5 saylı Uşaq Vərəm Sanatoriyasının içməli su təchizatı və kanalizasiyası yoxdur. 11 mart tarixində 5 saylı Uşaq Vərəm Sanatoriyasında içməli suyun alınması ilə bağlı müqavilə bağlanıb. Sanatoriyanın keçirdiyi kotirovka sorğusunun qalibi “Gemi İnşaat 2017” MMC olub.
Şirkətlə 30 min manat məbləğində müqavilə bağlanılsa da, sanatoriya üçün hansı həcmdə içməli su tədarük edəcəyi ilə bağlı məlumat açıqlanmayıb.
2 manat nizamnamə kapitalına malik “Gemi İnşaat 2017” MMC 23.06.2017-ci il tarixində yaradılıb. Şirkət indiyə kimi bir dəfə satınalmalarda qalib olub. Belə ki, 22.12.2020-ci il tarixində şirkətlə Gədəbəy Rayon Mərkəzi Xəstəxanasının ərazisi üçün dekorativ ağacların və qızılgül kollarının alınması ilə bağlı 9513.93 manatlıq müqavilə bağlanıb.
Bundan başqa, 5 saylı Uşaq Vərəm Sanatoriyası ötən il içməli suyun daşınmasına 14 min 991 manat 60 qəpik xərcləyib və 30.10.2020-ci il tarixində "Fatimə R" MMC ilə müqavilə bağlayıb. Həmin gün sanatoriya ilə "Fatimə R" arasında 10 min manat məbləğində çirkab suyun daşınması ilə bağlı müqavilə imzalanıb.
Diqqətçəkən məqam ondan ibarətdir ki, o cür profilli sanatoriyanın kanalizasiyası yoxdur. Adıçəkilən sanatoriya Bakının Xəzər rayonunda yerləşir. Hansı dövrdə yaşayırıq, sanatoriyanın kanalizasiyasının və daimi su təchizatının olmaması nə deməkdir?
Sözügedən məsələyə aydınlıq gətirmək üçün 5 saylı Uşaq Vərəm Sanatoriyasının 0124546613 əlaqə nömrəsinə gün ərzində bir neçə dəfə zəng vusaq da, telefonun dəstəyini götürən olmadı. İnternet üzərindən araşdırma zamanı məlum oldu ki, sanatoriya ilə əlaqə nömrəsi yalnız yuxarıda göstərilən telefon nömrəsidir. Həmin nömrəyə edilən zənglərə də cavab verən yoxdur.
“Bununla bağlı tenderlərin keçirilməsində məqsəd büdcədən pul silməkdir”
Məsələ ilə bağlı fikirlərini baki-xeber.com-la bölüşən ekspert İlqar Hüseynlinin fikrincə, vərəm profilli sanatoriyada kanalizasiya və su təchizatı sisteminin olmaması anormal haldır: “Eyni zamanda, bu biabırçılıqdır. Burada məqsəd dövlətin büdcə vəsaitlərini silməkdir. Halbuki, belə müalicə mərkəzində daimi su təchizatının olması mütləqdir. Yoxdursa, o zaman sözügedən sanatoriya bağlanmalıdır. Daha müasir və dövrün tələblərinə cavab verən sanatoriya inşa edilməlidir. Belə sanatoriyalarda sanitar normaların tələblərə cavab verməməsi qəbuledilməzdir. Söhbət vərəm kimi yoluxucu xəstəliyə aid sanatoriyadan gedir. Belə sanatoriyanın kanalizasiya sistemi mütləq olmalı və çirkab suların axıdılmasına xüsusi nəzarət edilməlidir. Yoxsa, belə anormallığa heç cür bəraət qazandırmaq olmaz. Ümumilikdə, təkcə 5 saylı Uşaq Vərəm Sanatoriyasında deyil, Bakıətrafı ərazilərdə yerləşən internat məktəbləri və ixtisaslaşmış sanatoriyaların çoxunda belə xoşagəlməz vəziyyət hökm sürür. Həmin mərkəzlərin bir çoxu istismar müddətini başa vurub. Onların fəaliyyəti zamanla uzlaşmır. Bütün kanalizasiya sistemləri bərbad vəziyyətdədir. Bu cür obyektlərin saxlanması anormal haldır. Dövlət büdcəsindən bununla bağlı böyük vəsait ayrılır, tenderlər keçirilir. Reallıq ondan ibarətdir ki, bütün bunlarda məqsəd, sadəcə, büdcədən pul silməkdir. Yoxsa, çoxdan sözügedən problemlər öz həllini tapmış olardı”.
Ekspert onu da qeyd etdi ki, Səhiyyə Nazirliyi bu məsələni xüsusi diqqətdə saxlamalıdır.
Vidadi ORDAHALLI
