Lerik rayonunda əzəmətli Talış dağlarının qoynunda bir kənd var. Adına Rvarud deyirlər. Azərbaycanın kiçik bir parçası olan bu yurd yerinin gözəl, qəribə mənzərələri çoxdur. Təbiəti kimi insanları da safdır. Vətəni sevmək, el-obaya bağlılıq, qayğıkeşlik rvarudlulara ululardan gəlmə adətdir. Kənddə hansı qapını açsan halal süfrə görərsən.
Bu günlərdə yolum kəndə düşmüşdü. Kəndin ən yaraşıqlı yerində ucaldılan abidə kompleksi diqqətimi çəkdi.
Bu mərdlər diyarı Qarabağ savaşında 3 şəhid verib. Abidə kompleksi yaxın günlərdə elə onların əziz xatirəsinə ucaldılıb. Kəndin birinci şəhid övladı Səxavət Əbi oğlu Hacıyevdir. O, Bakı Politexnik Texnikumu bitirmişdi. Vətənini canından əziz tutan Səxavət mənfur ermənilərin Azərbaycan torpaqlarına göz dikdiyi vaxtdan könüllü olaraq ordu şoralarına gedib. Naxçıvan Muxtar Respublikasının Sədərək döyüşlərində iştirak edib və şücaət göstərib. 1993-çü ildə Ağdərə uğrunda gedən amansız qanlı döyüşlərdə qəhrəmanlıq nümunəsi göstərib. 25 yanvarda vətənin igid oğlu Səxavət 27 yaşında həlak olaraq əbədiyyətin ən uca, əlçatmaz, ünyetməz zirvəsinə ucalır. 1974-1984-cü illərdə təhsil aldığı məktəb onun adını daşıyır.
Adı kənd mədəniyyət evində əbədiləşən Etiqad Balaxan oğlu Hacıyev bu dağlar diyarının ikinci şəhididir. Elinə, vətəninə, torpağına ürəkdən bağlı olan Etiqad 18 yaşında ordu siralarında tankçi kimi xidmətə başlayıb, Ağdamın Quzanlı, Mərzili kəndlərin müdafiəsində xüsusi mərdlik və qəhrəmanlıqla ad qoyub. Təəssüf ki, qəfil atəşlərdən biri 5 iyul 1993-çü ildə 19 yaşında Etiqadın döyüş yolunu yarıda qoyur...
Kəndin vətənpərvər övladı Mübariz Ağakişi oğlu Həsənov vətənin ağır günlərində könüllü olaraq ordu sıralarına gedib, 1994-cü ildə Ağdam istiqamətində gedən döyüşlərdə vətən torpaqların müdafiəsi naminə canında keçib. Onun 25 illik həyat yolu gənclərə gözəl örnəkdir.
Bəli, Rvarudda vətənin azadlığı naminə şəhid olan qəhrəman övladların ruhuna böyük ehtiram olaraq belə bir möhtəşəm abidə kompleksi tikilib. Şəhidlərin xatirəsini yaşatmaq hər bir vətəndaşın borcudur. Onu da deyim ki, buraya kəndin İkinci Dünya Müharibəsində həlak olan, itkin düşən sakinlərinin də adları həkk olunub. Abidə kompleksini sadə zəhmət adamı Mübariz Hacıyev öz alın təri hesabına qazandığı vəsaiti ilə ucaldıb. Hazırda kənd camaatının daha müqəddəs saydığı yer məhz buradır.
Zəfər ORUCOĞLU, Azərbaycan Jurnalistlər Birliyinin üzvü
