Xətai rayonu, Süleyman Vəzirov küçəsi 22 ünvanında yerləşən, "Ləpələr MTK" tərəfindən inşa olunmuş binaların sakinləri ciddi problemlərlə üzləşdiklərini bildirirlər.
Sakinlər ünvanladıqları müraciətdə yazıblar ki, 2008-2009-cu illərdə təhvil verilmiş 4 binada 12 ildir yarımçıq qalan işlər hələ də tamamlanmayıb: "Liftlər Belarus istehsalıdır, çox vaxt işləmir, yüksək mərtəbələrə çıxıb-düşmək xüsusən yaşlı sakinlər üçün əzaba çevrilir. Binanın qarajı tikilən vaxtdan necə var, elə də qalıb, betona heç rəng də vurulmayıb. Həyətin girişinə qoyulmuş şlaqbaum da işləmir, kim istəyir girir-çıxır, uşaqların tərpənməsinə belə imkan yoxdur. Hər yer avtomobil dayanacağına çevrilib, kim istəyir gətirib avtomobilini həyətdə saxlayır".
Şikayətdə daha sonra qeyd olunur ki, bloklar, dəhlizlər, komendantların oturduğu budkalar da pis gündədir. Amma bütün ödənişlər vaxtlı-vaxtında yığılır. "Kimin qarajı varsa, ayda 100 manat ödəniş edir. Birotaqlı evlərdən 10, ikiotaqlılardan 20, üçotaqlı evlərdən isə aylıq 30 manat pul toplanır. Amma yığılan vəsaitlər sözügedən problemlərin aradan qaldırılmasına sərf olunmur", - deyə sakinlər bildiriblər.
Şikayətçilər onu da deyiblər ki, MTK rəhbərliyi binanın qarajında yeni "moyka" tikir: "Təsəvvür edin, yağış, qar yağanda zirzəmi az qala dizəcən suyun içində olur. Bu şəraitdə hələ bir "moyka" da açırlar, fikirləşmirlər ki, daha böyük biabırçılıq olacaq".
Sakinlər təsvir olunan dözülməz vəziyyətdən tez-tez kooperativin rəhbərliyinə şikayət etsələr də, nəticəsi olmayıb. Bir neçə dəfə problemlərin həlli ilə bağlı toplantı keçirilməsi təklif olunub, amma rəhbərlik tərəfindən rədd edilib.
Qeyd edək ki, yeni tikili sayılan binaların böyük əksəriyyətində bu problem var. Binanı tikən MTK-lar kommunal xidməti də öz üzərlərinə götürür və bunun müqabilində ürəkləri istədikləri tarifi müəyyənləşdirirlər. Ancaq təəssüf ki, görülən işlər verilən pullara adekvat olmur.
Bu şikayətlə bağlı "Ləpələr MTK"nın mövqeyini öyrənmək üçün onların əlaqə vasitələrini axtardıq. İnternet üzərindən verdiyimiz axtarışda bu MTK-nın adı yalnız ev satan elan saytlarında çıxdı. Kimsə evini satanda binanın sözügedən MTK-da olduğunu qeyd edib. Şəhərin “Xətai” metrostansiyası ətrafında bahalı mənzillər satan bu MTK haqda internetdə heç bir məlumatın olmaması doğrudan da ciddi şübhə doğurur. Heç bir sosial şəbəkə platformasında qeydiyyatdan keçməyən bu MTK-nın sakinlərdən müxtəlif adlarla yüksək məbləğdə “tarif”lər toplaması nədən xəbər verir?
İqtisadçı-ekspert Günay Hüseynova “Bakı-Xəbər”ə açıqlamasında bildirdi ki, MTK-ların əksəriyyəti heç bir iqtisadi səbəb olmadan “kommunal pulu” adlandırdıqları aylıq ödəniş məbləğləri təyin edir və onu tez-tez artırırlar: “ Bu isə bir sıra yeni inşa edilmiş yaşayış binalarında sakinlərlə MTK sahibləri arasında narazılığa səbəb olub. Hətta bəzi MTK sahibləri “bir az da uzağa gedərək”, hər evin kvadratmetri üçün aylıq 1 manat 50 qəpik ödəniş təyin ediblər. Bu isə o deməkdir ki, 130 kvadratmetrlik 3 otaqlı mənzil sahibi ayda 200 manata yaxın “kommunal pulu” ödəməlidir. Əsaslandırılması mümkün olmayan ödəniş məbləğidir. Birmənalı şəkildə, MTK sahibləri havadan götürülmüş rəqəmlərə söykənib aylıq ödəniş tələb edə bilməzlər. Ümumiyyətlə, MTK sahibləri ayrıca, yəni sakinlərin və ya onların təmsilçilərinin razılığı olmadan, sərbəst şəkildə aylıq ödəniş məbləğini müəyyənləşdirmək hüququna malik deyillər. Mənzil Məcəlləsinin 109.5-ci maddəsində qeyd edilir ki, “kooperativ binanın tikintisi və yenidən qurulması tam başa çatdıqdan, həmin binada mövcud olan bütün yaşayış və qeyri-yaşayış sahələrinə mülkiyyət hüququ qanunvericilikdə müəyyən olunmuş qaydada mənzil-tikinti kooperativinin üzvlərinə keçdikdən sonra, altı ay ərzində mənzil-tikinti kooperativi qanunvericiliklə müəyyən olunmuş qaydada ləğv edilməli və ya mənzil mülkiyyətçilərinin müştərək cəmiyyətinə çevrilməlidir”.
Ekspertin sözlərinə görə, daha məqsədəuyğunu kommunal xidmətlərlə təmin edilmiş və tam yaşayışlı binaların daha sadə şərtlərlə dövlət qeydiyyatına alınıb, “kupça” ilə təmin olunmasıdır: “Bununla belə, qanunvericiliklə kommunal xidmətlərlə təmin edilmiş, amma hələlik dövlət qeydiyyatına alınmayan binalar üçün də mənzil mülkiyyətçilərinin müştərək cəmiyyətlərinin yaradılması məcburi hala gətirilə bilər. Digər tərəfdən, əksər MTK sahibinin yüksək aylıq ödənişlər müəyyənləşdirdiyini nəzərə alsaq, o zaman Nazirlər Kabineti tərəfindən maksimum aylıq ödənişlərin tətbiq edilməsi məqsədəuyğun olardı. Bu zaman MTK sahibləri istədikləri rəqəmi aylıq ödəniş kimi elan edə bilməyəcəklər”.
Məhəmmədəli QƏRİBLİ
