Pərvanə Mustafayeva: “Qadınlar bir çox hallarda evdə, tibbi lisenziyası olmayan şübhəli obyektlərdə abort və başqa ginekoloji prosedurların, əməliyyatların aparılmasına razılıq verir, bu isə onların həyatını risqə atır”
Azərbaycanda qadınların abort etdirməsi problemi aktuallığını saxlayır. Statistikaya nəzər salsaq görərik ki, son illər abortların sayı xeyli artıb. Əsasən qeyri-rəsmi intim münasibətlər, uşağı saxlamaq üçün maddi imkanın olmaması, eləcə də 21-ci əsrdə yaşamağımıza baxmayaraq, övladın qız yox, oğlan olması istəyi qadınları bu addıma sövq edir.
Təəssüf ki, bəzən qadınlar savadsızlıq, maddi-iqtisadi vəziyyətin aşağı olması üzündən abort üçün tibbi lisenziyası olmayan obyektlərə və yaxud evlərdə qanunsuz fəaliyyət göstərən tibb bacılarına müraciət edirlər.
Qanunsuz abort olunması ilə bağlı zamanla müəyyən cəza növləri tətbiq olunub. Azərbaycanda qanunsuz abort etməyə görə yeni cəza növü tətbiq ediləcək. Bununla bağlı Cinayət Məcəlləsinə dəyişiklik edilir.
Məcəllənin 196.3-cü (Qanunsuz abort etmə) maddəsinə əsasən, həkim tərəfindən tibb müəssisələrindən kənarda və xüsusi ali tibbi təhsili olmayan şəxs tərəfindən abort etməklə zərərçəkmiş şəxsin sağlamlığına ehtiyatsızlıqdan ağır zərər vurulduqda 2 min manatdan 3 min manatadək miqdarda cərimə və ya 2 ilədək müddətə islah işləri və ya 1 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 1 ilədək müddətə azadlıqdan məhrumetmə ilə cəzalandırılır.
Dəyişikliklə, yeni cəza növü olaraq, maddənin sanksiyasına 2 ilədək azadlığın məhdudlaşdırılması əlavə olunur.
Qanunsuz abort edənlərlə bağlı cəzanın sərtləşdirilməsini ekspertlər də müsbət qarşılayır.
Həkim-ginekoloq Pərvanə Mustafayeva bizimlə söhbətində qeyd etdi ki, ancaq lisenziyası olan tibbi müəssisə tam təchizatlı, steril, tam ağrısız şəraitdə abortu apara bilər: “Yalnız bu cür şərait ehtiyac olanda xəstənin həyatını xilas edəcək proseduru aparmağa imkan verir”.
Onun sözlərinə görə, qadınlar bir çox hallarda evdə, tibbi lisenziyası olmayan şübhəli obyektlərdə abort və başqa ginekoloji prosedurların, əməliyyatların aparılmasına razılıq verir: “Qadınlar əsasən buna maddi vəziyyətinin aşağı olması, daha ucuz qiymətə başa gəlməsi üçün, qeyri-nikah əlaqələrinin olması nəticəsində baş verən hamiləlik zamanı, xəstəxanada qeydiyyata düşməmək üçün, fırıldaqçı insanların təkidi ilə əl atır. Ancaq o xanımlar bilməlidir ki, dövlət xəstəxanalarında da prosedur qaydalarına əsasən pasiyentin tam anonimliyi qorunub saxlanır. Təəssüf ki, bəzi qadınlar bunu bilmir”.
Həmsöhbətimiz bildirdi ki, qanunsuz abortlarla bağlı müəyyən cəza növləri var. Cəza əsasən müəyyən məbləğdə cərimənin ödənilməsi olurdu: “Ancaq mən düşünürəm ki, cəza cərimə deyil, daha sərt olmalıdır. Cəza cərimə ilə olanda onlar abortun qiymətini qaldırır və müraciət edən xəstənin həyatını isə risqə atırlar. Qanunsuz abort edənlərin azadlıqdan məhrum olunması və ya onların islah işlərinə cəlb edilməsi daha məqbuldur”.
Günel CƏLİLOVA
