Məlum olduğu kimi, sentyabrın 1-dən yaşı 18-dən yuxarı olan şəxslər qapalı məkanda fəaliyyət göstərən ictimai iaşə müəssisələri, mehmanxanalar və iri ticarət mərkəzlərindən yalnız COVID-19 pasportu olduğu halda istifadə edə biləcəklər.
Ümumdünya Səhiyyə Təşkilatı əhali arasında vaksinasiya səviyyəsinin ən azı 65 faizdən çox olduğu halda əvvəlki normal həyata qayıtmağın mümkünlüyü qənaətindədir. Nazirlər Kabineti yanında Operativ Qərargahın məlumatına görə, indiyədək 4 milyon 564 min peyvənd aparılıb. Hər iki doza peyvənd olunanların sayı isə 1 milyon 910 min nəfərdir. Ümumilikdə, Azərbaycanda əhalinin cəmi 19.1 faizi hər iki doza peyvənd olunub. Məlum olur ki, tam vaksinasiya səviyyəsinə görə Azərbaycan MDB-də birinci olsa da peyvənd olunan vətəndaşlarımızın sayı hələlik ÜST-nin 65 fazilik tövsiyyəsindən çox aşağıdır. Görünən odur ki, bizdə vaksinasiya səviyyəsi hələ çox aşağıdır. Digər tərəfdən də son vaxtlar ölkədə virusa yoluxmalarda artım müşahidə edilir. Bu isə peyvənd olunanların sayının artırılmasına ciddi ehtiyac olduğunu ortaya qoyur.
Maraqlıdır, vaksinasiya səviyyəsi və hansı tədbirlərin görülməsinə zərurət var?
“Ümumi peyvəndləməni heç olmasa 70 faiz səviyyəsinə çatdırmalıyıq ki, əhalimizi qoruya bilək”
Məsələyə münasibət bildirən Tibb Universitetinin Farmakologiya kafedrasının dosenti Aydın Əliyevin sözlərinə görə, vaksinasiya səviyyəsinin aşağı olması müxtəlif amillərlə bağlıdır: “Bəzi insanlar vaksinasiya olunma məsələsinə səhlənkar yanaşırlar. Elələri var ki, çəkingənlik göstərir. Bunun hansısa fəsadlar verəcəyindən ehtiyat edirlər və s. Ancaq bir həkim kimi hesab edirəm ki, bu cür yanaşmalar doğru deyil. Qaydaları qorumaq lazımdır, başqa çıxış yolu yoxdur. Hamı bir nəfər kimi vaksin vurdurmalıdır. İnsanların sıx olduğu yerlərdə mütləq maskalardan istifadə edilməlidir. Xüsusən də toylarda qaydalara ciddi əməl etmək lazımdır. Bütün bunlar mütləqdir. Nə qədər ki, bu amillər nəzərə alınmır, o zaman yoluxmalar çox olacaq. Bütün mümkün vasitələrlə çalışmaq lazımdır ki, əhali vaksinasiya olunsun. Bununla yanaşı, insanlar təmiz qidalara önəm verməlidilər və mümkün qədər çox piyada gəzməlidilər. Ancaq bütün hallarda peyvənd vacibdir. Hamılıqla peyvənd olunmalıyıq. Ümumi peyvəndləməni heç olmasa 70 faiz səviyyəsinə çatdırmalıyıq ki, əhalimizi qoruya bilək. Koronavirus bəlasından xilas olmaq üçün ən sadə məsələlərə diqqət yetirməliyik. Bir məqamı xüsusi qeyd etmək istəyirəm ki, ölkədə keyfiyyətsiz siqaret biabırçılığı var. Keyfiyyətsiz siqaretlər necə gəldi satılır. Siqaretin hər biri ziyanlıdır. Xüsusən də keyfiyyətsiz siqaretlərin ziyanı daha böyükdür. Bu cür siqaretlər tənəffüs orqanlarında fəsadlar yaradır və nəticədə insanların virusa yoluxma risqi artır. Bütün bunlar bu və ya digər dərəcədə bir-biri ilə bağlı olan məsələlərdir”.
Tanınmış həkim hesab edir ki, pandemiya bəlasından xilas olmaq üçün bütün vasitələrdən kompleks şəkildə istifadə edilməlidir.
Vidadi ORDAHALLI
