Ölkəmizdə polis veteranları ictimaiyyətlə, orta məktəb şagirdləri ilə sıx təmasda olur, onlara öz dəyərli tövsiyələrini verirlər. Belə görüşlərdən biri bu yaxınlarda Rayon Polis İdarəsinin rəhbərliyinin təşəbbüsü ilə paytaxtın Nərimanov rayonundakı 57, 212 və 258 saylı tam orta məktəblərdə gerçəkləşib. Polis əməkdaşları və veteranlar şagirdlərlə “Narkomaniya ümumbəşəri bəladır”, “Uşaq hüquqlarının qorunması dövlətin əsas vəzifəsidir” mövzularında ətraflı söhbətlər aparıblar.
Bu tədbirlərdə çıxış edən RPİ-nin rəisi, polis polkovniki Nəriman İmanov ölkənin hər yerində narkomanlığa qarşı mübarizənin gücləndirilməsi, narkomanlığa düçar olmuş şəxslərin sağlam həyata qaytarılması və digər məsələlərlə bağlı qarşıda ciddi vəzifələr olduğunu qeyd etdi. Bildirdi ki, ölkəmiz müstəqillik əldə etdikdən sonra bir sıra problemlər kimi narkomaniyaya qarşı mübarizə tədbirlərinin görülməsinin vacibliyi ön plana çıxıb və problemə münasibətdə yeni mərhələ başlanıb.
Azərbaycan Respublikası bu sahədə həmçinin müvafiq beynəlxalq sənədlərə və təşəbbüslərə də qoşulub. Möhtərəm dövlət başçısı bu strateji kursu prioritet istiqamətlərdən biri kimi davam etdirərək, narkomanlıqla mübarizədə müsbət nəticələrin əldə edilməsi məqsədilə “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizəyə dair 2013-2018-ci illər üçün Dövlət Proqramı”nı təsdiq edib. N.İmanov daha sonra narkomaniyanın cəmiyyətimizə, dövlətimizə və ümumilikdə bəşəriyyətə böyük miqyasda fəsadlar vurduğunu, narkomaniyaya qarşı mübarizədə dövlət qurumlarının, ictimaiyyət nümayəndələrinin, pedaqoji işçilərin, valideynlərin, eləcə də cəmiyyətin hər bir üzvünün fəal mövqe tutmasının zəruriliyini vurğulayıb. Qeyd edib ki, narkomaniya ilə mübarizə və onun profilaktikası vacib məsələlərdən olmaqla yanaşı, bu gün gənclərin formalaşması, onların sağlam böyüməsində ən mühüm amillərdən biridir.
Daha sonra çıxış edən Bakı şəhər Baş Polis İdarəsinin Veteranlar Şurasının sədri Emin Məmmədov, Nərimanov Rayon Polis İdarəsinin Veteranlar Şurasının sədri Paşa Kərimov, Yetkinlik Yaşına Çatmayanlarla Profilaktik İşin Təşkili Bölməsinin rəisi, polis mayoru Rüstəm Rüstəmov və Veteranlar Şurasının üzvləri Əsgərağa Hüseynov, Nadir Məmmədov, Adil Sərdarov, Vahid Salmanov və Cavanşir Çakərzadə bildirdilər ki, bəşəriyyətin gələcəyi üçün dəhşətli bəlalardan olan narkomaniyaya qarşı mübarizədə yalnız dövlətin deyil, eləcə də cəmiyyətin hər bir üzvünün fəal rol oynaması çox zəruridir.
Narkomaniyanın heç bir yaş həddi tanımayaraq cavanlaşması və genofond üçün böyük təhlükə olduğunu bildirən natiqlər yeniyetmələrə narkomanlardan uzaq durmaq və cəmiyyətdə bu bəlaya qarşı mübarizə aparmaq üçün tövsiyələr, dəyərli məsləhətlər verdilər.
Tədbirə yekun vuran rəis, polis polkovniki Nəriman İmanov daxili işlər orqanlarının qarşısında duran vəzifələrin yerinə yetirilməsində, hüquqi biliklərin təbliğində, cinayətlərin açılmasında, profilaktikasında, təhlükəsizliyin təminində veteranların təcrübəsindən, ictimai nüfuzundan, bilik və bacarıqlarından bundan sonra da yararlanacaqlarını vurğuladı.
Xəyalə Məmmədova, DİN Mətbuat Xidmətinin əməkdaşı
