Bayramov Rüstəm Adil oğlunun atası: “Araz İnşaatçı” MMC-də gözətçi işləyən oğlumun qətlindən 10 ay ötsə də...”
“Cinayətkarın tapılması üçün Baş Prokurorluğa, Daxili İşlər Nazirliyinə və digər qurumlara müraciət etmişəm”
Suraxanı rayonunun Hövsan qəsəbəsində qeydiyyatda olan və hazırda Xəzər rayonu Türkan üzümçülük sovxozunda yaşayan Bayramov Adil Rüstəm oğlu redaksiyamıza müraciət edərək, 10 ay bundan əvvəl oğlunun müəmmalı şəraitdə qətlə yetirildiyini, qətlin üstündən 10 ay keçməsinə baxmayaraq hələ də qatilin tapılmadığını bildirdi.
A.Bayramovun sözlərinə görə, hələ oğlunun qatilləri tapılıb cəzalandırılmayıb. “Oğlum Bayramov Rüstəm Adil oğlu 1992-ci il təvəllüdlüdür. 1 il 7 ay idi ki, “Araz İnşaatçı” MMC-də fəhlə işləyib, son vaxtlar da orada gecə gözətçi qalırdı. 10 oktyabr 2020-ci il tarixində saat 5-də onu aparıb işə qoymuşam, gecə saat 20:54-də oğlum mənə “axran” yoldaşı olan Kərəm adlı şəxsin telefonu ilə zəng edərək “ata, gəlib məni apara bilərsən?” deyib. Mən də ona demişəm ki, oğlum, komendant saatıdır, necə gəlim. Sonra Kərəmlə danışdım, dedim ki, komendant saatıdır, gəlsəm məni saxlayarlar. O da mənə dedi ki, siz gəlməyin, narahat olmayın, oğlunuz mənim yanımdadır. O mənə oğlumdan muğayat olacağına dair söz versə də, amma sözünə əməl etməyib. Sonra oğlum təkrarən gecə saat 10-un yarısında mənə yenə zəng edib ki, imkan varsa gəl məni apar, mən də yenə ona dedim ki, komendant saatıdır. Oğlum mənə demədi ki, ata, məni öldürəcəklər. Hadisədən xəbərsiz yatdım. Səhərisi günü ona yemək apardım, nə qədər zəng etdim, telefonu götürmədi, sonra telefonu başqa adam götürdü və məndən “sən Rüstəmin nəyisən” soruşdu, dedim ki, atasıyam, mən də onun kimliyi ilə maraqlandım, polis olduğunu dedi. Polis mənə dedi ki, siz 30-cu Polis Bölməsinə gedin. Amma o mənə oğlumun öldürüldüyünü demədi. Elə bildim ki, oğlum dava edib, ona görə məni ora çağırıblar. Heç demə ki, oğlum gecə öldürülübmüş, sadəcə polis mənə bunu telefonda deməyib. Mənə sonra zəng gəldi ki, Rüstəm ölüb. Ağlım başımdan çıxdı. Demə ki, onun nəşini morqa aparıblar, ora getdim. Mənə dedilər ki, sənin oğlunun düşməni kimdir? Mən də dedim ki, Hüseynov Taleh Saleh oğlu. O adam mənim saflığımdan istifadə edib maşınımı “zaloq” qoymuşdu. Mən dükana mal aparırdım, bir gün Taleh mənə dedi ki, dayı, Sumqayıtda “888” saylı salona borcum var, sənin maşınını ora “zaloq” qoyaq. Demə ki, bu adam həmin salondan icarəyə götürdüyü maşını satıb və salon sahibi də ondan ya pulu verməsini, ya da maşını qaytarmasını tələb edəndə mənim maşınımı “zaloq” qoymuşdu. O məni aldatdı ki, hər ay pulunu ödəyib sənin maşınını geri qaytaracağam, amma ödəniş etmədi, məcbur olub pulu özümüz ödəyirdik. Ona görə də, Rüstəm gecə-gündüz işləyirdi ki, borcu ödəyib maşını “zaloq”dan çıxaraq, aya 255 manat ödəyirdik. Rüstəm Talehin üstünə getmişdi ki, sən kimsən ki, mənim atamı aldadıb onun maşınını “zaloq” qoymusan, atamın maşınını qaytar. Hətta Taleh onda qardaşının dükanının yanında Rüstəmi bıçaqla vurmaq istəmişdi. Mən özüm bunun şahidi olmuşam. Taleh Rüstəmə demişdi ki, səni amansızlıqla öldürəcəyəm. Mən Talehdən şübhəliyəm. O dəfələrlə oğlumu ölümlə hədələyib və bir dəfə də Rüstəmi bıçaqla vurmağa cəhd göstərməsinin şahidi olmuşam. O, “sənin axırına çıxacağam, Rüstəm,” demişdi. (Rüstəmin şəklini göstərərək) bu şəkli ürəyimin üstündə gəzdirirəm, bax gör belə oğlanı da öldürmək olar, heç belə oğlana da qıyarlar?!”
