İlqar Hüseynli: “Nəticədə yerli özünüidarəetmə orqanları vətəndaşlara daha keyfiyyətli xidmət göstərəcəklər”
Xəbər verildiyi kimi, bəzi yollarda avtomobillər üçün ayrılmış parklanma yerlərindən əldə olunan vəsait bələdiyyələr tərəfindən toplanacaq. Bununla bağlı “Bələdiyyələrin maliyyəsinin əsasları haqqında” Qanunun 7-ci (Yerli büdcənin gəlirləri) maddəsinə əlavələr edilir.
Layihəyə görə, maddədə yerli büdcənin gəlirləri sırasına “bələdiyyə yollarında təşkil edilmiş parklanma yerlərindən daxil olan vəsait” də əlavə edilir. Buna uyğun olaraq “Avtomobil yolları haqqında” Qanuna dəyişikliklər də müzakirəyə çıxarılır.
Layihə Milli Məclisin dekabrın 15-də keçiriləcək plenar iclasında müzakirəyə çıxarılacaq.
Onu da qeyd edək ki, “Yol hərəkəti haqqında” Qanunun 53-cü maddəsində bununla bağlı qaydalar öz əksini tapır. Həmin maddəyə əsasən, dövlət avtomobil yollarında parklanma yerləri müvafiq icra hakimiyyəti orqanlarının təklifləri əsasında, müvafiq icra hakimiyyəti orqanının müəyyən etdiyi siyahıya uyğun olaraq təşkil edilir.
Parklanma yerləri bələdiyyə yollarında bələdiyyələr, özəl avtomobil yollarında isə mülkiyyətçi tərəfindən müvafiq icra hakimiyyəti orqanı ilə razılaşdırılmaqla təşkil edilir. Parklanma yerində nəqliyyat vasitələri yolun hərəkət hissəsinə paralel şəkildə parklanır. Yolun hərəkət hissəsinin eni nəzərə alınmaqla parklanma yerində nəqliyyat vasitələrinin yolun hərəkət hissəsinin kənarına bucaq altında parklanması nişanlama xətləri ilə müəyyən edilə bilər.
Bütün bu deyilənlərin fonunda, bəzi yollarda avtomobillər üçün ayrılmış parklanma yerlərindən əldə olunan vəsaitin bələdiyyələr tərəfindən toplanması bələdiyyələrin cəmiyyətdə nüfuzunun artmasına necə təsir göstərəcək?
Məsələyə münasibət bildirən ekspert İlqar Hüseynlinin sözlərinə görə, parklama yerlərində əldə olunan vəsaitin bələdiyyələr tərəfindən toplanması yerli özünüidarəetmə qurumlarının cəmiyyətdə nüfuzunu artıracaq: “Məlum olduğu kimi, bələdiyyələrin səlahiyyətlərinin artırılması yenidən gündəmə gəlib. Ölkədə 1999-cu ildə yaradılan və ilk dəfə seçkilər keçirilən bələdiyyələr tam səlahiyyətli qurum sayılmır. Yerli özünüidarəetmə orqanlarına səlahiyyət verilsə də, bəzi hallarda bu qurumlar icra hakimiyyətlərinin əlavəsi kimi fəalliyyət göstərirlər. O baxımdan görülən tədbirləri müsbət dəyərləndirirəm. Yollarda avtomobillər üçün ayrılmış parklanma yerlərindən əldə olunan vəsaitin bələdiyyələr tərəfindən yığılması yerli özünüidarəetmə orqanlarının səlahiyyətlərinin bir qədər genişləndirilməsinə xidmət edir. Bu minvalla həm də bələdiyyələr digər qurumların yükünü bir qədər azaldırlar. Ona görə də yerli özünüidarəetmə orqanlarının səlahiyyətlərinin artırılması müsbət addımdır. Bu, bələdiyyələrin maliyyə vəziyyətinin yaxşılaşmasına müsbət təsir göstərəcək. Nəticədə bələdiyyələr vətəndaşlara daha keyfiyyətli xidmət göstərəcəklər. Digər tərəfdən, konkret səlahiyyət olmayanda qurum formal təsir bağışlayır. Bu da, istər-istəməz, bələdiyyələrin cəmiyyətdə nüfuzuna mənfi təsir göstərir. O üzdən, bələdiyyələrə yeni səlahiyyətlərin verilməsi həm maddi, həm də mənəvi baxımdan yerli özünüidarəetmə orqanlarının xeyrinədir. Başqa bir tərəfdən, bələdiyyələrə məqsədli transferlər ayrılarsa, o zaman yerli özünüidarəetmə orqanlarının maliyyə imkanları əhəmiyyətli dərəcədə genişlənə bilər. Hesab edirəm ki, bu kimi məqamlara da diqqət edilməlidir. Bu da vacib faktorlardan biridir”.
Vidadi ORDAHALLI
