Ötən gün Qubadlı rayonundan olan 40-a yaxın məcburi köçkün yaşadıqları ərazidən qanunsuz çıxarılmaları ilə bağlı Beynəlxalq Mətbuat Mərkəzində mətbuat konfransı keçirdilər.
Qubadlı rayonundan olan Yadulla Cümşüdov çıxış edərək bildirdi ki, məcburi köçkün düşdükdən sonra 1994-cü ildən adıçəkilən rayondan olan 40-a yaxın məcburi köçkün Sumqayıt şəhəri 20/21-ci mikrorayon, ev 777 ünvanında məskunlaşmışlar. Ancaq 23 il keçəndən sonra bir qrup şəxs onları yaşadıqları evdən çıxarıblar: “Məcburi köçkün düşdükdən sonra, 1994-cü ilin avqustundan bu ərazidə öncə çadırda yaşadıq. 24 sot boş torpaq sahəsi idi, 1 il 2 ay bu torpaqda çadırda yaşamışıq. Biz orada yaşamağa başlayan zaman Seyidqulu Muradov adlı yaşlı kişi ora gəldi, dedi ki, burada məcburi köçkünlərin məskunlaşdığını eşidib, bu yer sənədlə onun adınadır, xeyir-dua verməyə gəlib. Mən bu torpağa ona 130 min manat verdim, 5 min manat da borclu qaldıq. Sonra o pulu da aldı. Ancaq biz sonradan onun müqaviləsinə baxanda gördük ki, bu, icarə müqaviləsidir, müddəti 1995-ci ildə bitib, Seyidqulu Muradov bizi aldadıb. Sonra kişiyə dedik ki, pulu qaytar, qaytarmadı, dedi ki, pulu xərcləyib. Bu torpaqlar 2000-ci ildən Sumqayıt Şəhər Bələdiyyəsinin balansına verilib. 2004-cü ildə bələdiyyə bizə təklif etdi ki, şəhərdə yaşayan qohumlarımızın adına bu 24 sot torpağı alaq, 4 yerə bölək. Həmin torpağı 1950-60-cı illərdən Sumqayıtda yaşayan qohumlarımızın adına aldıq. 2004-cü ildə hər 6 sotu üçün 1 milyon 500 min manat ödədik. Bələdiyyənin sənədlərində bununla bağlı möhürü də var. 2015-ci ilin dekabrında Seyidqulu Muradov bizimlə bağlı Sumqayıt Şəhər Məhkəməsinə müraciət etdi, məhkəmə iddianı rədd etdi. Məhkəmədə onların nümayəndələri çıxış etdilər. Fevralda isə qarşı tərəf Sumqayıt Apelyasiya Məhkəməsinə müraciət etdi. Sumqayıt Apelyasiya Məhkəməsi 7 aydan sonra qarşı tərəfin iddiasını təmin etdi. Biz o məhkəmədə iştirak etməmişik. Sonradan biz 2016-cı ilin sonlarında Ali Məhkəməyə müraciət etdik. Ali Məhkəmə həmin ilin noyabrında yenə qarşı tərəfin iddiasını təmin etdi. Konstitusiya Məhkəməsinə müraciətimizə isə mülki iş olduğu bildirilərək baxılmadı, ancaq biz Konstitusiya Məhkəməsinə mülki iddia yox, insan hüquqlarının pozulması iddiası ilə müraciət etmişdik. Hazırda işin yeni halları yaranıb, ancaq şikayət müddətinin keçdiyi əsas gətirilərək Ali Məhkəmənin Plenumu məsələyə baxmır”.
Y.Cümşüdov bildirdi ki, S.Muradov 2017-ci il aprelin 14-də vəfat edib və hazırda torpağa onun oğlu Murad Muradov iddia edir: “Biz hazırda məhkəmə qərarının icrasının dayandırılmasını, işdə yeni hallar yarandığı üçün məsələyə Ali Məhkəmənin Plenumunda baxılmasını istəyirik. Bununla bağlı dövlət başçısına, aidiyyəti dövlət qurumlarına da müraciət edib dəstək istəmişik”.
