Azərbaycanda yanvarın 1-dən müavinət və təqaüdlər, minimum aylıq maaş artırılır. Dekabrın 20-də verilmiş qərara görə, yaşa, əlillik dərəcəsinə görə və digər müavinətlər 10-50 manat artırılacaq.
Yaşa görə müavinət 130 manatdan 180 manata çatdırılır.
Birinci qrup əlilliyə görə müavinət 150 manatdan 200 manata, ikinci qrup əlilliyə görə 130 manatdan 180 manata, üçüncü qrup əlilliyə görə isə 110 manatdan 120 manata artırılır.
Digər müavinətlərdə artım isə belə olacaq: sağlamlıq imkanları məhdud 18 yaşadək uşaqlara verilən müavinət 150 manatdan 200 manata, ailə başçısının itirilməsinə görə müavinət 80 manatdan 100 manata, müddətli hərbi xidmətdə olanların uşaqlarına verilən müavinət 100 manatdan 120 manata, valideynlərini itirmiş uşaqların qəyyumlarına verilən müavinət 100 manatdan 120 manata qaldırılır.
1 yaşadək uşağı olan aztəminatlı ailələrə verilən müavinət 55 manatdan 70 manata, övladlığa uşaq götürənlərə ödənilən müavinət 160 manatdan 200 manata, 18 yaşadək sağlamlıq imkanları məhdud uşağı övladlığa götürənlərə ödənilən müavinət 480 manatdan 600 manata, uşağın doğulmasına görə birdəfəlik müavinət 200 manatdan 300 manata, dəfn üçün birdəfəlik müavnət 300 manatdan 350 manata yüksəldilir.
5-dən çox uşağı olan qadınlar üçün müavinət 55 manatdan 70 manata qaldırılıb.
Birinci qrup əlillərə və sağlamlıq imkanı məhdud olan 18 yaşadək uşaqlara baxan şəxslərə verilən prezident pensiyasının aylıq məbləği 50 manatdan 80 manata qaldırılıb.
Bundan başqa, təhsil təqaüdləri 20 faiz artılırıb. Bu, bütün səviyyələrdə təhsil alan tələbələrə (orta ixtisas məktəbləri, ali məktəblərin bakalavriat və magistratura səviyyələri) və doktorantlara aiddir.
Fəxri adlara görə təqaüd məbləği 20-30 manat artırılıb.
Xalq yazıçısı, Xalq şairi, Xalq artisti, Xalq rəssamları 30 manatlıq artımla 180 manat, Əməkdar yazıçısı, Əməkdar şairi, Əməkdar artisti, Əməkdar rəssamlar isə 20 manat artımla 120 manat təqaüd alacaqlar.
Bir neçə gün əvvəl ölkədə minimum aylıq əməkhaqqının məbləğinin artırılması barədə də qərar qəbul edilib.
Təbiidir ki, müxtəlif təbəqələrə aid insanların əmək haqqlarında olan artım sevindiricidir. Çünki dünyada baş verən bir çox iqtisadi amillərin təsiri nəticəsində bahalaşma ölkəmizdən də yan keçməyib. Hətta proqnozlara görə, gələn ilin əvvəlindən bahalaşmanın daha da geniş vüsət alacağı gözlənilir. Belə olan təqdirdə biz jurnalistlərin yaşayışı və maddi vəziyyəti daha da çətinləşəcək. Çünki artan əmək haqqı kateqoriyalarının sıralamasında jurnalistikaya aid nəsə yoxdur. Əmək haqlarının artırılması, həm də infliyasıyanı sürətləndirir. Bəs, biz media işçiləri köhnə qayda ilə alacağımız əmək haqlarının fonunda bahalaşan yeni tələblərlə yaşayışımızı necə quracağıq?
Ölkədə dərin media islahatlarının aparıldığı bildirilir. Media Haqqında yeni qanun layiəsinin parlamentin ikinci oxunuşunda qəbul edildiyinin şahidi olduq. Hiss olunur ki, dövlət medianın daha da inkişafında maraqlıdır. Ancaq nə qədər mükəmməl qanun olsa da, ac qarınlı jurnalistlə media islahatına getmək bir qədər yarımçıq görünəcək. Biz görürük ki, yeni ildə dövlətin ayırdığı qrantlar hesabına maliyyələşən media subyektlərinin maliyyələşməsi istiqamətində hər hansı yenilik nəzərə çarpmır. O halda jurnalistlər qarşıda onları gözləyən bahalaşma dalğasından necə özlərini kompensasiya edə biləcəklər?
Media eksperti Müşfiq Ələsgərli "Bakı-Xəbər"ə bildirdi ki, qanunvericiliyin təkmilləşməsi üçün olan təşəbbüslər media islahatı sahəsində ilk addımlardan biridir: "Hesab edirəm ki, bu, yeganə addım olmayacaq. Bu, media islahatları prosesinin ilk pilləsidir. Beynəlxalq standartlara görə, ölkədə media mühitini dəyərləndirmək üçün 4 əsas prinsipə diqqət yetirilir. Bunlardan birincisi, ölkədə media qanunvericiliyinin təkmil olmasıdır. İkincisi, medianın maliyyə müstəqilliyinin təmin edilməsidir. Üçüncü jurnalist təhlükəsizliyi məsələsidir. Dördüncüsü isə etik davranış prinsiplərinə əməl olunmasıdır. Gördüyümüz kimi, media qanunvericiliyi burada həmin komponentlərdən biridir. Bu baxımdan hazırda əsas diqqət qanunvericiliyin təkmilləşməsinə yönəlib. Bu tam yekunlaşandan sonra digər sahələrə də diqqət ayrılacaq. Bu eyni zamanda media sahəsində bir səliqə-sahmanın yaradılması ilə nəticələnəcək. Nə qədər ki, nizam yoxdur, sosial proqramların həyata keçirilməsi də çətin olacaq. İlk növbədə çərçivə müəyyənləşməlidir. Bilməliyik ki, ölkədə nə qədər KİV var, nə qədər jurnalist fəaliyyət göstərir. Hazırda bunun sayı dəqiq olmadığı üçün islahatların aparılması da ləngiyir. Jurnalistlırin sosial vəziyyətləri ilə bağlı mədələ media qanunvericiliyində detallı şəkildə əhatə olunmayıb. Hal-hazırsa media işçilərinin aylıq gəlirləri ölkdəki orta aylıq gəlirə bərabərdi. Gələcəkdə hansısa bahalşma baş verərsə və bunun müqabilində jurnalistlərin aldığı əmək haqlarının alıcılıq qabiliyyəti azalarsa, bununla bağlı zamanında lazımi qərarlar vermək lazım olacaq. Bu sahədə təkliflər çoxdur. Dövlət MEDİA adlı qurum vasitəsilə redaksiyalara və müsabiqələr vasitəsilə jurnalistlərə maddi yardım göstərir. Çərçivə tam müəyyənləşəndən sonra daha yeni dəstək layihələrinin şahidi ola biləcəyik”.
Məhəmmədəli QƏRİBLİ