Oğlunun qətlinə görə kimdən şübhələndiyinə gəlincə, A.Bayramov dedi ki, kameraya iki qadın və kişilər düşüb: “Onların oğlumun meyitinin yanında nə işləri olduğunu bilmirəm, amma həmin qadınlar və kişi hələ də çöldədir, məsuliyyətə cəlb edilməyiblər. Hazırda Suraxanı rayon Prokurorluğunda araşdırma davam etdirilir. Hadisə Hövsan qəsəbəsi ərazində baş verib, oğlumun meyitini iş yerindən 700 metr aralıya atıblar. Kameraya baxanda dəhşətə gəldim, hər yer qan içindədir. Oğlumun necə, hansı şəraitdə öldürüldüyünü bilmirəm, onu amansızlıqla qətlə yetiriblər və meyiti Fövqəladə Halların Akademiyasının arxasına atıblar. Baş hissəsi yoxdur. Kameraya düşənlərin şəxsiyyəti müəyyən edilib. Prokurorun dediyinə görə, qadının birinin adı Tükəzban, o biri gəlini Günel, oğlu Elsevər, Elbəy və İslam kameraya düşüb. Hazırda Suraxanı rayon Prokurorluğunda araşdırma davam etdirilir. Mən bu adamları tanımıram, onlarla mənim heç bir əlaqəm yoxdu. Guya ki, gedərkən bu qadınlar meyiti görüblər və meyitə baxıblar, hətta Tükəzban oğluna da zəng vurub ki, gəlin siz də baxın. Prokuror dedi ki, oğlum can üstə olub, həkimə çatdırılsaydı, bəlkə həyatını xilas etmək olardı. Mən başa düşmürəm ki, gecə komendant saatı vaxtı bu adamlar küçədə nə edirmişlər? Suraxanı rayon Prokurorluğu deyir ki, araşdırma aparırıq, amma qatilin izini tapa bilmirik. Artıq 10 aydır ki, oğlum qətlə yetirilib, oktyabrda ili tamam olacaq, amma hələ qatil tutulmayıb, əlini-qolunu sallayıb ortada gəzir. Mən nə etməliyəm? Cinayətkarın tapılması üçün Baş Prokurorluğa, Daxili İşlər Nazirliyinə və digər qurumlara müraciət etmişəm. Srağagün Daxili İşlər Nazirliyindən mənə cavab gəldi ki, müraciətiniz qəbul olunub”.
A.Rüstəmov əlaqədar qurumlardan oğlunun qatilinin aşkarlanaraq məsuliyyətə cəlb edilməsini istəyir. Ata deyir ki, oğlu qətlə yetiriləndən nə gecəsi, nə də gündüzü var, qatilin yaxalanması onun yanan ürəyinə su çiləyər. A.Rüstəmov ümid edir ki, yeganə oğul övladının müəmmalı şəkildə qətlə yetirilməsi məsələsi əlaqədar qurumlar tərəfindən obyektiv şəkildə araşdırılacaq və qatil üzə çıxarılacaq. O dedi ki, DİN tərəfindən müraciətinin qəbul edilməsi nazirliyin hadisəni nəzarətə götürdüyünü deməyə əsas verir: “DİN artıq müraciətimi qəbul edib, inanıram ki, hadisə artıq nəzarətə götürüləcək. Cənab nazir Vilayət Eyvazovdan xahişim odur ki, oğlumun qatillərinin tezliklə aşkarlanıb tapılması məsələsini nəzarətə götürsün və bununla bağlı göstəriş versin. Heç olmasa, ilinə qədər qatili tapılaraq üzə çıxarılsın, mən də təsəlli tapım. Oğlum qətlə yetiriləndən sonra yoldaşım iflic keçirib, çox pis vəziyyətə düşüb. Mən özüm də yarımcanam”.
Leyla QARAXANLI