Y.Cümüşüdov və 40-a yaxın məcburi köçkün yaşadıqları çətinliklərin tezliklə həll olunması üçün Prezident İlham Əliyevə müraciət ünvanlayıblar. Müraciətdə deyilir: “Cənab Prezident, Sizdən xahiş edirik ki, haqqımızda keçirilən silsilə məhkəmələrin qanunsuz və ədalətsiz qətnamələrinin icrasının dayandırılmasına, prosesin Sizin nəzarətinizlə yenidən araşdırılmasına, Ali Məhkəmənin Plenumuna verdiyimiz şikayət məktubunun icraata qəbul olunmasına və dövlətimizin bu gərgin dönəmində bizim üçün süni şəkildə yaranmış problemimizin ədalətlə həll olunmasına köməklik göstərəsiniz”.
Torpağa iddiada adı çəkilən Murad Muradovun bacısı oğlu olduğunu bildirən Elvin Əhmədov APA-ya açıqlamasında bu sahədə biliyi ilə əlaqədar zərərçəkmiş şəxsin məhkəmələrdə nümayəndəsi kimi çıxış etdiyini, qardaşı Elçinin isə, ümumiyyətlə, məhkəmə proseslərinə qatılmadığını nəzərə çatdırıb: “Seyidqulu Muradov babamız olub. 1965-ci ildə Sumqayıt Şəhər İcraiyyə Komitəsi tərəfindən icarə müqaviləsi ilə həmin torpaq sahəsi Seyidqulu Muradova verilib. 1985-i ilə qədər müqavilənin müddəti uzadılıb. 1991-ci ilə qədər həmin torpaqlara vergi ödənilib. İcarə müqaviləsində yazılıb ki, müqavilənin müddəti qurtarırsa, tərəflərdən hər hansı biri müqavilənin ləğvi ilə bağlı məhkəməyə müraciət etmirsə, müqavilənin müddəti avtomatik olaraq 10 il müddətinə uzadılır. 1997-ci ildə dövlət başçısının imzaladığı 337 saylı Fərmanla bu torpaq əvəzsiz olaraq Seyidqulu Muradovun mülkiyyəti olub. Ona görə də bu torpağa iddiamızın əsassız olması barədə qarşı tərəfin fikri yanlışdır. 1994-cü ildə deyil, 2010-cu ildə həmin Yadulla Cümşüdov, 3 oğlu, anası ora gəlib. O insanların orada 2010-cu ildə məskunlaşdıqlarını təsdiqləyən sənədlər var. Qaçqınların və Məcburi Köçkünlərin İşləri üzrə Dövlət Komitəsinin Sumqayıtdakı orqanı, Sumqayıt Şəhər Bələdiyyəsi, Qubadlı Rayon İcra Hakimiyyəti də bunu təsdiqləyən arayışlar veriblər və bu arayışlar tərəfimizdən məhkəməyə təqdim edilib. 1985-ci ildə babamız o torpaq sahəsində birmərtəbəli, ikiotaqlı ev tikib, o insanlar da 2010-cu ildə bu evdə müvəqqəti yaşamağa icazə istəmişdilər. 2013-cü ildə isə onlar həmin birmərtəbəli, ikiotaqlı evi söküb, yerində yeni evlərin tikintisi üçün bünövrə qoymağa başlayıblar. Biz yeni evlərin tikilməsindən xəbər tutduqda 2014-cü ildə məhkəməyə müraciət etdik. Babam Seyidqulu Muradov sağlığında bu torpaqlara mülkiyyət hüququnu təsdiq edən çıxarış, “kupça” alıb. Y.Cümşüdovun 2004-cü ildə Sumqayıt Şəhər Bələdiyyəsindən həmin torpağı alması barədə söylədikləri də yalandır və bu, məhkəmədə təsdiqini tapıb. Sadəcə, həmin vaxt torpağı almaq üçün üstünlük əldə etmək üçün bələdiyyəyə ödəniş edib, ödənişin qəbzi var. Bu, torpaq üçün verilmiş sənəd deyil”.
Günel CƏLİLOVA
