Media Təhlil Mərkəzi tərəfindən kommunal xidmət sahələrinin fəaliyyəti barədə sorğu keçirilib. Mərkəzin nəticələrini dərc etdiyi sorğusuna əsasən, sorğu 25-28 fevral tarixlərində 817 respondent arasında aparılıb.
Sorğunun nəticələrinə əsasən, “Azəriqaz” İB-nin göstərdiyi xidmətlərdən sorğu iştirakçılarının 27,7%-i tam razıdır. Eyni zamanda, respondentlərin 30%-i qazın zəif olduğunu, 19,7%-i qazın təmiz olmadığını, 13,8%-i qaz sayğaclarının göstəricilərinin səhv olduğunu qeyd edib. Respondentlərin daha 8,8%-i qazın verilişində tez-tez fasilələrin yarandığını qeyd edib.
“Azərsu” ASC-nin xidmət fəaliyyəti sorğu iştirakçılarının 31,8%-ni tam qane edir. Eyni zamanda, respondentlərin 39,3%-i suyun təmiz olmadığını qeyd edib. Respondentlərin 13,6%-i suyun tez-tez kəsildiyini, 9,8%-i suyun az gəldiyini, 5,5%-i isə sayğacın göstəricilərinin səhv olduğunu bildirib.
Respondentlərin 42,4%-i “Azərişıq” ASC-nin göstərdiyi xidmətlərdən tam razıdır. Həmçinin, respondentlərin 28%-i elektrik enerjisinin verilməsində tez-tez fasilələrin yarandığını, 19,2%-i elektrik enerjisinin keyfiyyətinin aşağı olduğunu, 10,4%-i isə sayğac göstəricilərindən narazılığını bildirib.
“Dövlət tərəfindən bu kommunal xətlərin yenilənməsi üçün büdcədən vəsait ayrılmalıdır”
Əhalinin kommunal xidmətlərdən narazılığı barədə fikir bildirən ekspert Nüsrət Qasımov dedi ki, istehlakçıların şikayətlərinə baxmayaraq, vəziyyət qənaətbəxşdir: “Son günlərlə bağlı elə bir şikayət yoxdur. Kommunal xidmətlər üzrə 2 milyon yarımadək abonent var. Bu xidmətlərlə bağlı 10, 50, 100 şikayətin olması normaldır. Köhnə binalara insanlar su üçün motor qoyurlar, gecə də ayaz vurur, partladır. Bunu problem etmək düzgün deyil axı.
Qar yağanda bölgələrdə şaxta 16 dərəcəyə çatır. Bizim xidmət sahələri bu şaxtaya hazır deyil. Artıq yüklənmələr olur. Sovet dövründə necə idi?! Evdə 2-3 dənə lampa, televizor, bir soyuducu, bir də radio olurdu, vəssalam. İndi ət maşını, tozsoran, paltaryuyan maşın, qabyuyan maşın, ev üçün qızdırıcılar, soyuducular, televizorlar var. Axı xidmət sahələri buna hazır deyil. Əvvəllər naqilin en kəsiyini az götürürdülər, indi belə yüklənmədə naqillərin ötürücülük qabiliyyəti zəifləyir, qızır. Bununla da yanğın əmələ gəlir".
Onun sözlərinə görə, əsas problem sistemin köhnə olmasından qaynaqlanır: “Bölgələrdə köhnə xətlərin yenilənməsinə ehtiyac var. "Azəriqaz" İstehsalat Birliyi, "Azərişıq" Açıq Səhmdar Cəmiyyəti, "Azərsu" ASC, "Azəristiliktəchizat" ASC satış təchizatçısıdırlar. Onlar qazandıqları pullarla öz xərclərini ödəyirlər. Dövlət tərəfindən isə bu kommunal xətlərin yenilənməsi üçün büdcədən vəsait ayrılmalıdır".
Həmsöhbətimiz hesab edir ki, tədricən köhnə binalar sökülüb, yeni binalar tikildikcə, bu problem aradan qalxacaq.
Günel CƏLİLOVA
