Hazırda ölkədə sürətlə vaksinasiya prosesi həyata keçirilir. Buna baxmayaraq virusa yoluxma sayında artım müşahidə edilir. Artıq rəqəmlər 700-ü ötüb. Onu da qeyd edək ki, bu, bir neçə müddət sonra müşahidə olunan ən yüksək göstəricidir.
Prezidentin köməkçisi, Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov bir neçə gün öncə jurnalistlərə açıqlamasında bildirib ki, epidemioloji vəziyyət pisləşsə, qapanmalar olacaq.
Maraqlıdır, belə olan təqdirdə toyların təşkilinə yenidən qadağa qoyula bilərmi?
Mərdan Əliyev: “Toyların keçirilməsi tamamilə qadağan olunmalıdır”
Həkim-infeksionist Mərdan Əliyevin sözlərinə görə, vətəndaşların COVID-19 pasportunu əldə etməsinə ciddi ehtiyac var: “Yəni 2 variant var, ya COVID-19 pasportu olanlar yalnız toylara buraxılmalıdır. Buna ciddi nəzarət olunmalıdır. Ya da toyların keçirilməsi tamamilə qadağan olunmalıdır. Buraya toylardan əlavə iri ticarət mərkəzləri, ictimai iaşə müəssisələri də daxildir. Zənnimcə, yaxın zamanlarda toyların keçirilməsinin qadağan olunması yenidən gündəmə gələ bilər. Hazırda COVID-19 sürətlə yayılmaqdadır. Yoluxanların əsas hissəsini əvvəllər xəstəliyi keçirməyənlər və vaksin olunmayanlardır. Yəni virusla ümumiyyətlə təmasda olmayanlardır. Belə olduqda isə yoluxanlar xəstəliyi kifayət qədər ağır keçirirlər”.
Adil Qeybulla: “Yoluxmanın daha da böyük rəqəmlərə çatmaması üçün yenidən karantin qaydalarının tətbiq edilməsi vacib ola bilər”
Professor, həkim ekspert Adil Qeybulla bildirdi ki, yoluxmanın daha da böyük rəqəmlərə çatmaması üçün yenidən karantin qaydalarının tətbiq edilməsi vacib ola bilər: “Əvvəldən məclislərin təşkil edilmə mexanizmi düzgün qurulmayıb. Bu toyların keçirilmə forması əvvəldən düzgün qurulmadı. Hazırda müxtəlif şayiələr gəzir ki, normadan atıq sayda toy edilib. Bunlar nə dərəcədə doğrudur, deyə bilmərəm, amma şayiələr hər zaman nəyəsə əsaslanır. Düşünürəm ki, toyların keçirilməsi mexanizmi tam detallı və yaxşı formada olsaydı, normal olardı. Hazırda isə açıq havada 100 nəfər adamla bu toyları təşkil etmək olar”.
Günel CƏLİLOVA
