Bakı-Ələt-Astara yolunun Salyan rayonundan keçən hissəsində restoranlar və yanacaqdoldurma məntəqəsi sökülür. Bildirilir ki, bununla bağlı iki ay öncə Baş Prokuror yanında Korrupsiyaya Qarşı Mübarizə Baş İdarəsi tərəfindən araşdırma başlayıb.
Araşdırmalar nəticəsində məlum olub ki, obyektlərin yerləşdiyi kafe və yanacaqdoldurma məntəqəsinin torpaq sənədi qanunsuz olub. Buna görə də bir ay öncə Korrupsiyaya qarşı Mübarizə Baş İdarəsi tərəfindən magistral yolun üzərində yerləşən “Hacıoğlu”, “Ulduz”, “Cız-bız”, “Masallı” restoranları və SOCAR-ın yanacaqdoldurma məntəqəsinin iş fəaliyyəti dayandırılıb. Bununla yanaşı, magistral yoldan həmin obyektlərə gedən yol da bağlanıb.
Salyandakı mənbələrin verdiyi məlumata görə Salyan rayon İcra Hakimiyyətinin memarlıq və tikinti şöbəsinin müdiri Teyyub Hüseynov vaxtilə həmin obyektlərin tikintisinə rəy verib. İddia edilir ki, həmin ərazilər Salyanın sabiq icra başçısı, general-leytenant Əliağa Hüseynova məxsus olub. Bu əraziləri o dolayı yolla satıb. Bəs indi sahibkarlara dəymiş ziyanı kimin ödəyəcəyi maraqlıdır. Bir sözlə, tikililərin sökülməsinə görə sahibkarlara cavab verəcək tək qurum rayonun icra hakimiyyətidir.
Korrupsiyaya qarşı Mübarizə Baş İdarəsinin araşdırmasından sonra məlum olub ki, “Hacıoğlu” restoranı bələdiyyənin balansında olan torpaq sahəsində tikilib, “Ulduz” kafesinin yerləşdiyi torpaq sahəsi isə əvvəllər Meşə təsərrüfatının balansında olub. Sonra isə 3 saylı Ekologiya və Təbii Sərvətlər İdarəsinin hesabına keçib, daha sonra isə Əmlak Komitəsi həmin ərazini dövlət torpağı kimi balansına keçirib. Sahibkar isə Əmlak Komitəsi ilə müqavilə imzalayaraq torpağa dair alqı-satqı edib. “Cız-bız” restoranının yerləşdiyi ərazi Xələc kənd bələdiyyəsinin balansında olub. 2006-cı ildə isə kənd sakini Yusif Nəzirova satılıb və onun şəxsi mülkiyyətinə keçib. Hazırda sahibkarlara dəyən ziyana görə əsas məsuliyyət kimin üzərinə düşməlidir?
Təəssüf ki, Salyan rayon İcra Hakimiyyətindən bizim bu yöndə olan suallarımıza ətraflı cavab verən tapılmadı. İcra Hakimiyyətinin Ümumi Şöbəsindən bildirdilər ki, bu məsələnin icra hakmiyyətilə heç bir əlaqəsi yoxdur.
Hüquqşunas Mehman Muradlı “Bakı-Xəbər”ə açıqlamasında bildirdi ki, bu cür məslələrin araşdırılması dəqiqlik tələb edir: “Sizin verdiyiniz məlumatdan belə başa düşdüm ki, hazırda bu məsələ ilə bağlı ilkin araşdırma gedir. İşin ibtidai istintaqı Baş Prokuror yanında Korrupsiyaya Qarşı Mübarizə Baş İdarəsi tərəfindən aparılırsa, deməli, burada hansısa vəzifəli şəxslərlə bağlı məsuliyyət müəyyənləşməlidir. Çünki ibtidai istitaqı aparan qurumun profili bu yönlüdür. Təbiidir ki, belə söküntülərlə bağlı sahibkarlara ziyan dəyir. Ancaq sahibkarın da borcudur ki, qanunvericiliklə müəyyən olunmuş qaydaya uyğun şəkildə öz fəaliyyətini qursun. Biz görürük ki, yol kənarında tikilən restoranların sənədləşməsində bir yox, bir neçə qurumun adı hallanır. Hətta həmin ərazilərin bir neçə qurumun balansına keçdiyi də bildirilir. Ola bilər ki, hansısa qurum bu məsələdə saxtakarlığa yol verib. Hələlik biz istintaqı qabaqlayıb nəsə deyə bilmərik. Bu məsələdə yekun sözü məhkəmə deyəcək. Ola bilər ki, zərər dəyən vətəndaşlar “vicdanlı alıcı” kimi tanınsın. Yəni bilmədikləri halda hansısa ərazidə iş qurduqları üçün. Qanunvericilikdə belə bir müddəa var. Hətta məhkəmə onlara dəyən ziyanın ödənilməsini də, hansısa qurumun üzərinə qoya bilər. Hansısa keçmiş məmurların adının bu cür məslədə hallanmasında qeyri-adi nəsə yoxdur. Adətən onlar bu cür əməliyyatları öz yaxınları olan başqa şəxslərin vasitəsilə edirlər. Yəni məsuliyyətdən yayınmaq üçün, heç nəyi öz adlarına sənədləşdirmirlər”.
Qeyd edək ki, sabiq baş hərbi komisarın adı bu cür məsələlərdə tez-tez hallanır. Bir müddət əvvəl Yasamal rayonunda yerləşən “Atlantis” restoranında gizli şəkildə keçirilən toy məclisinin təşkilatçısı və restoranın administratoru 400 manat məbləğində cərimə edildi. DİN Yasamal rayonunda yerləşən “Atlantis” restoranının “Eyforiya” zalında gizli şəkildə toy mərasiminin keçirilməsinin qarşısının alınması barədə məlumat yaydı.
İddialara görə, sözügedən restoran da sabiq hərbi komissar və deputat Əliağa Hüseynova aidddir.
Məhəmmədəli QƏRİBLİ
