Şəmsəddin Əliyev: “Yeniliklər qəbul olunsa, polisin bu sahədə çevik reaksiya göstərməsi təmin ediləcək”
Azərbaycanda polisin ictimai qaydanı və təhlükəsizliyi təmin etmə ilə bağlı hüquqları artırılır. Belə ki, sözügedən məsələ ilə bağlı “Polis haqqında” Qanunun 18-ci (İctimai qaydanın və ictimai təhlükəsizliyin təmin edilməsi sahəsində polis əməkdaşının hüquqları) maddəsinə dəyişiklik təklif edilir. Həmin dəyişikliyə əsasən, inzibati xəta törətmiş şəxs barəsində eyni zamanda axtarış aparmaq da polisin hüquqlarına aid olacaq.
Layihə Milli Məclisin dekabrın 15-də keçiriləcək plenar iclasında müzakirəyə çıxarılacaq.
Onu da qeyd edək ki, zaman-zaman qanuna müəyyən dəyişikliklər edilərək polisə bir sıra səlahiyyətlər verilib. Müşahidələr göstərir ki, polisə əlavə səlahiyyətlərin verilməsi operativliyi daha da artırıb. Ümumən bu istiqamətdə görülən işlərə müsbət təsir göstərir. Yəni bunun nəticəsində polis qanun çərçivəsində işini daha yüksək peşəkarlıqla görür. Bütün bunlar ölkədə cinayətkarlıqla mübarizəyə, ictimai asayişin təmin olunmasına öz müsbət təsirini göstərir. Bu baxımdan inzibati xəta törətmiş şəxs barəsində eyni zamanda axtarış aparmaqla da bağlı polisin hüquqlarının genişləndirilməsi təşəbbüsünə ekspertlər necə yanaşırlar?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyev buna müsbət prizmadan yanaşdı. O bunu bir sıra arqumentlərlə əsaslandırdı: “Azərbaycan müstəqillik əldə etdikdən sonra polisin cinayətkarlıqla mübarizə istiqamətində, polisin fəaliyyətində zaman-zaman islahatlar həyata keçirilib. Bunları da həmin islahatların davamı kimi dəyərləndirmək lazımdır. Təbii ki, bu gün ictimai münasibətlərə zidd olan hər cür hərəkətlərin qarşısının alınmasında, hətta şəxsiyyəti bəlli olmayan subyektlərin şəxsiyyətinin müəyyən edilməsində polisin fəaliyyəti danılmazdır. Bütün bunlara baxmayaraq, əvvəllər inzibati xətalarla bağlı polisin bu istiqamətdə səlahiyyətlərinin olmaması və yaxud da buna o qədər də önəm verilməməsi müəyyən boşluqlar yaradırdı. Yəni sonradan bu inzibati xətaların subyektlərinin cəzasızlıq mühitindən, o tənbehin yumşaqlığından sui-istifadə edib cinayət hallarına meyl etməsi halları var idi. Bu da, təbii ki, müəyyən narahatlıq yaradırdı. O baxımdan hesab edirəm ki, “Polis haqqında” Qanunun 18-ci maddəsinə dəyişiklik edilməsi təklifi təqdirəlayiqdir. Bunu polisin ictimai münasibətlərə zidd olan halların, inzibati xətaların, cinayət əməllərinin həm qarşısının alınmasında, həm də baş verən halların aşkar edilməsi istiqamətində həyata keçiriləcək önəmli addımı kimi qəbul etmək lazımdır. Bununla yanaşı, yeniliklər qəbul olunsa, polisin bu sahədə çevik reaksiya göstərməsi təmin ediləcək. Bütün bunlarla yanaşı, düşünürəm ki, bu, dövlətin cinayətkarlıqla mübarizə siyasətinin təzahürüdür. Fikrimcə, bu, polisin səlahiyyətlərinin artırılmasında mühüm rol oynaya bilər. Bu da, nəticə etibarilə ümumi işin xeyrinə olacaq. Ona görə də qaldırılan təşəbbüsü məqsədəuyğun hesab edirəm”.
Vidadi ORDAHALLI
