Qardaş ölkədə yanğına görə Azərbaycan tur şirkətləri ilə müştərilərin pul davası başlayıb…

Ruslan Quliyev: “Agentliklər və hava yolları şirkəti hazırkı vəziyyətdə turistlərə maksimum kömək etməlidir”

img

Türkiyədə bir neçə gün öncə başlamış dəhşətli meşə yanğınları hələ də davam edir. Bu barədə ölkə səlahiyyətliləri məlumat yayıb. Genişlənən alovlar yalnız meşələri, flora və faunanı deyil, yanğın bölgəsinə yaxın bütün kəndləri, yaşayış massivlərini, turizm obyektlərini də viran qoyub.

Yanğının turizm bölgələrində baş verməsi və yayılması həmin ərazilərdə istirahətdə olan və səfər planlaşdıran turistləri çətin vəziyyətdə qoyub. Xüsusilə Bodrumda, Muğlanın Marmaris, Milan rayonlarında və Aydın vilayətinin mərkəzində baş verən yanğınlar yerli turizmə ciddi mənfi təsir göstərib.

Bu vəziyyət Türkiyənin sözügedən bölgələrinə, ona yaxın ərazilərə tətil planlaşdıran azərbaycanlı turistləri də çətin vəziyyətə salıb. Belə ki, qardaş ölkəyə istirahət üçün səfər edən və səfər edəcək azərbaycanlı turistlərin baş vermiş yanğınla əlaqədar istirahətləri yarımçıq qalıb. Belə olan halda vətəndaşlarımız turizm şirkətlərinə ödədikləri vəsaiti geri almaq istəyir. Lakin turizm şirkətləri müəyyən bəhanələr gətirərək vətəndaşların pulunu qaytarmır. Hətta bəzi turizm şirkətləri turistləri tətil üçün yanğının söndürüldüyü ərazilərə yönəltməyə çalışır. Bu isə yerli turistlərin narazılığına səbəb olur.

  • “Turun tarixini dəyişməkdə, ya da hansısa kompensasiyaların tətbiqində müştərilərə güzəştlər edilə bilər”

“Milenium Konqres” turizm şirkətinin rəhbəri, turizm eksperti Ruslan Quliyev bildirdi ki, agentliklər və hava yolları şirkəti hazırkı vəziyyətdə turistlərə maksimum kömək etməlidir: “Türkiyədə baş verən hadisələri üzüntü ilə qarşılayırıq. Turizm agentlikləri ilə müştərilər arasında bu cür hallar dünyanın müxtəlif ölkələrində də yaşanır. Təbii fəlakətlər – sunami, zəlzələ, yanğın baş verdikdə, turistlərin həyat və sağlamlığına təhdidlər olanda, istehlakçının hüquqları qorunmalıdır. Ən vacibi insan faktorudur. Lakin deməzdim ki, agentliklər tərəfindən müştərilərin səfər üçün ödədiyi məbləğ qaytarılmır. Artıq bəzi şirkətlərdə bu proses başlayıb, bəzilərində proses zəif irəliləyir, bəzilərində isə hələ də bu istiqamətdə maarifləndirməyə ehtiyac duyulur. İstər AZAL, istərsə də “Türk Hava Yolları” məsələni anlayışla qarşılamalıdır. Ya turun tarixini dəyişməkdə, ya da hansısa kompensasiyaların tətbiqində müştərilərə güzəştlər edilə bilər”.

Günel CƏLİLOVA

Son xəbərlər