Kamran Əsədov: “Azərbaycan dili, riyaziyyat və xarici dil fənləri ya qəbul, ya da buraxılış imtahanlarında saxlanacaq” Məlahət Mürşüdlü: “Bütün qruplar üzrə qəbul imtahanlarının sayının 5-dən 3-ə endirilməsi imkan verəcək ki, abituriyentlər seçdikləri ixtisas üzrə mükəmməl şəkildə hazırlaşsınlar”
Buraxılış və qəbul imtahanları ilə bağlı bəzi yeniliklər nəzərdə tutulur. 2019-cu ildən buraxılış və qəbul imtahanlarında yeni təhsil standartları əsasında tərtib olunan qiymətləndirmə vasitələrindən istifadə ediləcək. Yeni modelə əsasən, ali təhsil müəssisələrinə qəbul imtahanlarında imtahan fənlərinin sayı 5-dən 3-ə endiriləcək.
Bununla yanaşı, buraxılış imtahanlarının nəticələri ali təhsil müəssisələrinə qəbul zamanı nəzərə alınacaq. Yəni abituriyentlər buraxılış və qəbul imtahanlarının birgə nəticəsinə əsasən ali təhsil müəssisələrinin müsabiqəsində iştirak edəcəklər. Bu tədris ilindən başlayaraq şagird və abituriyentlərə kömək məqsədilə yeni model əsasında sınaq imtahanları, ingilis dili fənni üzrə monitorinq imtahanları keçiriləcək.
Buraxılış və qəbul imtahanları qaydalarına nəzərdə tutulan dəyişikliklər ictimaiyyəti narahat edir. Hansı imtahan fənlərinin çıxarılacağı və bu modelin qəbul prosesinə necə təsir edəcəyi barədə suallarımızı təhsil ekspertlərinə ünvanladıq.
Təhsil eksperti Kamran Əsədov bizimlə söhbətində qeyd etdi ki, Azərbaycan dili, riyaziyyat və xarici dil fənləri ya qəbul, ya da buraxılış imtahanlarında saxlanacaq. Onun sözlərinə görə, hazırda ali məktəblərə qəbul olunmaq üçün abituriyentlər 4 ixtisas qrupu üzrə, həmin ixtisas qruplarına daxil olan 5 fəndən imtahan verirlər: “Əlavə olaraq da buraxılış imtahanlarında 3 fəndən ayrıca imtahanda iştirak edirlər. Bu da 8 fənn edir. Buraxılış və qəbul imtahanlarında təkrar olunan fənlər yalnız bunlardan birində qalacaq. Təkrar imtahana düşən fənlərin əvəzinə buraxılış imtahanlarında hansısa fənlər çıxarılıb digərləri ilə əvəz oluna bilər. Həmin fənlər isə qəbul imtahanlarında olmayacaq”.
K.Əsədov bildirdi ki, ali məktəblərə qəbul imtahanları ilə bağlı 2019-cu ildən tətbiq olunacaq yeniliklər nəticəsində 4 ixtisas qrupu ləğv oluna bilər: “Bundan sonra 2019-cu ildən ancaq 4 istiqamət olacaq. Hər istiqamətdə bu fənlər olacaq. Belə ki:
Texniki istiqamət: (Azərbaycan dili , riyaziyyat, fizika);
Riyaziyyat-iqtisadiyyat istiqaməti: (Azərbaycan dili, riyaziyyat, coğrafiya);
Humanitar istiqamət: (Azərbaycan dili, tarix, ədəbiyyat);
Təbiət istiqaməti: (Azərbaycan dili , kimya, biologiya);
Buraxılış imtahanları : Azərbaycan dili , Azərbaycan tarixi, xarici dil”.
Həmsöhbətimizin sözlərinə görə, ali məktəblərə tələbə qəbulu ilə bağlı məsələlərin daim ictimaiyyət tərəfindən maraqla qarşılanması insanların gələcəyə verdiyi dəyərin və sabaha inamının təzahürüdür:
"Hazırda Azərbaycanda ali məktəblərə qəbul imtahanları fənlərin sayına və çətinlik dərəcəsinə görə çox ağır imtahanlar sırasındadır. Azərbaycan Respublikası Prezidentinin 2013-cü ildə imzaladığı Təhsilin İnkişafı üzrə Dövlət Strategiyasında göstərilib ki, təhsil əlçatan olmalıdır. Hesab edirəm ki, bütün ixtisas qruplarında riyaziyyat fənninin olması anlaşılan deyil. Bundan əlavə, orta məktəbin nüfuzunun qaldırılması, şagirdlərin buraxılış imtahanlarına və orta məktəb dərslərinə maraqlarının artırılması üçün 2019-cu ildən tətbiq ediləcək yeniliklər mütərəqqi addım olacaq.
Ali məktəblərə qəbul sadə olmalıdır. Bir misal deyim: Fransada universitetlər hər kəs üçün açıqdır. Universitetlərə daxil olmaq üçün qəbul imtahanları keçirilmir və təhsil pulsuzdur. Orta təhsil haqqında sənədi - bakalavr diplomunu alan hər kəs sənədlərini istədiyi universitetə verə bilər. Əgər namizəd orta məktəbdə yaxşı qiymətlərlə oxuyubsa, onu universitetə qəbul edirlər. Bununla yanaşı, bakalavr diplomu olmayan və orta təhsilini yarımçıq qoymuş fransızlar universitetlərə qəbul olunmaq üçün Universitet Təhsilinə Qəbul Diplomu (DAEU) almalıdırlar. DAEU diplomu universitetlər tərəfindən verilir”.
Azad Müəllimlər Birliyinin rəhbəri Məlahət Mürşüdlü bizimlə söhbətində vurğuladı ki, 11 illik buraxılış nəticələri qəbul prosesində nəzərə alınacaq: “Bu, şagirdlərin məktəbə dönüşü deməkdir. Həm davamiyyət, həm təhsilə, həm də təlimə münasibət dəyişəcək. Artıq şagirdlər, valideynlər və müəllimlər biləcək ki, qarşıda onları imtahan nəticələri ilə yanaşı, qiymətləndirmə gözləyir. Qəbul imtahanında böyük əhəmiyyət kəsb edən bir proses məktəbliləri gözləyir. Bu səbəbdən də məlum dəyişiklikləri çox müsbət hal kimi dəyərləndirirəm”.
Həmsöhbətimizin sözlərinə görə, bütün qruplar üzrə qəbul imtahanlarının sayı 5-dən 3-ə endiriləcək. Bu dəyişiklik imkan verəcək ki, abituriyentlər seçdikləri ixtisas üzrə mükəmməl şəkildə hazırlaşsınlar.
Günel CƏLİLOVA
