Aynur Əliyeva: “Arıqlamaq üçün düzgün qidalanmaq, yağlı yeməklərdən uzaq durmaq və mümkün qədər çox hərəkət etmək lazımdır”
Artıq çəkidən azad olmaq və həmişə formada qalmaq hər bir qadının arzusudur. İndi xanımlar arıqlamaq üçün müxtəlif üsullardan istifadə edirlər. İdmanla məşğul olmaq və ya pəhriz saxlamaq əvəzinə, daha rahat üsulu seçən qadınlar az deyil. Bu xanımlar əsasən arıqlama dərmanlarına üstünlük verirlər. İstənilən aptekdə sərbəst şəkildə bu dərmanları əldə etmək mümkündür.
Bu gün arıqlamaq istəyən xanımların, demək olar ki, əksəriyyəti müxtəlif firmaların istehsalı olan arıqlama preparatlarından istifadə edirlər. Onu da qeyd edək ki, bu dərmanların insan orqanizminə nə kimi fəsadlar verəcəyi barədə tək yerli mütəxəssislər deyil, əcnəbilər də dəfələrlə fikir bildiriblər.
Tibb üzrə fəlsəfə doktoru Yazgül Abdiyeva media nümayəndələrinə açıqlamasında bildirib ki, arıqlama dərmanları vasitəsilə çəkini azaltmaq məsləhət deyil. Çünki həmin dərmanların istifadəsi bir sıra fəsadlar törədə bilər: “Dərmanı qəbul edəndən sonra preparat mədədə parçalanır və mərkəzi sinir sisteminə toxluq siqnalı gedir. Amma, əslində, insan özü ac olur. Bu dərmanlar əsasən on beş gün, ya da bir ay qəbul edilir. Həmin müddət ərzində adam özünü tox hiss edir, yemək yemir və arıqlayır. Amma dərmanın qəbulu bitəndən sonra yenə aclıq hissi yaranır, insan əvvəlki kimi yeyir. Nəticədə kiçilmiş mədə yenidən böyüyür. Bu preparatlar sinir sistemində, mədə-bağırsaqda problemlər yarada bilər. Bu dəmanlardan istifadə edənlər arasında daha çox sinir sistemi pozuntularına və mədədə yara hallarına rast gəlinir. Arıqlama dərmanları qadınlarda ginekoloji xəstəliklərə, sonsuzluğa, hətta xərçəngə, böyrək çatışmazlığı kimi ağır xəstəliklərə səbəb ola bilər. Bütün arıqlama dərmanları psixozlar, asılılıq, baş ağrıları, aritmiya (nəbzin qeyri-müntəzəmliyi) yaradır. Onlardan istifadə hətta ürək tutmaları və infarkta da gətirib çıxara bilər”.
Dietoloq Aynur Əliyeva bizimlə söhbətində qeyd etdi ki, arıqlama dərmanları vasitəsilə çəki atmaq düzgün deyil. Onun sözlərinə görə, arıqlama prosesləri xüsusi proqramlar əsasında həyata keçirilməli və həkim nəzarəti altında aparılmalıdır. Həkim nəzarəti olmadan gün ərzində bir və ya iki həb içməklə artıq çəki atılmır: “Sadəcə, müəyyən müddət o insan elə biləcək ki, onun çəkisində dəyişiklik baş verib. Bu tip dərmanlar piylərin həddən artıq yanmasına, toxluq hissi yaratmağa, iştahın azalmasına xidmət edir. Bəziləri isə süni sürətdə bədəndə katobalizmi gücləndirir, orqanizmdə maddələr mübadiləsini sürətləndirdiyindən, daha çox yağlar sərf olunur, qida maddələrinin sorulmasına təsir göstərir. Bu vasitələrin bəziləri isə oyandırıcı təsirə malikdirlər. Bu dərmanlar orqanizmdə duz mübadiləsini pozur, uzun müddət ishal yaradır, bağırsaqdan sorulmanın qarşısını alır. Qidalanma düzgün olmadıqda orqanizmdə əvəz olunmayan amin və yağ turşusunun konsentrasiyası aşağı düşür. Bu zaman psixi təsirlər də baş verir və onların çoxu bərpa olunmur”.
Həmsöhbətimizin sözlərinə görə, öncə arıqlamaq üçün iradəni gücləndirmək, düzgün pəhriz saxlamaq və fiziki hərəkətlə məşğul olmaq lazımdır. Orqanizmdə toxluq hissi yaratmaq üçün yeməkdən əvvəl ilıq su içmək məsləhətdir. Bu, mədədə toxluq hissi yaradır və insan az yeməyə meyllənir.
A.Əliyeva onu da bildirdi ki, idmansız və düzgün qidalanmadan artıq çəkidən azad olmaq mümkün deyil: "Bəziləri düşünürlər ki, dərman içməklə arıqlamaq olar. Bu mümkün deyil. Arıqlamaq üçün düzgün qidalanmaq, yağlı yeməklərdən uzaq durmaq və mümkün qədər çox hərəkət etmək lazımdır”.
Günel CƏLİLOVA
