Yardımlı Rayon Heydər Əliyev Mərkəzində Gənclərin İnkişaf və Karyera Mərkəzi (GİKM) Yardımlı nümayəndəliyinin birgə təşkilatçılığı ilə keçirilən “Zəfərimiz” adlı tədbir iştirakçılar tərəfindən maraqla qarşılandı. Mərkəzin rəhbərliyi və əməkdaşlarının, GİKM-in direktor vəzifəsini icra edən Səfail İbişlinin, gənc könüllülərin, eləcə də Səfərbərlik və Hərbi Xidmətə Çağırış üzrə Dövlət Xidmətinin Yardımlı rayon bölməsinin əməkdaşı leytenant Samir Osmanovun qatıldığı tədbir torpaqlarımız uğrunda canını qurban vermiş Vətən oğulların əziz xatirəsi bir dəqiqəlik sükutla yad olunmaqla başlandı.
Mərkəzin direktoru vəzifəsini icra edən Aqil Ağayev tədbir iştirakçılarını salamlayıb ötən ilin 27 sentyabrında başlanan və 44 günə tarixi zəfərimizlə başa çatan Vətən müharibəsi haqda geniş danışdı. Leytenant S.Osmanov öz çıxışında isə torpaq uğrunda gedən haqq savaşımız zamanı Azərbaycan ordusunun göstərdiyi şücaət, xalqımızın vətənpərvərlik nümayiş etdirən qəhrəman oğullarının könüllü orduya yazılması, gənclərin hərbi-vətənpərvərlik ruhunda tərbiyə olunmasının vacibliyi və bu mövzuda maarifləndirici tədbirlərin keçirilməsinin əhəmiyyəti barədə söhbət açdı. S.Osmanov həm də mövzu ilə bağlı tədbir iştirakçılarının suallarını cavablandırdı. Tədbirdə mərkəzin 3D kinozalında “Dəmir Yumruq” sənədli filmin nümayişi böyük razılığı səbəb oldu. Axırda isə mərkəzin əməkdaşı Elşən Abışov tədbir iştirakçılarını mərkəzin ekspozisiya zalında nümayiş olunan eksponatlarla tanış etdi.
Onu da bildirim ki, tədbirdə respublikamızda tətbiq olunan karantin rejiminin bütün tələbləri gözlənilirdi.
Zəfər ORUCOĞLU, Azərbaycan Jurnalistlər Birliyinin üzvü
