Şahin Camalov: “Yol polisi işçilərinin öz peşələrinə vicdanla yanaşması gənclərin gələcəkdə bu sahəyə maraq göstərməsinə səbəb olacaq”
Bu gün yol polisi əməkdaşlarının işi olduqca çətindir. Onlar günün 8-10 saatını küçədə dayanaraq yollarda təhlükəsizliyi təmin edirlər. İstənilən hava şəraitində yol polisləri daim iş başında olurlar. Buna baxmayaraq, onlar öz işlərinin öhdəsindən layiqincə gəlirlər.
Bu günlərdə yol polisi elə bir təqdirəlayiq iş görüb ki, böyükdən tutmuş kiçiyə qədər hər kəs ondan danışır. Yol polisi qadın vətəndaşı Nəvaidən Bakiya çatdıraraq həyatını xilas edib.
DYP-nin Nəvai postunda halı pisləşən bir nəfəri yol polisi əməkdaşı xəstəxanaya çatdıraraq həyatını xilas edib. Bu hərəkəti Baş Dövlət Yol Polisi İdarəsinin Yol Patrul Xidməti Alayının xüsusi taqımında xidmət edən serjant Anar Abdullayev edib. Rayondan gələn mikroavtobusun sərnişinlərindən birinin DYP-nin Nəvai postunun yanında halı pisləşib. Sərnişinlərin müdaxiləsi nəticə vermədikdə, təcili tibbi yardım çağırılıb. Hansı səbəbdənsə TTY gəlməyib. Bu zaman postun polisləri müdaxilə ediblər. Xəstəni içəri aparıblar. TTY-ni gəlməyə məcbur ediblər. Daha sonra inspektor Anar xəstəni anası ilə birgə maşına əyləşdirərək “Semaşko”ya çatdırıb. Yolda iki dəfə halı pisləşən xəstəyə yol polisi müdaxilə edib, çantalarını özü maşına yükləyib boşaldıb.
Anar Abdullayev “Avtosfer.az”a bildirib ki, xidmət zamanı belə hallarla tez-tez rastlaşır və bunu öz vəzifə borcu hesab edir. “Mən bunu Allah xatirinə edirəm. Həmçinin polis olaraq insanlara qayğı göstərmək bizim əsas işimizdir. Düşünürəm ki, mənim yerimdə olan hər kəs bu addımı atardı”.
Yol polislərinin bu cür insani hərəkətləri onların işlərinə kölgə salmaq istəyənlərə tutarlı cavabdır.
“Təhlükəsiz Yol” Alyansının koordinatoru Şahin Camalov “Bakı-Xəbər”ə açıqlamasında qeyd etdi ki, hər zaman ölkə vətəndaşlarının gözündə yol polisləri başqa cür canlanıb: “Yol polisi barədə mənfi imic yaratmaq cəhdlərinə qarşı zamanla müəyyən işlər aparılıb və bu gün də aparılır. Nəzərə almaq lazımdır ki, yol polisləri də insandır. Onlar haqqında mənfi imici elə yol hərəkəti qaydalarına riayət etməyənlər formalaşdırıb”.
Həmsöhbətimizin sözlərinə görə, yol polislərinin atdığı hər bir gözəl addım xalqda onlara rəğbət hissini daha da gücləndirir. Unutmaq lazım deyil ki, onlar da insani hisslərə malikdirlər: “Yol polisinin bir insanın həyatını qurtarması ayaq üstə alqışlanası bir addımdır. Ümid edirəm ki, Yol Patrul Xidməti və Dövlət Yol Polisi həmin şəxsləri mükafatlandıracaq. Mükafat deyəndə maddiyyat nəzərə alınmamalıdır. Onların gördükləri işi ölkəyə yaymaq lazımdır ki, hamı Azərbaycan polisinin öz vətəndaşlarımıza xoş münasibətini görsün”.
Ş.Camalov hesab edir ki, yol polisi işçilərinin öz peşələrinə vicdanla yanaşması gənclərin gələcəkdə bu sahəyə maraq göstərməsinə səbəb olacaq.
Günel CƏLİLOVA
