Sosial şəbəkələrdə Biləsuvar rayonunun Ağalıkənd və Təzəkənd kəndlərində yaranan su probleminə görə sakinlərdən bir qismi Biləsuvar RİH-in qarşısında etiraz aksiyası keçirməsi ilə bağlı məlumat yayılıb.
Yerli sakinlər suvarma suyunun qıtlığının yaranmasında əsas səbəb kimi son dövrlərədək qışlaq otaqları kimi istifadə edilən 50 min hektaradək ərazinin əkin sahəsi kimi istifadə edilməsini göstərir: “Həmin sahələr yüksək vəzifəli məmurlar tərəfindən ələ keçirilərək əkin sahəsi kimi istifadə olunur. Belə ki, Araz çayından Biləsuvara gələn suvarma suyu bu sahələrin suvarılmasına sərf olunur. Bu səbəbdən də yerli sakinlər su qıtlığından əziyyət çəkir”.
Sakinlər onu da bildirir ki, əkin sahələrinə su verilmədiyindən əkilənlər qızmar günəş altında məhv olur.
Onu da qeyd edək ki, aksiya zamanı 4 nəfər saxlanılıb. İyulun 29-da (bu gün) Biləsuvar rayon məhkəməsinin qərarı ilə saxlanılanlar təqsirli bilinərək hər biri barəsində 15 sutka inzibati həbs tənbeh tədbiri tətbiq olunub.
“Azərsu” ASC - Anar Cəbrayıllı: “Həmin kəndlərdəki modul qurğulara hazırda maşınlarla suyun daşınması həyata keçirilir”
Biləsuvar rayonunda yaşanan su problem ilə bağlı danışan “Azərsu” ASC-nin İctimaiyyətlə əlaqələr şöbəsinin rəhbəri Anar Cəbrayıllı bildirdi ki, rayon rəhbərliyi ilə əlaqə saxlanılıb: “Həmin kəndlərdəki modul qurğulara hazırda maşınlarla suyun daşınması həyata keçirilir. Problem içməli su problemi deyil. Suvarma ilə bağlıdır”.
Mayis Əliyev: “Torpaqların suvarılmasını güzəştli və ədalətli şəkildə aparmaq üçün dövlət yeni proqram qəbul etməlidir”
Sosial sahə üzrə ekspert Mayis Əliyev qeyd etdi ki, rayonlarda müxtəlif ranqlı məmur və iş adamlarının böyük əkin və örüş sahələri mövcuddur, su, ilk növbədə, həmin yerlərə verilir. Burada növbəlilik sistemi pozulur. İstifadə olunan suyun haqqının ödənilməsində də problem var. Həm də istər məmurun olsun, istərsə də sadə vətəndaşın, kimliyindən asılı olmayaraq, əkin sahələri suvarılmalıdır. Çünki həmin sahələrdə kənd təsərrüfatı məhsulları istehsal edilir: “Odur ki, suvarma sistemlərinin yenidən qurulması vacibdir. Bölgələrdə su itkisi də ciddi məsələdir. Bunun üçün rayonlarda su istehsalat birlikləri yaradılıb. Torpaqların suvarılmasını güzəştli və ədalətli şəkildə aparmaq üçün dövlət yeni proqram qəbul etməlidir”.
Məsələ ilə bağlı Biləsuvar rayon İcra Hakimiyyəti ilə müraciət etdik. Lakin qurumdan suallarımıza cavab verən tapılmadı.
Günel CƏLİLOVA
