“44 günlük Vətən müharibəsi hamımızın fəxr etdiyi, qürur duyduğu müzəffər ordumuzun qələbəsi ilə nəticələndi. Allah bütün şəhidlərimizə rəhmət eləsin, qazilərimizə can sağlığı versin. O dövrdə bir sıra telekanallar möhtəşəm qələbəmizin təqdimatına hazır olmadıqlarına görə, tələsik verilişlər verirdilər, bu da başa düşülən idi.
Amma qələbədən uzun müddət keçməsinə baxmayaraq bu telekanalların bəziləri yenə də hazırlıqsız görsənir və ekspertlərin rəyinə məhəl qoymadan yanlış təqdimatlar edirlər. Mən bir tarixçi olaraq bir məsələni vurğulamaq istəyirəm ki, iki-üç ay əvvəl “Xəzər” TV-yə və ATV-yə müraciət etdim, məqsəd də onlara yanlış təqdimatlarını aradan qaldırmaları üçün kömək etmək idi. Bu kanallar şəhidlərimizin təqdimatında yanlışlıqlara yol verirdilər. “Qəhrəman şəhidlərimiz tarix yazdılar” deyirdilər, amma qəhrəman şəhidlərimiz tarixi yazmayıblar, tarixi yaradıblar, tarixi biz tarixçilər yazırıq. Telekanallara bir alim kimi tövsiyə verməkdə məqsədim texniki yanlışlıqları aradan qaldırmalarına kömək etmək idi. “Xəzər” TV mənə operativ cavab verdi və mənim məktubumu aidiyyatı şöbəyə yönəltdiklərini bildirdilər. Ondan sonra gördüm bəli, bu televiziya təqdimatda yol verdikləri texniki yanlışlığı aradan qaldırırlar və işıqlandırılma düzgün mövqedə gedir. Amma ATV-də bu görünmədi. Hər gün eyni təqdimatın şahidi olduğum üçün yenidən bu məsələyə qayıtmağa məcbur oldum”. Bunu “Bakı-Xəbər”ə açıqlamasında AVCİYA-nın vitse-prezidenti, tarix elmləri doktoru, professor Məhərrəm Zülfüqarlı deyib.
“Yol verdiyi yanlışlıq yazılı şəkildə ATV-nin diqqətinə çatdırılsa da, kanal bunu düzəltmək əvəzinə yenə də təkrar edir”
M.Zülfüqarlı qeyd etdi ki, tarix yazan və tarix yaradanlar barədə böyük Atatürkün bir fikri var. “Atatürk belə qeyd edir: “Tarixi yazmaq tarixi yaratmaq kimi önəmlidir. Yazan tarixi yaradana bağlı qalmazsa, dəyişməz gerçək insanlığı çaşdırmaq olacaq. Tarix gerçəklikləri yanıltan bir sənət deyil, tərsinə, onu açıb göstərən bilim alanı olmalı”. Yəni burada əsas məna ondan ibrarətdir ki, böyük şəxsiyyət olan Atatürk bizə aydınlaşdırır ki, insanlar tarixi yazanlara və tarixi yaradanlara bölünür. Tarixdə elə böyük şəxsiyyətlər ola bilər ki, onlar həm tarixi yarada, həm də yaza bilər. Bəli, bu gün bizim tarixi yaradan qazilərimizin içində tarix müəllimləri də, tarixçilər də var. Onlar oturub öz qəhrəmanlıqlarını, döyüş yoldaşlarının şücaətini, igidliyini əsər şəkilində yazarlarsa bunlar hər hər iki funksiyanı yerinə yetirə bilər. Amma Prezidentimiz də qeyd etdiyi kimi bizim qəhrəman şəhidlərimizin mütləq əksəriyyəti 2003-cü ildə uşaq olan gənclər olub. Bu gəncliyin etdiyi qəhrəmanlıqları yazmaq, onları xalqa, dünyaya tanıtmaq hər bir tarixçinin borcudur. Lakin bəzi telekanallar, xüsusən də ATV kanalı demək olar ki, hər gün xəbərlərdə şəhidlərimizi tarix yazanlar kimi təqdim edir. Bu da texniki səhvdi. Yol verdiyi yanlışlıq yazılı şəkildə ATV-nin diqqətinə çatdırılsa da, kanal bunu düzəltmək əvəzinə yenə də təkrar edir. Bunlar birdəfəlik bilməlidirlər ki, qəhrəman şəhidlərimiz tarix yaradanlardır, tarix yazanlar deyillər. Şəhidlərimizin yaratdıqları tarix çox böyük tarixdi və illərlə tarixçilər, tədqiqatçılar araşdırmalar, tədqiqatlar aparmalıdırlar, canlı şahidlərin fikirlərini, xatirələrini toplayıb yazmalıdırlar. Tarixçilər də tarixi yaradanlara sadiq qalmalıdırırlar ki, baş verənləri təhrifə yol vermədən, doğru-dürüst yazsınlar. Yenə də deyirəm, mənim narahatçılığım ondan ibarətdir ki, hamımızın fəxrt etdiyimiz qəhrəmanlarımız düzgün təqdim edilmir, onların düzgün təqdim edilməsini istəyirəm. Çünki buna dünya baxır, elmi mərkəzlər izləyir, məlumat toplayırlar və telekanalların yol verdiyi bu səhvləri biz özümüz düzəltməsək sonra bu problem olacaq, hətta düşmənlərimiz bundan bizə qarşı istifadə də edə biləcəklər. Yanlış təqdimat bizi Azərbaycanı istəməyən qüvvələrin hədəfinə çevirə bilər. Yəni biz Azərbaycan cəmiyyəti olaraq öz səviyyəmizi göstərməliyik və şəhidlərimizi də yaratdıqları tarixə görə xalqa tanıtmalıyıq, tarixçilərdən də tələb etməliyik ki, bu şərəfli tarixi layiqincə yazaraq xalqa təqdim etsinlər. ATV-nin təqdimatında anlaşılmazlıq var. Belə çıxır ki, qürur ünvanımız şəhidlərimiz tarix yazıblar, bu halda tarixçilərə ehtiyac yoxdur. Bu da məntiqsizdir. Bizim böyük dövlətlərimiz, qəhrəman türk tayfalarımız olub, onlar da tarixdə böyük işlər görüblər. Bizim babalarımız çox işlər görsələr də, amma təəssüflər olsun ki, nisbətən az tarix yazıblar. Ona görə də, erməni kimi mənfur qonşularımız olmayan tarixlərini “yazıblar” dünyaya saxta tarix təqdim ediblər. Müqayisə olunanda da biz daim görürük ki, tarixi yazıb təqdim etmək məsələsində bizim babalarımız gördükləri iş qədər böyük işlər görməyiblər. Babalarımız tarixi yaradıblar, amma onu geniş yazmayıblar. Biz artıq XXI əsrdə yaşayırıq, görüdüyümüz böyük işi, 44 günlük Vətən müharibəsində qazandığımız qələbəni Azərbaycan tarixçiləri geniş səviyyədə tədqiqata cəlb etməlidirlər, kitablar yazmalıdırlar...” - deyə M.Zülfüqarlı qeyd etdi.
İradə SARIYEVA
