Vətənin dar günündə dadına çatıb, sinəsini ona sipər edən minlərlə ölümsüzlük qazanan qəhrəmanlardan biri də 1997-ci ildə Cəlilabadın Alar kəndində dünyaya göz açan Bilal Novruz oğlu Rzayevdir.
Doğma Azərbaycanın hər qarış torpağını özünə cənnət bilən Bilal əzəli yurd yerimiz Qarabağın azadlığı uğrunda şəhidlik zirvəsinə ucalıb. Odur ki, çox aza yaşasa da, özündən sonra gələcək nəsillərimiz üçün örnək olacaq bir tarix yazıb qoyub. Həmçinin xalqın qəlbində qazanılan parlaq qələbəmizin mərdlik simvoluna dönən Bilal dövlət tərəfindən də “Vətən uğrunda”, “Cəsur döyüşçü”, Cəbrayılın və Qubadlının azadlığına görə medallarla təltif edilib.
Bilal həyatı dərk edən gündən həmişə yaxşı əməllərə can atıb, saf əqidəli insanlardan görüb-götürüb. Elə öz xoşbəxtliyini də Vətəninə, xalqına təmənnasız xidmətdə görüb. Yaratmaq, yaşatmaq eşqi ilə orta məktəbi bitirən Bilal yağıya əsir düşən Vətən torpaqları üçün çox narahat olub. Özünəməxsus mənəvi dünyası, vicdanı onu düşmənlə döyüşə səsləyib. Ordu sıralarına yola düşəndə bildirib ki, erməni dığaların Qarabağımızı zəbt etməsi, qan-qada törətməsi bizə yaraşmır. Ulular o müqəddəs yerləri qanı bahasına qoruyub, gələn nəsillərə yadigar qoyublar. İndi biz gənclərin birinci vəzifəsi nəyin bahasına olursa-olsun yağıya əsir düşən torpaqları azad etməsidir. Tarixi yurd yerlərimiz həqiqi sahiblərinin yolunu gözləyir. Həqiqətdir ki, torpaq əgər uğrunda ölən varsa, Vətəndir. Mən orduya yalnız yağıdan qisas almaq məqsədilə gedirəm. Əgər müharibə başlasa biz mütləq qalib gələcəyik. Mən isə Vətən torpağı azad olmamış silahı yerə qoymaram. Yağını məhv edib, yanınıza üzüağ qayıdaram.
Bilal Rzayev cəbhə bölgəsində Vətənin keşiyində durub. Yaxşı əsgər olub, nümunəvi xidmət göstərməklə komandirlərin sevimlisinə çevrilib. Vətəni necə sevməyi, doğma torpağı neçə qorumağı əsgər yoldaşları ondan öyrəniblər. Həmçinin keçirilən təlimlərdə əla döyüşçü keyfiyyətləri nümayiş edən Bilal bir qayda olaraq erməni dığalardan qisas almağa məqam axtarıb.
Vətən, torpaq yolunda həmişə canından-qanında keçməyə hazır olan Bilal əsgərlikdən sonra bir müddət kəndində halal zəhmətin qulpundan yapışıb, el-obası üçün faydalı işlər görüb. Sağlam əqidəsi, saf amalı Bilala cəmiyyətdə sevgi-məhəbbət qazandırıb. Bir çox qeyrətli gənclər kimi Bilalı da düşmənin zəbt etdiyi Vətən torpaqları, törətdiyi qanlı əməllər hər an düşündürüb. Odur ki, 44 günlük haqq savaşımızın ilk günündə könüllü olaraq müharibə meydanına gedib. Odlu-alovlu döyüş yollarından keçməklə müharibə bitənə qədər yağıya qan qusdurub. Noyabrın 24-də qəfil atılan düşmən gülləsinə tuş gəlib və Vətən eşqli ürəyi əbədi olaraq dayanıb.
Zəfər ORUCOĞLU Azərbaycan Jurnalistlər Birliyinin üzvü
