Leyla Zülfüqarova: “Enerji içkiləri insanları məhvə aparır” Adil Qeybulla: “Enerji içkilərinin tərkibi sintetik maddələrdən ibarət olduğundan, onların təsir mexanizmi indiyə qədər araşdırılmayıb”
Əvvəl idmanla məşğul olanların, sonra da bütün əhalinin arasında sürətlə yayıldı. Günbəgün müxtəlif qablaşdırmalarda, müxtəlif qiymətdə vitrinlərə düzüldü. Söhbət kiçikdən böyüyə hər kəsin içdiyi enerji içkilərindən gedir. Demək olar ki, məktəbli şagirddən tutmuş, orta yaşlı nəslin nümayəndəsi sevə-sevə bu içkini alıb içir. Ancaq heç kim o içkilərin tərkibinin nədən ibarət olduğu barədə məlumatlı deyil.
Bəzi Avropa ölkələrində isə energetik içkilərin istehsalı və satışı qadağan olunub. Əcnəbi saytlar iddia edir ki, energetik içkilərə öküz sidiyi və spermasından əldə edilən bir maddə əlavə edilir.
Bir neçə ölkədə enerji içkilərinin tərkibi araşdırılıb və ictimaiyyətə adıçəkilən içkilərin tərkibi açıqlanıb.
"Lonqorn" şirkəti tərəfindən aparılan araşdırmada enerji içkisi markaları test edilib. Şirkətin gəldiyi nəticə enerji içkilərini içən şəxslərin ürəyini bulandıra bilər. Belə ki, bu araşdırma sonrası energetik içkilərin tərkibində öküz sperması olduğu aydınlaşdırılıb.
Bu xəbər nəinki xarici ölkələrdə, eləcə də ölkəmizdə sürətlə yayılmağa başladı.
Ekspertlər bildirir ki, enerji verdiyi iddia olunan içkilər, əslində, bədənə enerji vermir, sağlamlığa çox ziyan vurur. Bu içkilərin zərərləri, hətta ölümə səbəb olması barədə mütəmadi mediada məlumatlar yer alır.
Qida mütəxəssisi və dietoloq Leyla Zülfüqarova bildirdi ki, enerji içkiləri insanları məhvə aparır: “Mən bu içkilərə enerjiverici yox, enerjisovurucu, enerjidağıdıcı içkilər deyirəm. Çünki tərkibində elə maddələrin birləşməsi, yüksək kofein var ki, bunların artıq dozada qəbulu insanı məhvə aparır”.
Energetik içkilərə öküz sperması və sidiyinin qatılması barədə yayılan fikirlərə gəlincə, qida mütəxəssisi qeyd etdi ki, energetik içkilərin tərkibində taurin var: “Bu bir amin turşudur. İnsan orqanizmində də, heyvanlarda da ifraz olunur. Bu daha çox öküzün ödü və spermasında var. Təbii ki, sənayedə insan taurinindən yox, öküzlərdən alınmış taurin istifadə olunur. Energetik içkilər o qədər çox istehsal olunur ki, ehtimal var ki, taurin məhz öküz spermasından qaynaqlanır”.
Həmsöhbətimiz onu da vurğuladı ki, insan orqanizminin gündəlik kofein norması 300-400 mq-dır: “Gün ərzində çay, kofe, qazlı içkilər, bəzi yeməklərlə kofein dozasını alırıq. İndi təsəvvür edin, bir-iki banka da energetik içki içilərsə, orqanizmə sanki kofein bombası düşür, beyin, qan dövranı, ürək, sinirlər ikiqat yüklənir, sürətlə işləyir və 1 saatın içində olan-qalan enerjini də aparır. Halbuki, həmin enerji 1 günə bəs edərdi. Ona görə uşaqlar, gənclər yatmır, yatsa da yuxudan doymur, yorğun, halsız, key kimi olur.
Məlumdur ki, bir sıra Avropa ölkələrində enerji içkiləri qadağan olunub. Səbəb isə bu içkilərdən içən 1-2 gəncin ölməsi faktıdır. Düzdür, Azərbaycanda bu fakt var, ya yoxdur, dəqiq bilmirəm. Bəlkə də hər hansı gənc ürək tutmasından vəfat edib, amma heç kim onun energetik içki qəbul edib-etməməyinin fərqinə varmayıb”.
Professor, həkim-ekspert Adil Qeybulla bizimlə söhbətində bildirdi ki, sözügedən içkilərin əksəriyyətinin üzərində yaş həddi ilə (18+) bağlı göstərişlər var. Həmin içkilərin tərkibində tonuslandırıcı maddə kofeindir: “Əslində, həmin içkilərin insana təsiri sırf kofeinlə bağlıdır. Lakin bu cür içkilərə istənilən halda aludə olmaq doğru deyil. Çünki kofeinin həddən artıq dozada insan orqanizminə daxil olması ürək fəaliyyətinin tezləşməsinə və digər problemlərə gətirib çıxara bilər. Ümumiyyətlə, bu cür içkilərə aludə olmaqdansa, yaxşı olardı yuxu rejimi düzgün seçilsin və təbii yolla mümkün sayılan maddələrin qəbulu məsləhətdir. Lakin enerji içkilərinin tərkibi sintetik maddələrdən ibarət olduğundan, onların təsir mexanizmi indiyə qədər araşdırılmayıb və tam tərkibi barədə də bizdə məlumat yoxdur”.
Günel CƏLİLOVA
