Təhsil Nazirliyi “vacib deyil”, orta məktəblər isə “vacibdir” deyir… Nadir İsrafilov: “İş dəftərləri məsələsi artıq neçə ildir təhsilimizin əsas problemlərindən biri olaraq qalır” “Nazirlik buna qəti mövqe bildirməlidir”
Bu gün valideynləri ən çox narahat edən məsələlərdən biri “şagirdlərə iş dəftərləri alınmalıdırmı” sualıdır ki, onlar bu sualın cavabını tapmaqda çətinlik çəkirlər. Bildiyimiz kimi, orta məktəblərdə tədris edilən fənn dərsliklərindən əlavə, şagirdlərə müxtəlif fənlərin iş dəftərləri də aldırılır.
Təhsil Nazirliyi iş dəftərlərinin tədrisdə elə də vacib olmadığını, şagirdlərin o vəsaitləri məcburi şəkildə almalı olmadığını desə də, məktəblər, müəllimlər bunun əksini ortaya qoyur. Bütün fənn müəllimləri şagirdlərdən iş dəftəri də tələb edir. Söhbət etdiyimiz fənn müəllimlərinin bildirdiyinə görə, təqdim edilən dərsliklər proqramı tam əhatə etmədiyindən, iş dəftərindən əlavə vəsait kimi istifadə edilməlidir. Fənləri daha yaxşı qavraması üçün iş dəftərlərinin şagirdlərə kömək olduğunu deyən müəllimlər bildirir ki, iş dəftəri olmadan şagird dərsi tam mənimsəyə bilməz. Bu onların fikridir. Görək bu barədə təhsil ekspertləri nə deyir? İş dəftəri dərsliyin bir predmeti kimi vacibdirmi?
Müəllim və valideynlər arasında yaranan iş dəftəri müəmmasına ekspertlərin mövqeyi birmənalıdır. Onlar hesab edirlər ki, iş dəftərləri kurikulumun tələblərinə uyğun şəkildə meydana çıxıb və kurikuluma keçid dövrü başa çatdığı üçün artıq iş dəftərinə ehtiyac yoxdur.
Təhsil eksperti Nadir İsrafilov “Bakı-Xəbər”ə açıqlamasında bildirdi ki, bu gün iş dəftərinə ehtiyac yoxdur və bununla bağlı Təhsil Nazirliyi qəti tədbir görməlidir: “Biz iki qəpiklik dəftərdə yazıb savad, təhsil sahibi olmuşuq. İş dəftəri kurikulum tətbiq edildiyi dövrdə ortalığa atıldı. Kurikuluma keçidlə bağlı müəyyən tapşırıqlar burada var idi. Təəssüflər olsun ki, iş dəftərlərini ayrı-ayrı nəşriyyatlar kommersiya məqsədinə çevirdi. Yəqin yadınıza gələr, bir vaxtlar iş dəftərləri ayrı-ayrı şirkətlərin, qurumların reklamına çevrilmişdi. Sonra bu məsələ ciddi reaksiya doğurdu və Milli Məclisdə də buna münasibət bildirildi. Ondan sonra iş dəftərlərinin üstündən reklamları yığışdırdılar. Burada kommersiya maraqları daha çox özünü göstərib. İş dəftəri başa gəldiyi qiymətdən qat-qat baha qiymətə satılmağa başladı. Bundan da istifadə edib məktəblərdə ajiotaj yaratdılar. Bu təzə söhbət deyil, neçə illərin söhbətidir. Nəhayət, iki ildən yuxarıdır Təhsil Nazirliyi rəsmi münasibətini bildirib. Təhsil Nazirliyinin mövqeyi ondan ibarət oldu ki, iş dəftərlərini praktik vəsaitlər sırasından çıxardılar, onun vacibliyi rəsmi qaydada aradan götürüldü. Yəni şagirdin iş dəftəri alması vacib deyil. Amma bunun məktəblərdə qarşısı alınmadı, yenə də bu hal baş verir. Valideynlərin əksəriyyətinin sosial durumu ona imkan vermir ki, iş dəftərinə pul xərcləsin. Nazirliyin buna münasibəti iş dəftərini tədris vəsaitləri sırasından çıxarmaq oldu. Amma müəllimlər öz işlərini yüngülləşdirmək üçün şagirdləri iş dəftəri almağa məcbur edirlər. Müəllimlər bununla şagirdi, valideyni özündən asılı vəziyyətdə saxlamaq üçün bu yola əl atırlar. Nazirlik buna qəti mövqe bildirməlidir. Nazirlik deyir ki, iş dəftərlərinin çapını nəşriyyatlar həyata keçirir və bizim nəşriyyatlara təsir etmək səlahiyyətimiz yoxdur”.
N.İsrafilov bildirdi ki, problemdən çıxış yolu var, nazirlik məsələ ilə bağlı hökümətə müraciət etsə, bu halın qarşısını almaq mükün olar: “Təhsil Nazirliyi bununla əlaqədar Nazirlər Kabinetinə, hökumətə rəsmi müraciət edə bilər ki, o nəşriyyatlara təsir göstərsinlər. Hesab edirəm ki, bu məsələyə gec-tez konkret rəsmi münasibət bildirilməlidir. Çünki iş dəftərləri məsələsi artıq neçə ildir təhsilimizin əsas problemlərindən biri olaraq qalır. Ona görə də bu məsələ həllini tapmalıdır. Kimsə pul qazanacaq deyə, camaatın cibinə girmək düzgün deyil”.
İradə SARIYEVA
