Osman Gündüz: "Bu yayımla təkcə televiziya xidmətini yox, digər xidmətləri də vermək mümkündür"
Texnologiyanın inkişafı, bütün sferalarda olduğu kimi, radio-televiziya sahəsinə də öz müsbət təsirini göstərir. Artıq televiziyanın ənənəvi analoq yayımı öz yerini rəqəmsal yayıma verməklə tarixə köçməkdədir. Əlbəttə, qəbul olunan və geniş yayılan hər bir yenilikdə olduğu kimi, bu tərəqqinin də öz müsbət tərəfləri var.
Azərbaycanda rəqəmsal yayıma keçidlə bağlı ilk test işlərinə 2004-cü ildən başlanıb. Ötən ilin sonuna qədər ölkənin bütün ərazisinin rəqəmsal yayımla tam əhatə olunması nəzərdə tutulurdu. Bakıda keçirilən İlk Avropa Oyunları ilə əlaqədar bu işlər müvəqqəti təxirə salındı. Hazırda respublikada yaşayış məntəqələrinin 99 faizi rəqəmsal TV siqnalı ilə əhatə olunub. Vətəndaşlara iki - sosial və kommersiya tipli paketlər təklif olunur. 10-11 kanalın daxil olduğu sosial paketlərdə yerli, yəni dövlət və özəl televiziyaların yayımı pulsuz həyata keçirilir. Kommersiya tipli paketlərdə isə 90-a yaxın kanalı izləmək mümkündür.
Məlum olduğu kimi, Milli Televiziya və Radio Şurasının yerüstü yayımlanan ümumölkə TV proqramlarının analoq yayımının dayandırılması ilə bağlı qərarına əsasən, Bakı və Abşeron yarımadasında analoq yayımı artıq 1 noyabr tarixdən dayandırılıb. Respublikanın digər bölgələrində isə yayımlanan TV proqramlarının yerüstü rəqəmsal yayımı 1 dekabr tarixindən etibarən reallaşacaq. Ölkə ərazisində yerüstü yayımlanan TV proqramlarının rəqəmsal TV qəbulediciləri ilə izlənməsi üçün DVB-T standartına uyğun olan dekoderlərdən istifadə məsləhət görülür. Qeyd edək ki, müvafiq qurumlar əhalinin bu sahədə heç bir problemlə üzləşməyəcəyini deyir. Çünki hazırda vətəndaşlar dekoderləri asanlıqla əldə edə bilər.
Bütövlükdə rəqəmsal yayıma keçməyin hansı əhəmiyyəti var? Sözügedən məsələni dəyərləndirən ekspert Osman Gündüzün fikrincə, bu, keyfiyyətli yayım deməkdir: "Rəqəmsal yayım, əlbəttə, ilk növbədə keyfiyyətli yayım deməkdir. Yəni analoq yayımla müqayisədə bu yayım kifayət qədər keyfiyyətlidir. İkincisi, bu yayımla təkcə televiziya xidmətini yox, digər xidmətləri də vermək mümkündür. Yəni deyək ki, data xidmətləri, internet xidmətləri və s. vermək mümkündür. Üçüncüsü də rəqəmsal yayıma keçməklə digər resursları sərbəstləşdirmək olur. Yəni televiziya yayımını göstərmək üçün tezlik resursları lazımdır, əlavə resurslara ehtiyac var. Keyfiyyət, əlavə xidmətlər, əlavə imkanlar baxımından, əlbəttə ki, rəqəmsal yayıma çatan digər yayım növü yoxdur. Bu kifayət qədər sərfəlidir. Rəqəmsal yayım zamanı kənar maneələr hiss edilmir - əvvəlki kimi kanallar qarışmır, kölgələnmə baş vermir, informasiyaların saxlanmasında itki olmur. Rəqəmsal yayımın üstünlüklərindən biri də mobil və portativ qəbuledicilərdə izləməyin mümkünlüyüdür. Yayım texnologiyaları inkişaf etdikcə, təsvirin, səsin keyfiyyəti yüksəldikcə, bunu çox asanlıqla hiss etmək mümkündür. Əvvəllər yalnız bu sahədə işləyənlər, tele-radio sahəsində çalışan peşəkarlar keyfiyyətin fərqinə varırdısa, indi tamaşaçıların özü analoq və rəqəmsal yayımın fərqini çox asanlıqla ayırd edir və əlbəttə, keyfiyyətli görüntüyə baxmağa üstünlük verir".
Vidadi ORDAHALLI
