İnternetdən istifadə imkanları artdıqca, virtual aləmdə onlayn satış da həyata keçirilir. Hədsiz dərəcədə rahat olan onlayn satış xidməti istehlakçıların maraqlarına uyğundur. Heç bir yerə çıxmadan evində oturub sifariş verirsən və istədiyin məhsulu rahatlıqla əldə edirsən. Təəssüflər olsun ki, bəzi hallarda xarici şirkətlər onlayn satış xidmətindən sui-istifadə edərək müştəriləri aldadır. Bu problem əsasən onlayn dərman satışı ilə məşğul olan bəzi dərman şirkətlərinin işində özünü göstərir.
Bilirik ki, son illər bütün dünyada artıq çəkidən əziyyət çəkən insanların sayı çoxalıb. Əlbəttə, hər bir insan istəyər ki, daim formada qalsın və sağlamlığını qorusun. Bu da hər zaman mümkün olmur. Həkimlər, tibb mütəxəssisləri artıq çəkidən əziyyət çəkən adamlara sağlam yolla arıqlamağı tövsiyə edirlər. Sağlam yolla arıqlamaq böyük çətinlik, məhrumiyyətlər, sevimli qidalardan uzaqlaşmaq, davamı idman etmək hesabına başa gəldiyi üçün, ətrafımızdakı insanların əksəriyyəti daha yüngül formanı seçmək qərarına gəlir. Xarici dərman şirkətləri arasında təbii bitkilərdən hazırlanmış arıqlatma dərmanları, çay və kofe məhsulları, digər qida əlavələri təqdim edirlər. O qidalar müvafiq internet saytlarında reklam olunur və hər birinin də onlayn satış qiyməti var. İnsanlar bu şirkətlərin saytlarına daxil olur və arıqlamaq üçün dərmanlar, kofe və digər məhsullar sifariş verirlər. Bu dərmanlar isə istifadə edildikdən sonra müxtəlif fəsadlar verir. Əlaqə saxladığımız istifadəçilərin böyük əksəriyyəti bildirir ki, o preparatlardan davamlı olaraq istifadə edib arıqlayıblar, amma fasilə verdikdən sonra itirdikləri çəki yenidən qayıdıb.
Həkimlər bildirir ki, həkim göstərişi olmadan xarici dərman şirkətlərinin təklif etdiyi preparatları almaq olmaz. Onlar bildirir ki, bu dərmanların, kofe və çay məhsullarının əksəriyyəti asılılıq yaradır. Həkimlərin bildirdiyinə görə, bəzi hallarda təklif edilən məhsulun içi təlimatlarda göstərildiyi kimi olmur.
Həkim Kəmalə Qədimalıyeva bizimlə söhbətində bildirdi ki, onlayn dərman alışından qaçmaq lazımdır: “Bu gün yalnız Azərbaycanda deyil, bütün dünyada insanlar arıqlama preparatı istehsal edən xarici şirkətlərin onlayn xidmətindən istifadə edirlər. Çox vaxt onlar heç o dərmanların sonradan yaratdığı fəsadları nəzərə almırlar. Ola bilsin bu məhsullar müvəqqəti olaraq təsirli olsun, amma istifadə dayandırıldıqdan sonra arıqlayan adam dəhşətli dərəcədə kökəlir, qadınlarda tüklənmə, aybaşı pozğunluğu, kişilərdə daha çox əsəb gərginliyi, yuxusuzluq, halsızlıq yaradır. Bu vasitələrdən istifadə edənlərin əksəriyyəti bizə müraciət edəndə onun orqanizmində nə qədər əks proseslərin getdiyinin şahidi oluruq. Çünki bu dərmanların orqanizmin hansısa bir üzvünə faydası olubsa, böyrəyə, qara ciyərə, ürəyə və s. mənfi təsir göstərib. Vətəndaşlarımıza sözüm odur ki, həkim məsləhəti, göstərişi olmadan onlayn dərman alışından istifadə etməsinlər”.
Həkim onu da qeyd etdi ki, arıqlamaq istəyənlər o preparatlardan istifadə etmək əvəzinə, dietoloqlara müraciət etsələr, daha yaxşı nəticə əldə edərlər.
İradə SARIYEVA
