Aytəkin Kamranqızı: “Şəhərlərə nisbətən bölgələrdə kitaba maraq daha azdır”
“Bölgələrdə insanlar öz işlərini normal qura bilməsələr, kitabxanalar da getdikcə labüdlüyünü itirəcək”. Bunu mədəniyyət və turizm naziri Əbülfəs Qarayev “Kitab, kitabxana və innovasiyalar” mövzusunda keçirilən müşavirədə bildirib. O qeyd edib ki, Azərbaycanda kitabxanalar şəbəkəsi təkmilləşdirilməli, yeni formatda fəaliyyət göstərməlidir. Yalnız bu halda onlar oxucu auditoriyalarını genişləndirə bilər.
Ə.Qarayevin sözlərinə görə, bu gün Azərbaycanda kitabxana işi müasir dövrün tələbləri ilə uzlaşmalıdır. Günün tələblərinə cavab verməyən, müasir texnologiyalardan bəhrələnməyən, yeni yanaşmalar tətbiq etməyən kitabxanaların bir çoxu artıq fəaliyyətini dayandırıb: “Bütün yenidənqurmalar və bərpa prosesləri, yeni texnologiyaların tətbiqi zamanın tələbidir və bu sahədə çalışan hər kəs bu tələblərə uyğunlaşmalıdır. Mədəniyyətin idarə edilməsində iştirak edən bütün insanlar qarşısında bir sual durur - əgər biz müasir tələblərə uyğunlaşa bilmiriksə, bu cəmiyyətə nə dərəcədə xidmət edə bilərik?”.
Məsələ ilə bağlı fikir bildirən sosioloq Aytəkin Kamranqızı bizimlə söhbətində qeyd etdi ki, son illər ölkədə kitab oxuyanların sayı hədsiz dərəcədə azalıb: “Cəmiyyətdə kitab oxuyanlara qarşı qəribə bir yanaşma var. Demək olar ki cəmiyyətin 90 faizi niyə kitab oxuyursan, gözünü kor edirsən deyə düşünür. Bəzən tez-tez deyirlər ki, kitab oxumağa vaxt yoxdur. İnsan öz-özünə deməməlidir ki, mən bu gün saat 5-dən 6-ya qədər kitab oxuyacağam, kitaba belə yanaşmayaq”.
Həmsöhbətimizin sözlərinə görə, şəhərlərə nisbətən bölgələrdə kitaba maraq daha azdır. O üzdən, rayonlarda olan kitabxanalara müraciət edən azdır: “Bu səbəbdən də bölgələrdə olan kitabxanalara az insanın yolu düşür. Əsasən tələbələr vəsait lazım olanda kitabxanaya üz tutur. Bu heç də yaxşı hal deyil. Bölgələrdə kitaba marağı artırmaq üçün tez-tez səyyar yarmarkalar keçirmək lazımdır. Düzdür, son illər bəzi rayonlarda kitab oxunması ilə bağlı tədbirlər keçirilib. Ancaq yaxşı olardı ki, bu tip tədbirlər ucqar rayonlarda da keçirilsin. Hansısa rayonun ucqar qəsəbəsində yaşayan gəncləri kitab sərgilərinə dəvət etmək lazımdır. Beləliklə, onlar bölgələrdə fəaliyyət göstərən kitabxanalara üzv olacaq”.
A.Kamranqızı onu da vurğuladı ki, bölgə kitabxanalarının müasir dövrun tələbi ilə uzlaşması üçün klassik kitablarla yanaşı, müasir dövrun yazarlarının kitabları da kitabxanalarda olmalıdır. Həmçinin, onu da unutmaq lazım deyil ki, hazırda informasiya əsrində yaşayırıq. Və gənclərin bir qismi məlumatı elektron formada əldə etməyə üstünlük verir. O üzdən, bölgələrdə olan kitabxanalarda elektron kitabxanaların yaradılması daha məqsədəuyğun olar.
Günel CƏLİLOVA
