınan ekspert Bahadur Bilalov bizimlə söhbətində nazirin bu qurumlar qarşısına qoyduğu tələblərin uğurla həll edilməli olduğunu deyir:”Hesab edirəm ki, cənab nazirin tələbi bu sahədə boşluqların aradan qaldırılmasına yönəlib. Həqiqətən də Mədəniyyət və Turizm Nazirliyinin Regional idarələri region ərazisindəki tarixi və mədəni abidələri, bölgədə yaşayan əhalinin adət-ənənələrini, folklorunu öyrənməli, çalışdıqları regionun turizm potensialını araşdırmalı, onları təbliğ etməlidir. Bütün bunlar isə regionlara həm daxili, həm də xarici turistlərin axınına səbəb olan amillərdən hesab edilir”.
İradə SARIYEVA
