Sabunçu rayonunun Zabrat qəsəbəsində yerləşən “Ucuzluq” və “Ayxan” ticarət mərkəzləri qarşısında avtomobillərin park edilməsi üzündən hər gün günün ikinci yarısından sonra inanılmaz tıxac yaranır.
Sözügedən ticarət mərkəzlərinin bir-birinə yaxın yerləşməsi ucsuz-bucaqsız tıxaca səbəb olur. Nəticədə Bakıətrafı kənd və qəsəbələrə gedənlər saatlarla tıxacda qalırlar. Belə ki, Kürdəxanıya, Məhəmmədiyə, Maştağaya, Buzovnaya, Nardarana, Pirşağıya, Bilgəhə, Daş karxanasına, Savalana gedən avtobus və digər avtomobillər Zabratdan keçirlər. Alternativ yollar uzaq olduğundan, məhz sözügedən yol çox yüklənir. Xüsusən də Buzovna və Nardaran qəsəbələri uzaq olduğuna görə orada yaşayan sakinlər daha çox yubanırlar.
Problem ondadır ki, həmin ticarət mərkəzləri üzündən tixacla bağlı problem ilbəil daha da ağırlaşır. Çünki avtomobillərin sayı artır, amma yol genişləndirilmir. Bir neçə il əvvəl Sabunçu-Zabrat yolu əsaslı təmir edildi. Ancaq ticarət mərkəzlərinin yaratdığı maneə nəzərə alınmadı.
“Ayxan” ticarət mərkəzinin rəhbərliyi deyir ki, avtomobillərin park edilməsi üçün qarajları var. Belədirsə, o zaman maşınlar niyə mərkəzin qarşısında park edilir? “Ucuzluq” ticarət mərkəzinin, ümumiyyətlə, maşınları park etmək üçün yeri yoxdur. Ticarət mərkəzinə gələnlər avtomobillərini səkilərin kənarında park edirlər. Bu da avtomobillərin hərəkət intervalını pozur. Sürücü və sərnişinlər saatlarla tıxacda qalmalı olurlar. Bəzən elə olur ki, Zabrat qəsəbəsinin ortasından keçən magistral yol başdan-başa tıxac içində olur. Bir sözlə, adıçəkilən ticarət mərkəzləri üzündən hər gün Zabrat yolunda rəzalət yaşanır.
“Çıxış yolu həmin ticarət mərkəzlərini bağlamaq və yaxud da digər yerə köçürməkdir”
Məsələyə münasibət bildirən ekspert Rəsul Cahangirlinin sözlərinə görə, belə gedərsə, həmin yolda əməllicə “tupik” yaranacaq: “Mənim özümün də dəfələrlə oradan yolum düşüb. Çox ciddi tıxac yaranır. Məhz həmin ticarət mərkəzləri, faktiki olaraq, Bakı kəndlərinə istiqamət alan avtomobillərin hərəkət intensivliyini aşağı salır. Zabrat qəsəbəsinin həmin hissəsinə qədər avtomobillər normal gələ bilir. Düzdür, Sabunçu-Zabrat yolu boyunca bir sıra kommersiya və xidmət obyektləri fəaliyyət göstərirlər. Ancaq həmin obyektlər avtomobillərin hərəkətinə elə bir maneçilik törətmirlər. Zabratın girişində yerləşən “Rahat” marketin geniş avtodayanacağı var. Ancaq “Ucuzluq” və “Ayxan” ticarət mərkəzlərində belə bir imkan yoxdur. Faktiki olaraq, ticarət mərkəzləri yola yapışıb. Üstəlik, ərazidəki digər kiçik obyektlər də vəziyyəti daha da çətinləşdirir. Çıxış yolu həmin ticarət mərkəzlərini bağlamaq və yaxud da digər yerə köçürməkdir. Çünki yolu genişləndirmək imkanı məhduddur və olduqca böyük xərc tələb edir. Buna görə yolun kənarında yerləşən çoxsaylı obyektin sökülməsinə görə gərək kompensasiya ödənilsin. Ancaq belə görünür ki, hər gün əhalinin yolda nə zillət çəkdiyi Sabunçu Rayon İcra Hakimiyyətini maraqlandırmır. Hansı ki, dəfələrlə bununla bağlı sərnişinlər öz narazılıqlarını bildiriblər. Heç olmasa maşınların ticarət mərkəzi qarşısında park edilməsini yığışdırsınlar. Bu ki, mümkündür. Bunu belə özlərinə rəva görmürlər”.
Ekspert hesab edir ki, müvafiq tədbirlər görülməsə, həmin yolda vəziyyət daha da mürəkkəbləşəcək.
Vidadi ORDAHALLI
