İstənilən idarə və müəssisə ilə əlaqə saxlamaq istəyərkən əvvəlki dövrlərdə məlumat-soraq kitabçalarına baş vurub həmin qurumların ünvanlarını, telefon nömrələrini öyrənirdiksə, indi artıq internet resurslarının yaratdığı imkandan istifadə edirik.
Amma təəssüflər olsun ki, həmişə axtardığımız ünvanı, telefon nömrəni tapa bilmirik.
Dövlət orqanlarının bir çoxunun ünvanı, telefon nömrəsi internet resurslarında yanlış göstərilib. Bəzi qurumların əlaqə telefonları və telefon nömrələri isə internet-axtarış platformalarında yoxdur.
Məsələn, elə idarə və müəssisələr olur ki, onların ünvanlarını və telefon nömrələrini əldə etmək üçün bütün internet-axtarış sisteminə baş vurursan, amma telefon nömrəsini və ünvanı ya tapmırsan, tapanda da həmin telefonla əlaqə saxladıqda “bura ora deyil, səhv düşmüsünüz” sözünü eşidirik. Bütün dövlət idarə və müəssisələri olmasa da, bir sıra qurumların internet resurslarında rekvizitləri bərbad gündədir, telefon nömrələri, ünvanları yanlış göstərilib. Heç şübhəsiz ki, bu da ciddi problemlər yaradır, ən azından, media qurumlarının əməkdaşlarının hər hansı bir sahədə mövcud olan problemləri araşdırıb ictimaiyyətə düzgün məlumat ötürməsinə maneçilik törədir. Jurnalist bəzən internetdən tapdığı bir nömrəyə azı yüz dəfə zəng vurur, sonda isə “bura ora deyil” cavabını eşidir.
“Bakı-Xəbər”in əməkdaşları internetdən götürdükləri ünvanların səhv olması ucbatından dəfələrlə bu problemlə üzləşiblər. Bu günlərdə əməkdaşlarımız yenə analoji problemlə üzləşiblər. Əməkdaşımız Salyan Rayon Gənclər və İdman İdarəsinə aid olduğu qeyd edilən 0212555170 telefon nömrəsi ilə əlaqə saxlamaq istəsə də, ona bu nömrənin adıçəkilən quruma aid olmadığı bildirilib, halbuki, həmin telefon nömrəsi internet resurslarında bu idarənin telefon nömrəsi kimi təqdim edilib. Belə məqamlar çoxdur və çoxlarımız bununla üzləşirik.
Dövlət qurumlarının bir çoxunun internetdə ünvanlarının və telefon nömrələrinin səhv göstərilməsi nə ilə bağlıdır? Bu idarə və qurumlar özləri vətəndaşın, medianın müraciətindən yayınmaq üçün buna yol verirlər, yoxsa başqa bir səbəb var?
Sosial sahə üzrə mütəxəssislər qeyd edirlər ki, nəinki dövlət təşkilatlarının, həmçinin, ictimai qurumların da çoxunun əlaqə nömrələri, ünvanları internetdə səhv göstərilir. Bəzi mütəxəssislər hesab edirlər ki, çox zaman bu yanlışlığa idarə və müəssisələrin özləri rəvac verirlər. Yəni ünvanın və telefon nömrəsinin səhv qeyd edildiyinə göz yumurlar. Bunun da səbəbinin onların mediadan qaçması ilə bağlı olduğunu deyən ekspertlərin fikrincə, bunu əsasən o qurumlar edirlər ki, onların fəaliyyətində qüsurlar çoxdur.
“...o dövlət qurumları haqqında ictimai qınaq kampaniyası həyata keçirilməlidir”
Sosial-iqtisadi sahə üzrə tanınmış mütəxəssis İlqar Hüseynli bizimlə söhbətində bildirdi ki, hansı dövlət orqanları vətəndaşlar qarşısında son dərəcə məsuliyyətli xidmət həyata keçirirlərsə, onlarda bu tip problemlərə az hallarda rast gəlinə bilər. “Ancaq o dövlət qurumları ki, korrupsiya cinayətlərində adları daha çox hallanır, vətəndaşların informasiya sorğularına açıq deyillər, həmin dövlət qurumlarının məsuliyyətsizliyi bu sahədə də özünü göstərir. Çünki belə qurumlar üçün ünvanlarının və telefon nömrələrinin düzgün göstərilməsi, hətta “Qaynar xətt”lərin yaradılması da onların maraqlarına uyğun deyil. Bu baxımdan düşünürəm ki, bu sahədə ciddi təhlil, ekspertiza aparılmalıdır. Bu problemin araşdırılmasında, təhlil edilməsində KİV-in dəstəyinə çox böyük ehtiyac var. İnternetdə informasiya resursları, ünvanları, əlaqə telefonları düzgün, əlçatan olmayan həmin o dövlət qurumları haqqında ictimai qınaq kampaniyası həyata keçirilməlidir ki, onlar, nəhayət, öz məsuliyyət yüklərini anlayaraq, o yeniləmələri həyata keçirsinlər” - deyə İ.Hüseynli vurğuladı.
İradə SARIYEVA
