Bu günlərdə Dövlət İmtahan Mərkəzi tərəfindən II və III ixtisas qrupları üzrə 14-15 iyul 2021-ci il tarixlərində keçirilmiş qəbul imtahanlarının nəticələri elan edilib.
Məlumat üçün bildirək ki, II ixtisas qrupunda 2-ci mərhələ üzrə ən yüksək nəticəni, yəni 400 balı cəmi 2 tələbə toplayıb. III ixtisas qrupunda isə bu mərhələ üzrə maksimum bal ümumiyyətlə yoxdur. Hər iki mərhələ üzrə heç bir qrupda 700 bal toplayan abituriyent olmayıb.
Qeyd edək k, bu ildən fərqli olaraq ötən il 3-cü ixtisas qrupu üzrə 5 nəfər, 2-ci qrup üzrə 2 nəfər maksimum 700 balı toplamışdı.
“Abituriyentlərin zəif nəticə göstərməsinin səbəblərindən biri də onlayn tədris zamanı riyaziyyat fənninin keyfiyyətli keçirilməməsidir”
Ekspertlər hesab edir ki, nəticələr ötən illər ilə müqayisədə çox aşağıdır. Bu il nəticələrin nə səbəbdən aşağı olması barədə fikir bildirən təhsil eksperti Kamran Əsədov qeyd etdi ki, pandemiya qəbul imtahanlarına birmənalı şəkildə təsir edib: “Elə bunun nəticəsidir ki, nə II, nə də III ixtisas qrupunda 700 bal toplayan olmadı. Bu onlayn tədris zamanı bir sıra fənnlərin öyrədilməsində ciddi problemlərin olduğunu göstərdi. Onu da nəzərə almaq lazımdır ki, yüksək bal toplayan olmasa da, 250-500 bal arası toplayanlar xüsusən II ixtisas qrupu üzrə daha çox oldu. II ixtisas qrupundan olan abituriyentlərin bu nəticələrinə əsasən demək olar ki, artıq ali təhsil müəssisələrinə qəbul olublar. II ixtisas qrupunun abituriyentləri daha şanslıdırlar. Çünki onlar 150 bal ilə dövlət ali təhsil müəssisələrinə qəbul olma şansına malikdirlər”.
Ekspertin sözlərinə görə, III ixtisas qrupunda isə vəziyyət gərgindir. Xüsusən də 250-350 bal arası toplayan abituriyentlərin ali məktəblərə qəbul olma şansı bir qədər məhduddur. Onların hər biri ixtisas seçimində diqqətli olmalıdırlar: “Abituriyentlərin zəif nəticə göstərməsinin səbəblərindən biri də onlayn tədris zamanı riyaziyyat fənninin keyfiyyətli keçirilməməsidir. Onlayn dərs zamanı şagirdlər riyaziyyat fənnnin tədrisi ilə bağlı ciddi problemlər yaşadılar. Çünki onlayn dərs zamanı riyaziyyat fənnin tədrisi keyfiyyətli deyildi. Blok imtahanından 400 bal toplayan abituriyent attestat imtahanından maksimum nəticə qazana bilmədi. Bu məhz riyaziyyat fənninə görə idi. Bu da bir daha onu göstərir ki, onlayn dərslər heç də tədrisin əlçatanlığına gətirib çıxarmır. Çünki bütün ailələrin kompüteri, planşeti, telefonu, interneti yoxdur. Nəzərə almaq lazımdır ki, bəzi texniki və təbiət fənnləri var ki, onların onlayn qaydada tədrisi mümkün deyil. Bundan şagirdlərlə birlikdə müəllimlər və valideynlər də əziyyət çəkirlər. Ona görə də nəticə zəif olur”.
Günel CƏLİLOVA
