Aynur Əliyeva: “Süni uşaq qidalarının reklamı tam olaraq dayandırılmalıdır” Eyyub Hüseynov: “Uşaq qidaları məhsullarının distribütorları pediatrlarla heç bir stimullaşdırıcı görüş və tədbirlər keçirməməlidirlər”
"Ana südünü əvəz etmək iddiasına düşənlər süni qidanın əsassız reklamının yayılmasını dayandırmalıdır". Bunu ölkənin baş pediatrı Nəsib Quliyev Pediatriya İnstitutunda Azərbaycanda ana südü ilə qidalandırma həftəsinin başlanması ilə əlaqədar keçirilən tədbirdə deyib.
O qeyd edib ki, körpələrə süni qidalar ancaq həkim resepti və göstərişi əsasında verilməlidir: "Ona görə süni qidalar əsassız şəkildə reklam olunmamalıdır. Körpələrin ana südü ilə qidalanmasını təmin etmək əsas məqsədlərdən biridir. Ölkədə ana südü ilə qidalanma göstəricisi 1992-ci ildə 1 yaşa qədər olan körpələr arasında 25 faiz təşkil edirdisə, hazırda bu rəqəm 50 faizdir. Amma bölgələrdə bu rəqəm 50 faizdən yuxarıdır. Bu göstəricini bir az da olsa artırmaq niyyətindəyik".
Ekspertlər də suni uşaq qidaları reklamının yayılmasının dayandırılmasının vacibliyini düşünürlər.
Pediatr Aynur Əliyeva bizimlə söhbətində bildirdi ki, uşaqlar üçün ən ideal qida ana südüdür: “Süni qidalar inək südünün bazasında hazırlanan qidalardır. Təbiətin belə bir qanunu var ki, canlının hasil etdiyi qida onun maksimum özü üçün spesifik və maksimum adekvatdır. Bu o deməkdir ki, inəyin südünü insanın balasına vermək olmaz. Biologiyada buna bioloji katastrof deyirlər. Bunlar sübuta ehtiyacı olmayan aksiomlardır. Amma təəssüflər olsun ki, insanlar özləri-özlərinə problem yaradırlar. Ona görə ki, təbiətin qanunlarını pozurlar".
Həmsöhbətimiz onu da vurğuladı ki, pediatr uşağa süni qida verilməsini məsləhət görürsə, bu, həmin həkimin savadının aşağı olmasını göstərir. Uşağı müayinə edən pediatr analara ancaq onu tövsiyə etməlidir ki, ilk altı ayadək övladını yalnız ana südü ilə qidalandırsın. Altı aydan sonra isə ana südü ilə yanaşı, əlavə qidalar da vermək olar: “Bu qidalar isə yumurta sarısı, mannı və digər sıyıqlar ola bilər. Daha yaxşı olardı ki, bu qidalar da mağazalarda satılan hazır yox, ev şəraitində hazırlanan qidalar olsun. Ağıllı analar uşaqlarına tərkibində konservantlar olan, uzunmüddətli istifadəyə yararlı, qablaşdırılmış uşaq yeməkləri vermirlər".
A.Əliyevanın sözlərinə görə, süni uşaq qidalarının reklamı tam olaraq dayandırılmalıdır: “Yalnız müstəsna hal olan zaman həkimin məsləhəti ilə valideyn övladına süni uşaq qidası verə bilər. Və uşaq qidaları marketlərdə deyil, yalnız apteklərdə satılmalıdır”.
Azad İstehlakçılar Birliyinin rəhbəri Eyyub Hüseynov süni uşaq qidalarından çox istifadənin körpələrdə vitamin çatışmazlığı yaratdığını bildirdi: “Azərbaycanda uşaq qidalarının satışında və təbliğatında qanun pozuntuları mövcuddur. Ümumiyyətlə, uşaq qidaları məhsullarının distribütorları pediatrlarla heç bir stimullaşdırıcı görüş və tədbirlər keçirməməlidirlər. Onların pediatrlarla əlaqələri məhdudlaşdırılmalıdır. Azərbaycanda isə əksinədir. Bu distribütorlar həkimlərlə sıx iş birliyi qurublar. Bizdə hətta rəsmi məlumatlar da var ki, belə şirkətlər pediatrları stimullaşdırmaq üçün onları müxtəlif xarici ölkələrdə keçirilən tədbirlərə də göndərirlər. Ümumiyyətlə, doğum evlərində və uşaq xəstəxanalarında uşaq qidaları ilə bağlı heç bir təbliğat vasitələrindən istifadə edilməməlidir. Çünki tədqiqatlar göstərir ki, süni uşaq qidalarından xəbər tutan analar tənbəlləşir və onlardan istifadəyə meyl edirlər. Hətta bu zaman ananın südü çəkilir. Bu səbəbdən də süni uşaq qidalarının reklamının qadağan olunmasının tərəfdarıyam".
Günel CƏLİLOVA
