Fatimə Hacıbəyli: “Elanda iş üçün müraciət edəcək xanımın üzünün deyil, yalnız ayaq üstə şəklinin istənilməsi düzgün deyil”
Sosial şəbəkələrdə müxtəlif növ iş elanlarına rast gəlmək mümkündür. Əksər hallarda elanlarda cavan qızlara üstünlük verildiyi bildirilir. Ancaq bu səfər maraqlı bir elan sosial şəbəkədə müzakirəyə səbəb olub.
Belə ki, "Spiritual Enerji Mərkəzi"nin vakansiya elanında katibə axtarıldığı bildirilən elanda əmək haqqı 3500 manat göstərilib. Əmək haqqının yüksək olduğunu görən izləyicilər həmin şirkətlə əlaqə saxlayıblar. Şirkət haqqında ətraflı məlumat əldə etmək üçün sosial şəbəkə hesabı istədikdə, izləyiciyə "sosial media hesabımız yoxdur" cavabı verilib. İş elanında vəzifəyə aid öhdəliklər sırasında "Instagram mesajlarını cavablandırmaq" da qeyd olunub. İş görüşməsi şirkətdə deyil, onlayn qaydada keçirilir və CV forması ilə yanaşı, iki ədəd foto göndərməsi tələb olunur. Maraqlı məqam isə şəklin ayaq üstə olmasıdır. Bu tələb haqlı olaraq suallara və narazılığa səbəb olub. Adətən CV göndərilən sənəd üçün şəkil tələb olunur. Ayaq üstə xanımın şəklinin tələb olunması süni intellektin inkişaf etdiyi dövrdə şəkillərin necə və hansı məqsədlə istifadə olunacağına dair suallar yaradır.
“İndi süni intellekt dövrüdür, şəklin hansı məqsəd üçün istifadə olunacağı müəyyən şübhələrə səbəb olur, işəgötürən şəxs bacarığa üstünlük verməlidir, görüntüyə yox”
Sosioloq Fatimə Hacıbəyli “Bakı-Xəbər”ə şərhində bildirdi ki, işəgötürənlərin "yalnız qadın tələb olunur" qeydini etməsi çox zaman fiziki görünüşə, yaşa və bəzən şəxsi vəziyyətə (ailəli/subay, uşaqsız və s.) görə üstünlük vermələri ilə müşahidə olunur: “Bu isə əmək bazarını obyektivlikdən uzaqlaşdırır. Belə yanaşmalar yalnız kişilərin deyil, eyni zamanda peşəkarlığı ilə önə çıxmaq istəyən qadınların da hüquqlarını pozur. Çünki qadınlar da bu şəkildə, sadəcə “cinsə görə” seçilmək istəmirlər – biliyə, bacarığa və təcrübəyə əsaslanan seçimlər cəmiyyətin inkişafının əsas şərtidir. Təəssüf ki, bəzi şirkətlər etik qaydalara əməl etmədən vakansiya elanı paylaşır. Elanda iş üçün müraciət edəcək xanımın üzünün deyil, yalnız ayaq üstə şəklinin istənilməsi düzgün deyil. Şirkət bunu nəyə görə tələb etdiyini əsaslandırmalıdır. Məlumdur ki, indi süni intellekt dövrüdür, şəklin hansı məqsəd üçün istifadə olunacağı müəyyən şübhələrə səbəb olur. İşə götürən şəxs bacarığa üstünlük verməlidir, görüntüyə yox”.
Leyla QARAXANLI
